Disá 2
Bebeka ua Mesenene ku Sangulukisa Jihova
Bebeka uexile muhatu ua zolele Jihova. O muadi uê, uexile Izake. Muéne ua zolele ué Jihova. Bebeka uejidila kuebhi Izake? Kiebhi kia londekesa kuila, ua mesenene ku sangulukisa Jihova? Tu di longe dingi ia lungu ni muéne.
Izake uexile mon’a Mbalahamu ni Sala. Ene a tungile mu ixi ia Kanana, o athu a ixi ienioió, ka kexile mu bheza Jihova. Maji Mbalahamu ua mesenene kuila, o mon’ê u kazala ni mubhezi ua Jihova. Mu kiki, muéne ua tumikisa o selevende iê, nange o selevende íii uexile Eliiazale, phala kuia mu sota muhatu phala Izake, mu ixi a ixana Halane, kua tungile o jindandu ja Mbalahamu.
Bebeka ua lengela bhu kixima mu takana o menha phala o jikamelu
Eliiazale uendele ni jiselevende ja mukuá ia Mbalahamu. Endele njila ia lebha. Ene ambatele dikuinhi dia jikamelu, ni kudia, ni maujitu avulu. Kiebhi Eliiazale kieji kuijiia o ku sola o muhatu ua tokelele phala ku kazala ni Izake? Kioso Eliiazale ni jiselevende ja mukuá kia bhixila mu ixi ia Halane, ene a tula hanji bhua zukamene o kixima kia menha, mukonda Eliiazale uejidile kuila, o athu eji kuíza mu teka menha. Muéne ua sambe kua Jihova, iu uambe: ‘Se ngi bhinga ku kilumba ku ngi katuila menha, anga muéne u ngi bhana o menha, anga u bhana ué ku jikamelu jami, nga-nda kuijiia kuila muene o muhatu u ua solo.’
Mu ku bhita kithangana, o kilumba Bebeka uéza bhu kixima. O Bibidia izuela kuila muéne ua uabhele kiavulu. Eliiazale ua mu bhingi menha, muéne ua tambuijila: ‘Nué ngana, ni ji kamelu jê ngi ji tekela ué katé ki ji zubha o kúnua.’ Xinganeka! O jikamelu, kioso ki ji kala ni dinhota, jinua menha avulu, xinganeka Bebeka ua mu lenga mu kuia mu teka o menha veji javulu. U tena ku xinganeka o kikalakalu kia dikota kia bhangele Bebeka?— Eliiazale ua diuanene kiebhi kia tambuijila Jihova o musambu uê.
Eliiazale ua bhana kua Bebeka maujitu avulu. Muéne ua bhingi Eliiazale ni jiselevende ja mukuá, phala kuia né kumoxi ku bhata diâ. Eliiazale ua zuela se mukonda diahi Mbalahamu ua mu tumine kuia mu ixi ienioió, ni kiebhi Jihova kia tambuijile o musambu uê. O muiji ua Bebeka kia a uabhele kiavulu, ene a mesenene kuila muéne u kazala ni Izake.
Bebeka uai ni Eliiazale mu ixi ia Kanana, ku kazala ni Izake
Ihi i u banza, o kuila Bebeka ua mesenene ku kazala ni Izake?— Bebeka uejidile kuila, Jihova ua tumine Eliiazale mu ixi ienioió. Kienhiki, kioso o muiji ua Bebeka kia mu ibhuidisa se muéne ua mesenene kuia mu ixi ia Kanene, ku kazala ni Izake, muéne ua tambuijila: ‘Ngiia.’ Mu kithangana kieniókio, muéne uai ni Eliiazale. Kioso kia tula mu ixi ia Kanana, muéne ua kazala ni Izake.
Mukonda dia Bebeka ku bhanga ia mesenene Jihova, Jihova ua mu besoala. Mu ku bhita mivu, Jezú a mu vuala ku muiji ua Bebeka! Se uene mu bhanga kála kia bhangele Bebeka, ni ku sangulukisa Jihova, muéne ua-nda ku besoala ué.