Di Longe o Mak’â Nzambi

O Ji-anju ji tu Bhanga Ihi?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii n’eie.

1. A nanhi o ji-anju?

O ji-anju athu mu nzumbi a tungu ku diulu. O ji-anju ka sokela ni athu mu ngongo. O Nzambi ia kidi, nzumbi ué, ua bhange o ji-anju ande dia ku bhanga o ixi. (Jobe 38:4, 7; Matesu 18:10) Jihova a mu kondoloka ku mazunda ni mazunda a ji-anju ja fiiele.—Tanga Jisálamu 103:20, 21; Daniiele 7:9, 10.

2. O kuila o ji-anju ji kuatekesa o athu?

O ji-anju ja kuatekesa o diiala dia fiiele a mu ixanene Lote. Muéne ua tungile ku mbanza ia mesenene Nzambi ku buika mukonda athu kuenhoko exile athu a iibha. Anju jiiadi ja dimuna Lote ni muiji uê phala ku lenga. Saí athu ka bhanene valolo ku kitendelesu kiki. Maji Lote ni an’ê kiiadi, a a bhulula mukonda a belesela o kitendelesu kia Nzambi bhu kaxi ka ji-anju.—Tanga Dimatekenu 19:1, 13-17, 26.

Kala ki zuela o Bibidia, o ji-anju, ji kuatekesa o athu lelu mu kikalakalu kia ku tula o njimbu iambote ia Utuminu ua Nzambi. (Matesu 24:14) O njimbu iambote, ia lungu ni ku dimuna athu. Kála kia dimuna Lote, íii ki njimbu ia ku tonoka kana. O njimbu íii ia tundu kua Nzambi bhu kaxi ka ji-anju.—Tanga Dijingunuinu 1:1; 14:6, 7.

Nzambi u tena ku tumikisa ji-anju phala ku tu suínisa kioso ki tu dibhana ni ibhidi. Muéne ua tumikisa anju phala ku suínisa Jezú.—Tanga Luka 22:41-43.

Nzambi ua-nda tumikisa ué ji-anju—phala ku jibha o athu a iibha ene mu bheka o jiphaxi mu ngongo. Ua-nda bheka o ku tululuka ku mundu uoso.—Tanga 2 Tesalonika 1:6-8.

3. O madimonho a bhanga ihi ku athu?

Kála o athu ene mu bhukumukina Nzambi, a bhanga ima ia iibha mu ixi, kiene kimoxi ué ni ji-anju javulu ku diulu a bhukumukina ué Nzambi. (2 Phetele 2:4) O ji-anju ja bhukumuka, a exana madimonho. O ia beta-kota, Satanaji o Diabhu. Satanaji ni madimonho mê, ene mu nganala o athu.—Tanga Dijingunuinu 12:9.

Satanaji uene mu nganala o athu mu mauenji, ku mautuminu, ni ku jingeleja ja makutu phala ku bhangesa o athu ku bhukumukina Nzambi. Satanaji muéne uala ni kikuma kia ima ioso ia iibha iene ku mundu, o usuéia, o ujibhangânga ni hadi mu ngongo.—Tanga 1 Nzuá 5:19.

4. Kiebhi o madimonho kia nganala o athu?

Satanaji uene mu nganala athu avulu bhu kaxi ka ilongesu ia kuila o athu afú kiá, a kituka jinzumbi, a tena kuzuela ni athu ala ku muenhu. Maji o Bibidia i longa kuila, o athu afú kiá ka tena ku bhanga kima. (Ndongixi 9:5) Maji o madimonho ene mu nganala ué o athu mu ku fikisa o dízui dia muthu uafú kiá. (Izaia 8:19) O madimonho a nganala ué o athu bhu kaxi ka uanga, ni kuzambula. O Mak’â Nzambi a tu tendelesa kueha o ima íii. Kienhiki tua tokala kueha o ima ioso i tuala na-iu ia lungu ni madimonho mba uanga.—Tanga Matendelelu 18:10, 11; Ikalakalu 19:19.

Se tua zolo Jihova, ki tua-nda kala ni uôma ua madimonho. Kioso ki tu di longa o Mak’â Nzambi, tu belesela o itendelesu iê, tu zoka ni Diabhu, tu zukama dingi kua Nzambi. Jihova muéne ua beta mu kutena, o madimonho ndenge. O ji-anju jê ja fiiele, ji tena ku tu bhana nguzu mu ithangana i tu mesena.—Tanga Jisálamu 34:7; Tiiaku 4:7, 8.

Phala kuijiia dingi, tanga o kibatulu 10 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?