Kiebhi o Bibidia i Tena ku Ngi Kuatekesa?

IHI I UEJI BHANGA?

Xinganeka mu maka iá: Davidi ua mu kuendesa dikalu. O kididi ka kijiia kiambote. O ijimbuete ia kikoka, ilondekesa kuila, sumbala muéne uendesa kiá kiavulu, maji ki luua kia bhixila. Mu kiki, Davidi u mona kuila, ua jimbila. Nange muéne ua ditela njila iéngi.

Se ua kexile bhu kididi kia Davidi, ihi i ueji bhanga?

XINGANEKA!

U tena kubhanga ima iavulu:

1. Kuibhula muthu.

2. Kutala mu mapa, mba o GPS.

3. Kusuluka ni kuendesa o dikalu, ni kidielelu kia kusanga o njila ia tokala.

Mu kidi, o kitambuijilu C, nange ki i kuatekesa kubatula o maka ni lusolo.

O kitambuijilu B ki kuatekesa dingi, o ia dianga ndenge. Mu kidi, o mapa ni GPS, ia-nda kala n’eie kioso ki uia ni kuenda. Iene i tena kukuatekesa kusanga o njila ia tokala.

Kiene kimoxi, o Bibidia i tena ué kubhana o kikuatekesu kia tokala!

O divulu didi, dia beta-o-kota ku disumbisa, ditena:

• ku kuatekesa ku dibhana ni maka a moneka ku muenhu ué

• Ku kuatekesa kuijiia kiambote o ídifua ié, ni kulungulula o ukexilu ué

• ku kuatekesa kuijiia ihi i ua tokala kubhanga phala kuzediua ku muenhu

KUTAMBUIJILA O IBHUIDISU IA BETA-O-KOTA KU MUENHU

Kioso ki tu mateka kuzuela, tu bhanga ibhuidisu.

• Mukonda diahi o diulu diâ zulu?

• Kiebhi kia bhange o jithéthembua?

Mu kubhita thembu, tu mateka kubhanga ibhuidisu ia lungu ni ima ia tu kondoloka.

• Mukonda diahi o ima iaiibha i bhita n’etu?

• Mukonda diahi o athu a fúa?

Abha se o itambuijilu ia ibhuidisu íii, iala kiá mu Bibidia tundé ukulu?

Athu avulu a zuela kuila, o Bibidia iezala ni misoso ia makutu, ni kuila, o milongi iê ki iala dingi ni valolo. Ene a zuela ué kuila, ki bhonza kiavulu ku i tendela. O kuila o maka, o Bibidia, inga o ima iévu o athu ia lungu ni Bibidia? O kuila a a tangela makutu?

Mu kifika, o athu a banza kuila, o Bibidia i zuela kuila, Nzambi muéne ua mu tumina o mundu. Maji o kuila kidi? O mundu iú uaiibha! Uezala ni ndolo ni hadi, mauhaxi ni kalunga, uadiama ni mavuua. Kiebhi o Nzambi ia henda u tena kubhanga o ima ioso íii iaiibha?

Ua mesena kuijiia o kitambuijilu? Nange, o ima i zuela o Bibidia ia lungu ni muthu ua mu tumina o mundu, ia-nda kubhangesa kudiuana!

Nange eie ua mono kiá kuila, o milongi ia kadivulu kaka ia tundu mu Bibidia. O Jimbangi ja Jihova a xikina ni kidi kioso kuila, o milongi ia Bibidia i tena ku tu kuatekesa ku muenhu. Ene a xikina o kidi kiki mukonda, o Mikanda ioso ia ‘bhusu Nzambi, mikanda ia kubhandulula, ni kulonga o kidi, ni kubazela itondalu, ni ku iukisa ia bhengalala.’ (2 Timote 3:16, 17) Ua tokala kutonginina kiambote o milongi ia divulu didi, mukonda sumbala a di soneka kiá ukulu, diala hanji ni valolo!