O Kuila o Jikidistá a Tokala Kubheza Nzambi mu Ididi Ikôla?

ioso jimidi ni jimidi ja athu ku mundu uoso ene múia mu Kikolo kia Shima mu ixi ia Japão. Ene aia ku Kididi Kikôla Kia Dikota kia Ise, bhuala o nzambi ia muanha a mu ixana Amaterasu Omikami, nzambi ia ngeleja ia Xintoísmo, ene mu mu bheza mu midi jiiadi ja mivu. Kia dianga o abhezi a di zelesa kiambote, a sukula o maku ni dikanu. Mu kusuluka emana bhu pholo ia kididi kikôla mba kididi kia ubhezelu, anga a fukama, a beta o maku mu kuximana, a sambela o nzambi ia muhatu.a O ngeleja ia Xintoísmo iehela o abhezi’ê kubhanga dingi ima ia mukuá, amoxi akua Budista ni ió amba kuila Jikidistá ni athu a mukuá, amba kuila ki kima kia iibha kukaiela o ijila ia Xintoísmo ni kusambela mu kididi kiâ kikôla.

Jingeleja javulu ku mundu uoso jala ni ididi ikôla,b ndumba ni ndumba dia athu ene múia mu ididi íii mu kusota o dibesá. Mu jixi muala athu amba kuila Jikidistá, muala jingeleja javulu ni ididi ikôla moxi diâ phala kubhezela Jezú, Madiia ni jisandu. Ididi ia mukuá ikola a i tunga bhuoso bhua bhiti “madiuanu” ni bhuoso bhua bhakela imbamba iokulu ia lungu ni ngeleja. Athu avulu aia ku ididi ikola mukonda ene a xikina kuila o misambu iâ a-nda i xikina dingi kua Nzambi se a i bhanga mu kididi kikôla. A mukuá amba kuila, o kuia mu kididi kikôla o kima kia dikota ki tena kubhanga o muthu phala kulondekesa kuila uala ni kixikanu kia dikota kua Nzambi.

O kuila o misambu ietu a i ívua dingi se tu i bhanga mu ididi ikôla? O kuila Nzambi ua uabhela dingi o athu aia mu bheza mu ididi ikôla? O kuila o Jikidistá a tokala kubheza Nzambi mu ididi ikôla? O itambuijilu ia ibhuidisu íii ia-nda tu londekesa kiebhi ki tua tokala kumona o ubhezelu mu ididi íii, ia-nda tu kuatekesa ué kuijiia o ubhezelu ua kidi ua uabhela Nzambi.

KUBHEZA “NZAMBI MU NZUMBI NI MU KIDI”

Jezú mu kudikunda ni muhatu mukua Samádia, ua londekesa o ibanzelu ia Nzambi ia lungu ni kubheza mu ididi ‘ikôla.’ Jezú ua kexile muia mu sanzala ia Samádia, uemanene bhu mbandu’a fixi ia menha ia zukamene ni mbanza ia Sikale phala kunhoha. Muéne ua dikundu ni muhatu uejile mu teka menha mu fixi muenhomo. Mu kudikunda kuâ, o muhatu ua tange kua Jezú maka alungu ni ubhezelu ua Jijudé ni ubhezelu ua akua Samádia. Muéne uambe: “Jitata jetu já bhezela jinga Nzambi ku mulundu kuku, maji enu mu Jijudé muambe kuma kididi kia kubhezela Nzambi, mu Jeluzaleme.”​—Nzuá 4:5-9, 20.

O mulundu ua kexile mu tanga o muhatu, o Mulundu ua Ngedizine, uoso uala mu Jeluzaleme phala kubhixila-ku kubhinga kuenda 50 a jikilometu. Ku mulundu koko, akua Samádia a tungile-ku tembulu mua kexile mu bhanga o fesa ia Phasu. Maji mu veji dia kuzuela ia lungu ni ubhezelu uâ, Jezú uambela o muhatu: “Muhatu ngi xikane. Kumbi dí diza, dia bhingi kuila né ku mulundu kuku, né mu Jeluzaleme, ki muene athu mua bhezela Nzambi.” (Nzuá 4:21) Íii ibanzelu iambote benge-benge mukonda ia tundile mu kanu dia muthu uexile Judé! Mukonda diahi o athu keji bheza dingi Nzambi mu tembulu mu Jeluzaleme?

Jezú ua suluka: “Dikumbi dí diza-phe, o diene dia bhixila kiá, dia abhezi a kidi ku bheza Tata mu nzumbi ni mu kidi. Kuma Tata muène uandala abhezi a kala kiki, ni a mu bheze.” (Nzuá 4:23) Mu mivu iavulu, o Jijudé akexile mu mona o tembulu mu mbanza ia Jeluzaleme kala o kididi kia tokalele phala kubheza-mu Nzambi. Mu kiki, ene akexile muia-ku lutatu ku muvu phala kubhana jisata kua Nzambi iâ Jihova. (Makatukilu 23:14-17) Maji Jezú uambe kuila o ima ioso ieji lunguluka, o “abhezi a kidi” eji bheza Nzambi “mu nzumbi ni mu kidi.”

O tembulu ia Jijudé iexile muene inzo ia kidi, iexile mu mbanza ia Jeluzaleme. Maji o nzumbi ni kidi ki tu tena ku ki mona, ki kialé ué kididi bhua tokala kuia o athu. Mu kiki, Jezú ua kexile mu lombolola kuila o Jikidistá ja kidi keji bhinga dingi kukala ni ididi ikôla kála o Mulundu ua Ngedizine, ni tembulu ia kexile mu mbanza ia Jeluzaleme.

Mu kudikunda ni muhatu mukua Samádia, Jezú ua zuela ué kuila “o dikumbi” phala o athu kubheza Nzambi mu nzumbi ni mu kidi dia kexile ‘mu kuíza.’ Kithangana kuxi kieji kuíza o dikumbi didi? O dikumbi diódio dia bhixila kioso Jezú, mu kubhana o muenhu uê kala sata, ua sukisa o ukexilu ua Jijude ua kubheza Nzambi, mba ua sukisa o Kitumu kia Mozé. (Loma 10:4) Maji Jezú uambe ué: “O dikumbi . . . dia bhixila kiá.” Mukonda diahi? Mukonda kuma muéne uexile Mexiia, Jezú ua kexile mu bhongolola o maxibulu eji belesela o kitumu kia tange muéne, kuila: “Nzambi Nzumbi, oso a mu bheza, ki bhinga a mu bheza mu nzumbi ni mu kidi.” (Nzuá 4:24) Ihi-phe ilombolola o kubheza Nzambi mu nzumbi ni mu kidi?

Kioso Jezú kia tange kuila tua tokala kubheza Nzambi mu nzumbi, muéne ua kexile mu lombolola kuila a tokala ku tuendesa kuala o nzumbi ikola ia Nzambi, i tu kuatekesa kutendela kiambote o Mikanda Ikola. (1 Kolindo 2:9-12) O kubheza Nzambi mu kidi, kilombolola kukala ni kuijiia kua kidi kia lungu ni ilongesu ia Bibidia. Mu kienhiki, mu veji dia kubheza Nzambi mu kididi kikôla, Nzambi ua-nda xikina o ubhezelu uetu se uene ua lungu ni ilongesu ia Bibidia ni kuehela o nzumbi ikola ku tuendesa.

IHI I BANZA O JIKIDISTÁ IA LUNGU NI IDIDI IKÔLA?

Kiebhi-phe o Jikidistá kia tokala kumona o ididi ikôla? Mu kuxinganeka mu kitumu kia Jezú kia kuila o abhezi a kidi a bheza Nzambi mu nzumbi ni mu kidi, tua-nda mona kuila o kubheza Nzambi mu ididi ikôla ki iene ni valolo bhu pholo ia Tat’etu ia diulu. O Bibidia i tu tangela ué kuila Nzambi ua iibhila o iteka mu ubhezelu uê. O Bibidia iamba: “O ubhezelu ua iteka lengenu-u,” i zuela ué kuila “o nzambi ja makutu lengenu-ju!” (1 Kolindo 10:14; 1 Nzuá 5:21) Kienhiki, o Jikidistá ja kidi ka tokala kubheza Nzambi mu kididi ki bhangesa o athu kufukamena iteka. Mu kiki, mukonda dia ima i tu sanga mu ididi ikôla, o Jikidistá ja kidi a dituna kuia-mu mu bheza Nzambi.

Maji kiki ki kilombolola kuila o Mak’â Nzambi a mu fudisa o athu kukala ni kididi kiâ kia uabhela dingi phala kusamba, kudilonga mba kuxinganeka. O kididi kia kubhangela-mu o iônge se kia iuka, kia zele, kididi kiambote phala o athu kudilonga-mu o Mak’â Nzambi. Ki kima kia iibha kusoneka o dijina dia muthu ni kizuua kiafu ku thandu’a mbila. Mukonda o kubhanga kiki, kilombolola kuila o muthu ua zolele kiavulu o muthu uafu. Maji kála kia zuela Jezú, kima kia iibha kumona o jimbila kála kididi kikôla phala ku bhanga-mu ubhezelu.

Mu kiki, eie ku bhingi kuia mu kididi kikôla phala Nzambi kuívua kiambote o misambu iê. Nzambi ué ka-nda kubhana dibesá mukonda dia kuia mu kididi kikôla ku mu sambela. O Bibidia i tu tangela kuila Jihova Nzambi, o “Ngana ia diulu ni oxi, ka tena kutunga mu jitembulu jokalakale ni maku.” Maji kiki ki kilombolola kuila Nzambi uala dikanga dietu kana. Tu tena kusamba kua muéne, muéne u tena ku tuívua kuoso-kuoso ku tu samba mukonda muéne “kana muthu ua mu kala dikanga.”​—Ikalakalu 17:24-27.