Jezú u Disa Mundu Uavulu

Thembu ande dia kubhita o fesa ia Phasu, ku muvu ua 32 K.K., o jipoxolo avutukile, mukonda endele njila ia lebha phala kuboka. Ene a bhuile, mukonda dia kiki Jezú ua a tumu kudilonga mu bote, phala kuia mu mbanza ia Betesáida, mu nhoha. Maji kioso o bote ki ia zukamene ku ndundu, mba kididi kia kuxisa o jibaluku, Jezú ua mono kuila mazunda a athu akexile mu a kaiela. Né muene kioso Jezú kia mesenene hanji kukala ubheka ni jipoxolo jê, muene ua tambulula o athu ni henda ioso. Muene ua sake o jihaxi, anga ua mateka kua a longa. Izuua ioso, Jezú ua kexile mu longa ia lungu ni Utuminu ua Nzambi. Kioso o dikumbi ki dia boba, o jipoxolo jê a mu zukamene, anga a muambela exi: ‘O mundu-phe uala ni nzala. Sula o kifuxi, n’a sote kia kúdia.’

Jezú uambe: ‘Ene ka bhingi kuia. Enu’enu a bhanenu kúdia phala kudia muene bhabha.’ O jipoxolo ebhula: ‘Ua mesena kuila tuia mu a sumbila jimbolo?’ Poxolo Filipe, uambe: ‘Né muene se tua kexile ni kitadi kiavulu, ki tueji tena kusumba jimbolo ja soko phala o mundu uoso iú.’

Jezú uebhula: ‘O kuila tuala ni kúdia kua soko?’ Mandele uambe: ‘Tuala ngó ni mbolo jitanu ni mbiji jiiadi. Ki kua-nda soka.’ Jezú uambe: ‘Ngi bhekele-nu o jimbolo ni mbiji.’ Muene ua tumina o mundu kuxikama mu iangu, mu ibuka ia 50 ni ia 100. Jezú ua kuata o jimbolo ni mbiji jiiadi, ua tale bhulu, ua sambe. Mu kusuluka ua bhana o kúdia ku jipoxolo, ene anga a uanene ku athu. O 5.000 ja mala, ni ahatu ni an’a ndenge oso adi ekuta. Mu kusuka-ku, o jipoxolo a nona o jisesekenha jasubhuka-ku. Ia tenesa 12 dia ngalu! Kiki kiexile kidiuanu kia dikota, ki kiene?

O athu a diuanene kiavulu, mu kiki a mesenene kuila Jezú u kala o sobha iâ. Maji Jezú uejidile kuila ki kiexile hanji o kithangana kia Jihova kia ku mu bhanga sobha. Mu kiki muene ua tumikisa o mundu ku mabhata mâ, anga ua tumina o jipoxolo kuia kididi kiéngi kia Kalunga ka Ngalileia. Ene a dilongo mu bote iâ, maji Jezú uai ku mulundu ubheka uê. Mukonda diahi? Mukonda muene ua mesenene kukala ni kithangana phala kusamba kua Tat’ê. Né muene se ua kexile ni ima iavulu phala kubhanga, Jezú ua kexile mu sota kithangana phala ku samba.