O Kuila a ku Tele Kiá Makutu?

O KIMA kia beta o ku bhonza, o kuijiia kuila o muthu uene ku mu dielela, uene mu ku tangela makutu. Nange eie u divuua kia iibha, mba u tema. O makutu a bhuisa o ukamba, o ukaza; o athu a ta makutu, a nhana jimidi ja kitadi.

Kienhiki, xinganeka kiebhi ki ueji divua, mu kuijiia kuila ene mu ku tela makutu alungu ni Nzambi. Se eie u mukua kixikanu, nange u divua kia iibha kála o jifiiele jiji, jambe:

● “Nga mono kuila o ngeleja ia ngi tela makutu.”—DEANNE.

● “Nga kexile ni njinda. Mukonda nga mono kuila akexile mu ngi nganala—o kidielelu kiami kia kexile kia ngó.”—LUIS.

Nange u dituna kuila a ku nganala ia lungu ni Nzambi. O mak’â Nzambi u uejiia, nange a ku longo nau ku muthu ua mu dielela, ka mesenene ku ku luualesa—nange o athu enhá, o jitata jê, o mutuameni ua ngeleja, mba kamba diê dia kazola. Nange saí milongi i uene mu xikina tundé ukulu. Uejiia kuila né muene o milongi iejiia ku mundu uoso i tena ku kala ia makutu? O muthu uexile muendexi mukua Amerika, Franklin D. Roosevelt ua xikinine ué o kidi kiki, kioso kiambe: “O kuzuela veji javulu o kima, ki ki bhangesa kuila o makutu, a kala kidi.”

Kiebhi ki u tena ku kijiia kuila a ku tela makutu? Saí kizuua Jezú uambe kua Nzambi mu musambu: ‘O maka mê ene o kidi.’ (Nzuá 17:17) O mak’â Nzambi, o Bibidia, ala ni milongi ioso i tua bhindamena phala ku tungula o kidi, mu makutu.

Mukonda diahi ki kuehela kuila o Bibidia, i kulondekesa o milongi itanu ia makutu ia lungu ni Nzambi? Eie ua-nda mona kuila o kuijiia o kidi, ki tena ku lungulula o ukexilu ua muenhu uê, phala mbote iê.