IBHUIDISU IA BIBIDIA IO TAMBUIJILE

O kuila o Ituxi ietu a tena ku i loloka?

Kala kilondekesa o Bibidia, athu oso mu ngongo akua ituxi. Tua lundula o kituxi ku diiala dia dianga, Adá. Mu kiki, saí ithangana tu bhanga ima ia iibha, i tu bhangesa ku diela ku pholo. O Mon’a Nzambi, Jezú Kristu, ua futu o kituxi mu kufuá bhu kididi kietu. O sata iê ia ku kula, iene ia bhangesa o ku tu loloka. Ujitu ua Nzambi.—Tanga Loma 3:23, 24.

Saí athu a ta ituxi ionene, ene mu dibhudisa se Nzambi u tena muene ku a loloka. O Mak’â Nzambi a zuela: ‘O manhinga a Jezú, o Mon’ê, a tena ku zelesa o ituxi ioso.’ (1 Nzuá 1:7) Jihova ua mesena ku tu loloka, né muene o ituxi ionene, se tu kala ni ukexilu uambote ua ku diela o kituxi.—Tanga Izaia 1:18.

Ihi i tua tokala o ku bhanga phala ku tu loloka?

Se tua mesena kuila Jihova u tu loloka, tua tokala ku di longa ia lungu i muéne—kuijiia o jinjila jê, ku xikina o milongi iê, ni ku xikina o ijila iê. (Nzuá 17:3) Jihova mu henda iê, u loloka oso a diela o ituxi iâ, ni ku lungulula o ukexilu uâ ua iibha.—Tanga Ikalakalu 3:19.

O ku tu xikina kua Nzambi, ki kima ki bhonza. Jihova uejiia kuila tu akua ituxi. Muéne mukua henda, muthu uambote. O henda iê ki i ku bhangesa ku di longa dingi ia lungu ni kiebhi ki u tena ku bhanga o ima i mu uabhela?—Tanga Jisálamu 103:13, 14.