O Mavuua—Alondekesa Kuila Nzambi Muthu ua Iibha?

IHI IENE MU ZUELA O ATHU: “Nzambi muéne ua mu tumina o mundu, kienhiki, muéne uene mu bheka o mavuua; kiki kilombolola kuila, muéne muthu ua iibha.”

IHI I ZUELA O BIBIDIA: “O mundu uoso-phe ua zeka mua Kadiaphemba ió mukua ku tondalesa.” (1 Nzuá 5:19) Nanhi-phe “kadiaphemba?” O Bibidia i zuela kuila, Satanaji. (Matesu 13:19; Marku 4:15) O kuila tuala ni phata? Tu xinganeke hanji: Se Satanaji uala ni kutena kua ku tumina o mundu uoso, kiki kilombolola kuila muéne u fuinhisa luímbi ku athu kala kiala muéne. O kuila tu diuana mu ku mona o athu ku zanga o ixi? Jingijiie javulu amba kuila o ku kamba ku langa kiambote, ku tena ku bheka mavuua avulu, mukonda dia ima ia bhanga.

Kienhiki mukonda diahi-phe Nzambi uehela Satanaji ku tumina o mundu? O kitambuijilu kia kibhuidisu kiki, ki tu lembalesa kioso o jitata jetu ja dianga kia bhukumukina mu ku dituna o Ungana ua Nzambi. Athu avulu lelu ene uá mu kaiela o ukexilu ua jitata jetu ja bhukumukine. O ukexilu iú ua ku dituna o ungana ua Nzambi—uene mu bhangesa o athu mu ngongo ku kala bhu maku a nguma ia Nzambi, Satanaji. Jezú uexana Satanaji, “sobha ia mu tumina mu ngong’umu.” (Nzuá 14:30) O kuila Satanaji ua-nda tumina katé ku hádia ni hádia? Kana!

Maji, Jihovaa u divua kia iibha ku hadi ioso iene mu bhekela Satanaji ku athu mu ngongo. Kienhiki, Nzambi u divua kia iibha kioso kia mona o athu ku tala hadi. Mu kifika, ia lungu ni jithembu ja bhonzo ja bhitile na-ju akua Izalaiele, o Bibidia i zuela ia lungu ni Nzambi: “Mu lamba diâ dioso ni muene uevile dilamba.” (Izaia 63:9) Mu henda iê, Nzambi ua bhange kima phala ku zubha o ungana ua iibha ua Satanaji—kua-nda laleka kana! Muéne ua solo Mon’ê, Jezú Kristu, phala ku kala Sobha iambote phala ku tumina katé ku hádia ni hádia.

KIEBHI KIA KU TOKALA O MAKA ENHÁ: Sumbala o utuminu ua Satanaji kene mu tena ku langa o athu, Jezú mu utuminu uê ua-nda tena ku bhanga kiki. Saí kizuua, Jezú ua lange o maxibulu mê mu kitembu kia dikota. O Bibidia i zuela: “Muène . . . u kidika o kitembu, hé u ambela o menha, uixi: Batamenu mu dixibhe! Kitembu anga ki batama, kuma ku kala ku tululuka kua nzungule.” O maxibulu a mu ambela, exi: “Mukua-hi muene u kala kiki, u bhinga ni kitembu ni mabhuku ma mu belesela?” (Marku 4:37-41) O kizulukutu kiki, ki tu bhana kidielelu kia kuila, Jezú ua-nda langa o athu oso mu Usobha uê.—Daniiele 7:13, 14.