Nzambi Ua Kuijiia

MUKONDA DIAHI ATHU ALA NI PHATA: Athu avulu a banza kuila, Nzambi u mona ngó o athu kala akua ituxi​—a xidi, ka tokala ku a suua. Mu kifika, Kendra ua tolokele o muxima, ua divuile kia iibha, mukonda ka tenene ku belesela kiambote o itumu ia Nzambi. Mukonda dia kiki muéne uambe: “Ki ngi kexile dingi mu samba.”

IHI I LONGA O MAK’Â NZAMBI: Jihova kene mu tala o ukexilu uê ua ituxi, muéne uejiia kuila u mukua ituxi. O Bibidia izuela: “Mbata uejiia kioso kia tu sokejeka, u lembalala kuma tuala tu mavu.” Muéne ué “ka tu bhanga kala kia fuama mu ikuma ietu,” maji muéne u tu loloka kioso tu diela o ituxi ietu.—Jisálamu 103:10, 14.

Banza ku phangu ia Davidi uexile sobha ia Izalaiele, a mu tange mu dimatekenu dia milongi íii. Kioso muéne kia sambe kua Nzambi, muéne ua zuela: “Mesu mé ma ngi mono mukutu uami, kioso ngó kiluua u di umba; o idiandu iami ua isoneka mu divulu dié . . . Nzambi ngi solokote, u ng’ijiie muxima moxi.” (Jisálamu 139:16, 23) Davidi uejidile kuila né muene se ua tele kituxi kia dikota—Jihova ueji tena ku tala ku muxima uê ni ku mona kuila muéne ua diele o ituxi iê.

Jihova ua beta-kota ku kuijiia kiambote, o athu ndenge. O Bibidia izuela: “Mbata o muthu u tala kídifua kia kanga, Jihova-phe u tala ku muxima.” (1 Samuuele 16:7) Nzambi uejiia o ima i ku bhangesa o ku lueza—o jitata jê, kiebhi kia ku sase, ni kifua kiê. Muéne u bhana valolo ku nguzu i u bhanga phala ku kala muthu uambote né muene se u lueza.

Mukonda dia Nzambi ku ‘kuijiia kiambote,’ kiebhi muéne kiene mu ku kuatekesa?