Mulangidi KIDIDI KYA KUBHAKA MADIVULU MU INTERNETE
Mulangidi
KIDIDI KYA KUBHAKA MADIVULU MU INTERNETE
Kimbundu
  • BIBIDYA
  • MADIVULU
  • YÔNGE
  • wp17 No. 6 jimb. 10-11
  • Kiebhi ki ua Tokala Kutala o Itondalu Ié?

O vidyu iwasolo seku luwa.

Tuloloke, kwamoneka kibhidi mu kujikula o vidyu.

  • Kiebhi ki ua Tokala Kutala o Itondalu Ié?
  • O Mulangidi U Bhana Ngolokela ia Utuminu ua Jihova (Phala o Athu)—2017
  • Tudyambu
  • Milongi Yadifu
  • IBANZELU IETU NI IA NZAMBI IA LUNGU NI ITONDALU IETU
  • KIEBHI KI TUA TOKALA KUDIBHANA NI ITONDALU IETU
  • ITUMU I TENA KU TU KUATEKESA KUSOSOLA O ITONDALU IETU
  • MBOTE IJILA MU KUTALA MU UKEXILU UAMBOTE O ITONDALU IETU
  • Kiebhi ki Ngi Tena Kudibhana ni Itondalu Iami?
    Itambuijilu ia 10 Dia Ibhuidisu Iene mu Bhanga o Minzangala
  • O Kwila Wene Mudilonga ni Itondalu Yé?
    Ukexilu ua Ukidistá ni Ukunji Uetu—Milongi Phala o Iônge—2022
  • Di Longe ni Itondalu Ié
    Ukexilu Uetu ua Ukidistá ni Ukunji Uetu—Milongi Phala O Iônge—2017
  • O Kuila tu Tena Kusangulukisa Nzambi?
    O Mulangidi ua ku di Longa—2015
Tala dingi ima yamukwa
O Mulangidi U Bhana Ngolokela ia Utuminu ua Jihova (Phala o Athu)—2017
wp17 No. 6 jimb. 10-11
Manda ni muiji uê a mu jandala

Kiebhi ki ua Tokala Kutala o Itondalu Ié?

Dimingu ni Mandaa a tambula ajitu, o mona, o holome ni alaula. Mu kizuua kia sukina, Manda, mesene ia kulamba, ua lambe makalá ni keju, mukonda alaul’ê a uabhela kiavulu o kudia kuku.

Athu oso a xikamene kiá ku meza, Manda ua bheka o kudia iu ua ku tula ku meza. Kioso muene kia jikula o ditijela, ua mono kuila muexile ngó muzonge ua keju, kuabhu. Manda ua dijimbile kuta m’umbia o makalá!b

Ki kale tu adiakime mba tuijiia kiavulu, etu enoso tuene mu tondala. Tu tena kutondala mu ima i tu zuela mba kubhanga kima kiambote mu kithangana ki ki tokala, mba tu jimba kubhanga kima. Mukonda diahi tuene mu tondala? Kiebhi ki tu tena kudibhana ni itondalu ietu? Ihi i tena ku tu kuatekesa phala ki tu tondale? O kukala ni ibanzelu ia tokala ia lungu ni itondalu ietu, kua-nda tu kuatekesa kutambuijila o ibhuidisu íii.

IBANZELU IETU NI IA NZAMBI IA LUNGU NI ITONDALU IETU

Kioso ki tu bhanga kiambote kikalakalu, tu sanguluka kioso kia tu ximana ni ku tu bhana kijingu mu ioso i tua bhange. Kioso ki tu tondala, né muene sé etu ku ki mesena mba akuetu ka tu mono, ki tu tokala ue kuxikina kuila tua bhange kima kiaiibha? Phala kubhanga kiki, tua bhingi kukala tu athu a lenduka.

Se tu dizangeleka, tua-nda banza kuila o kima kiaiibha ki tua bhange, ki kia iibhé kiavulu, tua-nda tatela athu engi mba tua-nda dituna kuila k’etu tua ki bhange. Maji o kubhanga kiki, ku bhekesa malamba avulu ku muenhu. O maka a kala sé kua batula, athu a mukuá ka bhange kima a a tatela kuila éne a lueza. Né muene se kindala tu dituna kuila k’etu tua zange, tua tokala kuijiia kuila hádia, ‘kala muthu mudietu, ua kà bheka konda iê kua Nzambi.’​—Loma 14:12.

Nzambi u tala mu ukexilu uambote o itondalu. Mu divulu dia Jisalamu, Nzambi a mu tange kala “ua lenduka, u kokoloka o kutema” muene ‘ka jijila kubazela, kene mu kuatela phonzo.’ Muene uejiia kiambote kuila tua kua ituxi “u lembalala kuma tuala tu mavu.”​—Jisálamu 103:8, 9, 14.

Mu kiki kala tata ia jihenda muene ua mesena, etu tu tuana tuê tu mona o itondalu kala ki i mona muene. (Jisálamu 130:3) O Maka mê a tu bhana ndumba dia itendelesu i tu kuatekesa kudibhana kiambote ni itondalu, ki kale o etu ki kale ia kuetu.

KIEBHI KI TUA TOKALA KUDIBHANA NI ITONDALU IETU

Ithangana iavulu, kioso o muthu kia lueza, muene u ngastala kithangana kiavulu, nguzu, mu ku tatela akuâ mba mu kulombolola se mukonda diahi uambe mba ua bhange kiokio. Mu veji dia kiki, se ua xingi mukuenu, bhinga muloloki, batula o maka ni mukuenu ni mu suluke kukala mu makamba ambote. O kuila ua bhange kima kiaiibha kia ku luualesa mba kia luualesa akuenu? Mu veji dia kudibazela mba ku tatela akuenu, mukonda diahi ku sote kubatula o maka? Mu kiki, o kutatela akuenu kua-nda zubhe o maka, kana, ku bhangesa ngó o maka kudibandekesa. Mu veji dia kiki, bhanga o kima kia tokala phala kubatula o maka.

Maji kioso muthu kia bhanga kima kiaiibha, tu londekesa mu maukexilu avulu kuila tua zembe o kima kia bhange. Kima kiambote kukaiela o kitendelesu kia Jezú kioso kiambe: “Ima ioso-phe i mua mesena kuila athu a mi bhanga-iu enu, iene ue muene i mua bhanga ene.” (Matesu 7:12) Kioso ki u bhanga kima kiaiibha, né muene se kama kofele, sé phata, eie u mesena kuila akuenu a kubhanga henda mba a jimbe o kima ki ua bhange. Kienhiki mukonda diahi ku bhange nguzu phala kubhanga ue henda kua akuenu?​—Efezo 4:32.

ITUMU I TENA KU TU KUATEKESA KUSOSOLA O ITONDALU IETU

Sai dicionário diambe kuila, o i bhangesa o muthu kutondala ó “kubanza kiaiibha, kukamba kuijiia kua kidi mba kukamba kuivuidila kiambote o maka.” Tua tokala kuxikina kuila athu oso mudietu sai ithangana tu bhita mu maka enhá. Maji ki tua-nda tondala kiavulu se tu dilonga o itumu ia beta o kota ia Mikanda Ikôla.

Sai kitumu kimoxi kia beta o kota kiala mu divulu dia Jisabhu 18:13, di zuela: “Ku vutula kua lusolo, kuila ioso kilua u ivua, ió uôua ni ku dibhekela sonhi; kota o ku dianga kuivuidila.” Kiene, o ku katula kithangana phala kuívua kiambote o maka ni kutala o kitambuijilu kié, kia-nda ku kuatekesa kuxinganeka ande dia kuzuela mba kubhanga kima. O kuijiia kuijila mu kuivuidila kiambote o maka, ku tu kuatekesa kukala ni ibanzelu ia iuka ni kudilanga phala ki tu tondale mba ki tu lueze.

O kitumu kia mukua kia Bibidia ki zuela: “Se mua ki tena, kalenu ku paze ni athu oso; mvunda ki i tunde ko kuenu.” (Loma 12:18) Bhanga ioso phala ku kala ni ukexilu u bheka kutululuka ni ua ku di kuatekesa mudietu. Kioso ki tu kalakala ni akuenu, kala u mukua henda, u mukua kuxila ni ku bhanga nguzu phala kuximana ni kusuinisa akuenu. Se tu bhanga kiki, o izuelu iaiibha mba ima iaiibha tua-nda tena ku i loloka mba ku i jimba. Se a tu xinga tua-nda tena kubatula o maka mu ukexilu uambote.

Sota kudilonga phangu iambote mu itondalu iê. Mu veji dia kuzokela o kima kiaiibha ki ua bhange mba ki ua zuela, sota kudilonga kukala ni idifua iambote ku muenhu ué. Eie nange ua bhingi kulondekesa dingi muanhu, kubhanga mbote, mba ku dilanga? Mba kukala mukua kulenduka, mukua paze, ni mukua henda? (Ngalásia 5:22, 23) Ki kiene ngó, eie ua tena kuijiia kiá o ima ku tokala ku i bhanga. Kana kuta luavulu ku muxima o ibanzelu iê. O ukexilu ua kutonoka kianda ku kuatekesa kusosolola o njinda.

MBOTE IJILA MU KUTALA MU UKEXILU UAMBOTE O ITONDALU IETU

O kukala ni ukexilu uambote ua ku mona o itondalu, kua-nda tu kuatekesa ku dibhana kiambote kioso ki tu tondala. Tua-nda kala tu athu a tululuka, ki kale n’etu mudietu mba ni akuetu. Se tu sota kudilonga phangu mu itondalu ietu, ki tua-nda kala tu athu a bhonzo kana, tua-nda kituka tu jinjimu. Ki tua-nda luuala kiavulu mba kuxinganeka kuila etu tuala tu athu aiibha kinene. O kuijiia kuila akuetu a mu dibhana ua ni itondalu iâ, kua-nda tu suinisa kuzukama dingi kua ene. O kia beta kota, tua-nda tena kukaiela Nzambi mu kukala ni henda ni kuloloka akuetu ni muxima uoso.​—Kolose 3:13.

O kuila o kitondalu kia Manda, tua mu tange ku dimatekenu, kia zange o kusanguluka kua muiji mu kizuua kieniókio? Kana ngana. Mu veji dia kufutuluka, o muiji uoso uelele kiavulu benge-benge Manda. Enoso a di o muzonge ua keju sumbala ki mu kexile makalá! Mu kubhita mivu, o kiiadi kia alaula a tangela ku tuana tuâ o kudia kua lambele kukuâ phala o muiji. A a tangela ua ioso iejidile ia lungu ni kuku jâ. Mukonda ki kiexile kituxi kana, kitondalu ngó!

a O majina a a lungulula.

b O kudia kuku a ku bhanga ni makalá ó fungise ni muzonge ua keju.

    Madivulu Muoso Kimbundu (2008-2025)
    Kutunda
    Kubokona
    • Kimbundu
    • Kuwanena akwenu
    • Yakuwabhela
    • Copyright © 2025 Watch Tower Bible and Tract Society of Pennsylvania
    • Ijila
    • Kikutu Kyetu
    • Definições de privacidade
    • JW.ORG
    • Kubokona
    Kuwanena akwenu