O Fesa ia Sukina ia Jezú mu Ixi

O Jijudé akexile mu bhanga o fesa ia Phasu mivu ioso, mu kizuua kia 14 kia mbeji ia Nisã. O fesa íii iexile phala ku a lembalesa, kiebhi Jihova kia a katuile ku ubhika ku Ijitu, ni ku a bheka mu Ixi ia Kanana. Ku muvu ua 33 K.K., Jezú ni maxibulu mê, a bhange o fesa ia Phasu mu inzo ia thandu mu Jeluzaleme. Ku disukilu dia fesa íii, Jezú uambe: ‘Mu dienu sai muthu ua-nda ngi sumbisa.’ O jipoxolo a diuanene ni izuelu ia Jezú, anga a mu ibhuidisa: ‘Nanhi muene?’ Jezú uambe: ‘Uoso nga-nda mama-nê mbolo bhu dilonga, muene ua-nda ku ngi thelekala.’ Mu kusuka-ku muene ua bhana kibhesu kia mbolo kua Juda dia Kadiota. Mu kithanganókio, Juda ua balumuka, ua tundu bhu kanga.

Jezú ua bhange musambu, ua bukujula o mbolo anga ua i uanena ku jipoxolo jê ja subhukile. Muene uambe: ‘Dienu o mbolo íii. Kiki kilombolola o mukutu uami, u nga-nda bhana mukonda dienu.’ Mu kusuluka ua sambe dingi, ua kuata o kopho ia vinhu, ua i uanene o jipoxolo. Muene uambe: ‘Nuenu o vinhu íii. O vinhu iii, ilombolola o manhinga mami, u ga-nda bhana phala kuloloka o ituxi ienu. Ngi mi kanena kuila, enu mua ka kala jisobha ni eme ku diulu. Bhange-nu jinga kienhiki mu ku ngi lembalala eme.’ O akaiedi a Jezú ene hanji mu diongeka kumoxi mu usuku ua kizuua kienhókio mivu ioso. Lelu o kiônge kiki, a kixana Lembalasa ia Kufua Kua Jezú.

Kioso kia zubha o fesa, o jipoxolo a kexile mu zoka se nanhi ua betele kota mudiâ. Maji Jezú ua a tangela: “Mudienu uoso ua beta o kota, a kale kala muene o ndenge, o oso u tumina a kale kàla muene ala ku mu tumina.”

‘Enu mu makamba mami. Mukonda ima ioso ia ngi tangela Tat’iami, eme nga mi tangela-iu. Kua kambe ngó, eme nga-nda ia kua Tat’iami ku diulu. Enu mua-nda xala, o athu a-nda mijiia kuila mu maxibulu mami mukonda dia henda ienu mudienu. Di zole-nu mudienu, kála ki Ngene mu mi zola enu.’

Ku disukilu, Jezú ua sambe, ua bhingi phala Jihova kulanga o maxibulu mê. Muene ua bhingi phala Jihova ku a kuatekesa ku di bunda kumoxi ni kutululuka kuoso. Ua sambe phala o dijina dia Jihova ku di jingisa mba ku dixila. Mu kusuluka, Jezú ni jipoxolo Jê embi mimbu ia kuximana Jihova, anga a tundu bhu kanga. Kua kambele ngó tu ithangana phala Jezú ku mu kuta.