IBHUIDISU IA BIBIDIA IO TAMBUIJILE
O kuila saí kidielelu phala athu afú?
O kufuá kua difu ni ku zeka, mu ukexilu ua kuila o athu afú ala mu kilu kia zongo ka tena ku bhanga kima. Maji o Mubhangi ua muenhu u tena ku bheka dingi ku muenhu o athu afú mu ku a fukununa. Phala kulondekesa kuila kiki kidi, Nzambi ua bhana kutena kua Jezú phala ku bheka ku muenhu athu avulu a fuile kiá.—Tanga Ndongixi 9:5; Nzuá 11:11, 43, 44.
Mu ukexilu uebhi o kufuá kua difu ni ku zeka?
Nzambi ua kanena kuila o athu afú ala ku muxima uê, a-nda ku a fukununa phala ku kala ku mundu ubhe ua Nzambi. O athu a-nda ku a fukununa, a tokala a kala hanji mu mbila katé Nzambi kia-nda ku a bhana dingi o muenhu. O Nzambi Muteni-a-Ioso ua mesena kulondekesa o kutena kuê mu ku bheka ku muenhu o athu afú kiá.—Tanga Jobe 14:14, 15.
Kiebhi kia-nda kala o difukunukinu?
Kioso Nzambi kia-nda fukununa o athu, o athu a-nda tena ku dijiia mudiâ, ku lembalala o makamba mâ, ni miji iâ. Sumbala o mukutu ua muthu u bhiluka mavu, Nzambi u tena ku bheka ku muenhu o muthu uenhó ni mukutu ua ubhe.—Tanga 1 Kolindo 15:35, 38.
Maji ko athu oso a-nda ku a fukununa phala ku kala ku diulu. (Dijingunuinu 20:6) O athu a mukuá a-nda ku a fukununa phala ku kala mu palaízu mu ixi. Kiki kia-nda bhangesa o athu ku kala ku muenhu ua kalelaku.—Tanga Jisálamu 37:29; Ikalakalu 24:15.