KIBHUIDISU 4
Kiebhi ki Ngi Tena Kudibhana ni Itondalu Iami?
IHI I UEJI BHANGA?
Tala o kifika kiki: Tim ua mu jokala bola ni makamba mê. Muéne u takula o bola anga i bula o dibhitu dia vizinhu iê.
Se ua kexile bhu kididi kia Tim, ihi i ueji bhanga?
XINGANEKA!
UALA NI NDUNGE JITATU PHALA KU BATULA O MAKA ENHÁ:
Kulenga.
Kutatela muthu uéngi.
Kutangela vizinhu ié ioso ia bhiti, ni kufuta o dibhitu di ua bulu.
Nange u banza kubhanga kala ki zuela o ndunge ia 1: Kulenga. Maji kima kiambote kuxikina o itondalu ié.
NDUNGE JITATU JI TENA KU KU KUATEKESA KUXIKINA O ITONDALU IÉ
Kiene o kima kia tokala phala kubhanga.
O Bibidia i zuela: “Tua mesena kubhanga mu kidi o ima ioso.”—Jihebeleu 13:18.
O athu a kala dingi ni vondadi ia kuloloka se o muthu u xikina o itondalu iê.
O Bibidia i zuela: “Muthu uoso u vunga o ikuma iê, katena kubhanduluka; maji muthu uoso-phe ikuma iê u i fisala, anga u i ambula, ió hinu a mu kuatela henda.”—Jisabhu 28:13.
O kia beta-o-kota, o kuxikina o itondalu ietu ku sangulukisa Nzambi.
O Bibidia i zuela: “Kuma ngana ua di-zemba ni athu abhukumuka; maji o kikutu kiê u ki jituina athu oso aiuka muxima.”—Jisabhu 3:32.
Karina uala ni 20 a mivu, a mu kuata kua xiku dia ikoka iá a mu te muluta mukonda dia kufuona kiavulu ni dikalu. Muéne ka tangelé tat’ê o maka enhá. Maji ka tenene kusueka o maka enhá mu ithangana iavulu. Karina ua zuela: “Mu kubhita muvu, tat’etu uéza mu kuijiia kuila a ngi tele muluta. Mu kiki nga soto maka a dikota!”
Disá dia-hi dia di longo? Karina ua zuela: “Kusueka o itondalu kubheka ibhidi iavulu. Kikale lelu mba ku hádia ua-nda futa i ua bhange!”
KATULA MBOTE MU ITONDALU IÉ
O Bibidia i zuela: “Etu-ene oso, tuene mu tondajala mu ima iavulu.” (Tiiaku 3:2) Kala ki tua mono kiá, kioso ki u xikina kuila ua lueza, ua mu londekesa kuila u muthu ua lenduka, uala ni kilunji.
Kia mukuá, tua tokala kukatula phangu mu itondalu ietu. Kilumba dijina diê Vera, uambe: “Kioso ki ngi tondala, ngi sota kudilonga phangu. Kiki kiene mu ngi kuatekesa kusunga kilunji, kizuua kia mukuá mu veji dia kutondala dingi, ngi bhanga kiá kiambote o ima.” Tu mone kiebhi ki u tena kukatula phangu.
Xinganeka kuila ua zange o bixi ia tat’enu. Ihi i ueji bhanga?
Ngi dixibha. Ngi samba phala muéne ka mone kuila o bixi ia zanganha.
Nga-nda mu tangela ioso ia bhiti.
Nga-nda tangela kua papa kuila o bixi ia zanganha maji nga-nda zuela kuila k’eme nga i zange.
Xinganeka kuila eie kudilongo kiambote phala kubhanga o jipolova mu xikola, mukonda dia kiki ua xumbala. Ihi i ueji bhanga?
Nga-nda zuela kuila o polova ia bhonzele kiavulu.
Nga-nda ditatela eme kuila ki ngi dilongo kiambote.
Nga-nda zuela kuila o mulongexi ua ngi zembe.
O kulembalala o ima ia iibha i ua bhange m’ukulu, kua soko ni muendexi a dikalu u tala mu lumuenu lua dikalu kioso kia mu kuendesa
Mu kiki, xinganeka dingi mu kifika kiki. Kindala di te mu kididi kia (1) tata ni (2) mulongexi. Se u xikina kuila eie ua tondala, kiebhi ene kieji ku mona? Kiebhi ene kieji ku mona se u dituna kuila kualé ni kikuma?
Xinganeka kima kiaiibha ki ua bhange ku muvu ua tundu-mu, mu kusuluka tambuijila o ibhuidisu íii.
Kima kiahi kiaiibha ki ua bhange ni ihi i ua bhange?
Ki ngi tangela muthu.
Nga tatela muthu uéngi.
Nga zuela o kidi mu kithangana kienhokio.
Se kuxikina kuila ua lueza, kiebhi ki ua divu?
Nga divu kiambote, mukonda ka ngi kaxtikala!
Nga divu kiaiibha. Hinu nga zuela o kidi.
Ihi i ueji bhanga phala kudivua kiambote?
Phangu iahi i ua katula mu kitondalu kié?
IHI I U BANZA?
Mukonda diahi sai athu kene mu xikina o itondalu iâ?
Ihi ia-nda banza o athu ia lungu n’eie, se uenda ni kusueka o itondalu ié? Ihi ia-nda banza o athu ia lungu n’eie, se u xikina o itondalu ié?—Luka 16:10.