Kyebhi ki Utena Kukatula Dingi Mbote mu Kutanga o Bibidya?

O kwila wamesenene kyá kubhanga kikalakalu kya dikota maji wadivwile kwila, kweji tena kukizubha? Nange wakibhangele mbandu ni mbandu phala ki ikubhonze kyavulu. Kyene kimoxi we mukutanga o Bibidya. Nange udibhwidisa: ‘Kwebhi ku ngandamateka?’ Mu disá didi, twandadilonga ima yofele i utena kubhanga phala kukukwatekesa kuwabhela kutanga ni kudilonga o Bibidya.

1. Mukonda dyahi twatokala kutanga o Bibidya izuwa yoso?

O muthu utanga o Bibidya mba “o ngonge ya Jihova” izuwa yoso, wandazediwa, wandaditunda kyambote kumwenyu. (Tanga Jisálamu 1:1-3.) Phala kumateka, kala kizuwa sota kutanga mu ithangana yofele. Kyoso ki uya ni kwijiya o Mak’â Nzambi, wandaya ni kuwabhela dingi kutanga o Bibidya.

2. Ihi yandakukwatekesa kukatula mbote mu kutanga o Bibidya?

Phala kukatula dingi mbote mu kutanga o Bibidya, twabhingi kwimana ni kuxinganeka mu ima itwamutanga. Twatokala kutanga ni ‘kuxinganeka.’ (Josuwé 1:8) Kyoso ki uya ni kutanga dibhwidise: ‘Ihi ingilonga o milongi yiyi, yalungu ni Jihova Nzambi? Kyebhi kingitena ku ikumbidila kumwenyu wami? Kyebhi kingitena kukwatekesa akwetu ni jivelusu jiji?’

3. Kyebhi ki utena kusanga o kithangana phala kutanga o Bibidya?

O kwila kwene mu kubhonza kusanga kithangana phala kutanga o Bibidya? Kiki kyene mubhita ni athu avulu mudyetu. Sota kubhanga ima yambote mu ‘kithangana kiwala nakyu.’ (Efezu 5:16) Eye utena kubhanga kiki, mu kusola kithangana phala kutanga o Bibidya izuwa yoso. Sayi athu asola kutanga o Bibidya mu kamenemene. Amukwa asola kithangana mu ngoloxi, nange mu ola ya kwimana phala kudimosala. Amukwa hanji, atanga o Bibidya mu usuku ande dya kuya muzeka. Kyebhi o kithangana kyambote phala eye?

DILONGE DINGI

4. Dilonge kuwabhela kutanga o Bibidya

Sayi bhabha kubhonza kumateka kutanga o Bibidya. Eye utena ‘kudilonga kuwabhela’ kutanga o Bibidya, kala ki utena kuwabhela kulola o kudya nuka wakudile. Tanga 1 Phetele 2:2, mukusuluka bhanga o kibhwidisu kyakayela:

• Mudyé, o kwila se utanga o Bibidya izuwa yoso wandakala dingi ni vondadi ya ku itanga?

Tala OVIDYU phala kumona kyebhi athu amoxi kyamateka kuwabhela kutanga o Bibidya. Mukusuluka bhanga o ibhwidisu yakayela.

VIDYU: Minzangala Yadilongo Kuzola o Mak’â Nzambi (5:33)

• Ibhidi yebhi yatolola o minzangala mu vidyu iwatale?

• Ihi ya akwatekesa kusuluka ni kutanga o Bibidya izuwa yoso?

• Ihi yabhange phala kuwabhela dingi o kutanga o Bibidya?

Jindunge jandakukwatekesa kumateka o kutanga:

• Sola Bibidya yolungulule mu izuwa yetu maji o njimbu yê ki ilunguluka. Fikisa kutanga o Tradução do Novo Mundo se yala kya mu dimi dyé.

• Mateka ni kutanga o mbandu ya Bibidya i umona kwila, yakuwabhela dingi. Tala o jindunge jala mumbandu “Mateka o Kutanga o Bibidya.”

• Soneka o ima iwatange kya. Phala kukukwatekesa tala mumbandu “Wejiya Bhu wa Suku?” mu divulu didi.

• Kalakala ni aplikativu JW Library^®. Ni aplikativu yiyi, eye utena kwivwa ni kutanga o Bibidya kabasa kididi bhu kaxi ka mutelembe wé.

• Tanga o ji Apêndice mu Tradução do Novo Mundo. Mwala jimapa, jifikula ni glossario itena kukukwatekesa kuwabhela dingi o kitangelu kya Bibidya.

5. Disokejeke phala kutanga o Bibidya

Tanga Jisálamu 119:34, mukusuluka bhanga o kibhwidisu kyakayela:

• Mukonda dyahi kima kyambote kusamba ande dya kutanga o Bibidya mba ande dya kupelepalala o milongi iwandadilonga?

Kyebhi ki utena kukatula dingi mbote mu kudilonga? Kyoso ki uya ni kupelepalala o madisá mu divulu didi, kayela o jindunge jiji:

1. Tanga o makaxi adyanga a disá.

2. Tanga o ibatulu ya Bibidya imonekamu, mukusuluka, sota kutendela kyebhi o ibatulu yiyi yalungu ni milongi yoso.

3. Xinda o izwelu mba o diba ditambwijila o kibhwidisu; kiki kyandakukwatekesa kutambwijila kyoso ki wandadilonga ni mulongexi wé.

Eye wakijidile?

O Jimbangi ja Jihova ene mutanga ji Bibidya javulu. Maji twawabhela dingi kutanga o Bibidya Tradução do Novo Mundo da Bíblia Sagrada mukonda itanga o kidi, ki ibhonzo ku itendela, mwala o dijina dya Nzambi.—Tala o milongi ya jw.org ni dyambu “O Kwila o Jimbangi ja Jihova Ala ni Bibidya ki Idifu ni ji Bibidya Jengi?”

IHI IWADILONGO

Phala kukatula dingi mbote mu kitangelu kya Bibidya, dyanga kusamba phala kutendela o ima iwandatanga, mukusuluka, pelepalala o madisá ande dya kudilonga.

Kubhitulula

• Ihi yandakukwatekesa kukatula dingi mbote mu kudilonga o Bibidya?

• Kithangana kyebhi ki wa wabhela dingi kutanga ni kudilonga o Bibidya?

• Mukonda dyahi kima kyambote kupelepalala o madisá ande dya kudilonga?

TOKWESA DINGI

Bhitulula o jindunge jitena kukukwatekesa kukatula dingi mbote mu kitangelu kyé kya Bibidya.

“Kiebhi ki u Tena Kukatula Mbote mu Kitangelu Kia Bibidia” (O Mulangidi No. 1 2017)

Dilonge jindunge jitatu ja kutanga o Bibidya.

“O Bibidya Ingikwatekesa Kyebhi?—Mandu ya 1: Tokwesa Kyambote o Bibidya yé” (Milongi ya jw.org)

Tala kyebhi ki utena kubwabhela dingi kutanga o Bibidya.

“O Bibidya Ingikwatekesa Kyebhi?—Mandu ya 2: Kyebhi ki Utena Kuwabhela Dingi o Kitangelu Kyé Kya Bibidya?” (Milongi ya jw.org)

Kayela o jindunge ja athu ene mutanga kya o Bibidya mu mivu yavulu.

Milongi ya Zongo ya Bibidya (2:06)