DISÁ 6

O Athu Afú a Kinga Dingi Ihi?

1. Iebhi o njimbu iambote ia lungu ni athu afú?

Lázalu ua fukunuka, a mu mu tambulula kiambote ku jiphange jê Malata ni Madiia

Kioso Jezú kia bhixila mu Betanha mu mbanza ia Jeluzaleme, o kamba diê Lázalu ua fuile, kua bhitile kiá izuua iuana. Jezú ua ile ni Madiia ni Marta exile o jiphange ja Lázalu, ku mbila kua mu fundila. Mundu uavulu uaileuê. U tena ku xinganeka o kisangusangu kia Marta, ni Madiia, kioso Jezú kia fukununa Lázalu?—Tanga Nzuá 11:21-24, 38-44.

Marta uejidile o njimbu iambote ia lungu ni athu afú. Muéne uejidile kuila Jihova ua-nda fukununa athu phala ku kala dingi ni muenhu mu ixi.—Tanga Jobe 14:14, 15.

2. O kuila o athu afú a bhanga dingi kima?

Adá a mu bhange, ni ufuilu uê — Nzambi uambela Adá: ‘Eie u mavu, ku mavu kuene ku ua ka vatukila.’—DIMATEKENU 3:19.

O athu a a bhange ni mavu. (Dimatekenu 2:7; 3:19) Etu ki tu athu mu nzumbi, maji tuala ni mukutu ua xitu. Se-ku kima ki bhuluka kioso ki tu fuá. Kioso ki tu fuá, o uongo uetu ki u kalakala dingi, o ibanzelu ietu i di bota. Lázalu ka tange kima kia bhiti ku diulu mukonda o athu afú kijiia dingi kima.—Tanga Jisálamu 146:4; Ndongixi 9:5, 6, 10.

O kuila Nzambi u jokotesa athu mu ifernu kioso kia fuá? Se o Bibidia i longa kuila o athu afú kejiia dingi kima, o milongi ia ifernu ia makutu, i tatela Nzambi. O ku jokotesa athu mu ifernu ki kima ki banza Nzambi ku muxima uê.—Tanga Jelemiia 7:31.

Tala o vidyu Ihi i Bhita ni Muthu Kyoso Kya Fwa?

3. O kuila o athu afú a tena kuzuela n’etu?

O athu afú ka tena kuzuela, né kuívua. (Jisálamu 115:17) Maji saí ji-anju ja iibha a zuela ni athu, phala kulondekesa kuila o athu afú kiá, a tena kuzuela ni athu ala ni muenhu. (2 Phetele 2:4) Jihova u tu kidika, phala ki tu fikise kuzuela ni athu afú kiá.—Tanga Matendelelu 18:10, 11.

4. Nanhi ua-nda vutuka ku muenhu?

Diiala a mu fukununa mu palaízu a mu mu longa o Mak’â Nzambi. Muéne anga u kuatekesa ué akuâ a a fukununa.

Athu avulu afú kiá a-nda vutuka dingi ku muenhu, phala ku kala mu ixi. Né muene o athu kejidile lua Nzambi, a bhangele ima ia iibha, a-nda vutuka ku muenhu.—Tanga Luka 23:43; Ikalakalu 24:15.

O athu a-nda vutuka ku muenhu, a-nda di longa ia lungu ni Nzambi, ni kulondekesa o kixikanu kiâ kua Jezú, mu ku mu belesela. (Dijingunuinu 20:11-13) Oso a-nda bhanga ima iambote, a-nda tambula o muenhu ua kalelaku mu ixi.—Tanga Nzuá 5:28, 29.

5. O difukunukinu di tu longa ihi ia lungu ni Jihova?

Nzambi ua tu bhana o kidielelu kia difukunukinu, mu ku tumikisa Mon’ê ua fuile phala ku tu bhulula. O difukunukinu di tu longa o henda ia Jihova. Kioso kia-nda vutuka o athu ku muenhu, nanhi ua mesena ku mu mona?—Tanga Nzuá 3:16; Loma 6:23.

Phala kuijiia dingi tanga o ibatulu 6, 7 ni 10 mu divulu Ihi i Tu Longa o Bibidia?