Nanyi-phe Wala Ni Kikuma?

Se-phe Nzambi ki mwene wala ni kikuma, nanyi wala ni kikuma kya ima yayibha i twene mu mona kala, o jiphaxi, kufwa, wadyama, ita, mawuhaxi ni mavuwa? O Mak’a Nzambi, o Bibidya i tu tangela ima itatu yene mu bhekela o hadi mu ngôngo:

1. O Athu Azodi a Jivondadi jâ, a Vula Lwimbi, a di Zembe. “Muthu u kala mu kutumina mukwá phala ngó ku mu sengulula.” (Ndongixi 8:9) Mu veji javulu athu a a talesa hadi mukonda a mu tumina ki athu a yuka, akwa lwimbi, athu abhumu.

2. O Ibatu ni Izulukutu i moneka mu Ithangana ki tu i Kingila. O athu a tala hadi ithangana yoso, mukonda “o ibatu ni jithembu ja tokala ene oso.” (Ndongixi 9:11) Kifwa o athu nange a kala mu kithangana kya bhonzo ni kidi ki kya tokala, mu ku landuka a sasumuka kilwezu kya bhixila.

3. Wa mu Tumina o Ngôngo Kadyaphemba. O Bibidya i londekesa mu ukexilu wa bhebhuluka o kikuma kya jiphaxi ji bhita na-ju o athu. Yene yamba: “o mundu woso-phe wa zeka mwa Kadyaphemba.” (1 Nzwá 5:19) O “Kadyaphemba” yú Satanaji Dyabhu, muthu mu nzumbi wala ni kutena kwavulu. Kudimatekenu wexile anju yambote ya Nzambi, maji “ka nangenena mu kidi.” (Nzwá 8:44) Ji anju ja mukwa, ja dibundu ni Satanaji yá a bhukumukina Nzambi, phala kukayela o jivondadi jâ jayibha; mu kusuluka a dibhange madimonyo. (Dimatekenu 6:1-5) Tundé kizuwa kya bhukumuka, Satanaji ni madimonyo-mê ene mu kwendesa ni kufunyisa o wendelu wa ima mu ngôngo yiyi, kotelele kya mwene mu izuwa yetu. Kindala, Dyabhu wala ni njinda yavulu, kyenyiki wa “mu nganala o mundu woso.” Kiki kya bhekela ‘dilamba mu ngongo.’ (Dijingunwinu 12:9, 12) Mu kiki, Satanaji kingulungumba kya kambe henda. Mwene u sanguluka mu kumona o athu a mu tala hadi. Mu kiki-phe Satanaji mwene wa mu talesa o hadi ku athu—ki Nzambi kana.

XINGANEKA: Muthu wa ibha muxima, mukwa phulu, mwene ngó u tena kutalesa hadi ku athu kala ni kikuma. Maji-phe, ki kyene o kifwa kya Nzambi. O Bibidya izwela: “Nzambi henda.” (1 Nzwá 4:8) Mukonda dya ukexilu wê wa henda, “Nzambi ka tena kubhanga kyayibha! O Muteni-ya-yoso ka tena kubhanga mangonya!”—Jobe 34:10.

Mu kiki, nange u tena kudibhwidisa: ‘Thembu kuxi Nzambi Muteni-ya-yoso wa-nda kwehela Satanaji kusuluka ni utuminu wê wa ujibhangânga?’ Kala ki twa mono, Nzambi wa zembe o kuyibha. Kyoso ki tu tala hadi, ku muxima wê ku mu kata. Kyenyiki-phe o Maka mê a tu tangela: ‘Héle yenu yoso xilenu-yu Nzambi, kuma mwène wa mi kwatela mwanyu.’ (1 Phetele 5:7) Nzambi wa tu zolo, wala we ni kutena kwa kuzubha o jiphaxi joso, kala kya-nda jimbulula o milongi ya-nda kayela.a