O kubelesela o Itendelesu Kutena Kubhulula o Muenhu Uê!

MU kizuua kia 26 kia mbeji ia Kaiiadi ka muvu ua 2004, kua bhiti kitungutu kia ixi mu kikolo kia Simeulue kiala mu ixi ia Indonésia. Athu oso a talele mu musanza ua kalunga kioso o ixi ki ia tunguta. Mu kithangana kieniókio, o menha a kalunga a mateka ku sosoloka kiavulu. Bhenhobho athu oso a mateka kulenga ku milundu, ia akexile mu dikola, “Smong Smong!” mu dimi diâ, o kizuelu Smong kilombolola kalemba. Mu kubhita 30 a ithangana, o menha eza ni nguzu ioso ia a kungulula jinzo javulu ni madiembu.

O kalemba koko, kia dianga, ka kungulula o Kikolo kia Simeulue. Maji mu 78.000 ja athu, kuafu-mu ngó 7 dia athu. Sambuadi ngó mukonda diahi?a Mukonda o athu akua Simeulue, ene ni sabhu iamba kuila: ‘Se ua mono o ixi ia mu tunguta ni nguzu iavulu, anga o menha a kalunga a mu sosoloka, lenga ku milundu mukonda kua kambe ngó o kalemba ka-nda bhixila.’ Tundé ukulu, o sabhu íii iene mu kuatekesa o athu akua Simeulue kutena kuijiia se kua mu kuíza kalemba mba kana. O kubelesela o itendelesu íii ia bhulula o mienhu iâ.

O Bibidia i tu tangela kuila kua mu kuíza ‘phaxi ia dikota, kiluua ngó i kala-ku, tundé ku dimatekenu dia’xi katé ni kiki; o ku hádia ué ki ia kà kala-ku dingi.’ (Matesu 24:21) Maji kiki ki kilombolola kuila o Ixi ia-nda jimuka, mukonda dia ikalakalu iene mu bhanga o athu kana, mukonda Nzambi ua mesena kuila o ixi i kalela-ku katé ku hádia ni hádia. (Ndongixi 1:4) Maji Nzambi ua-nda bheka o phaxi íii phala ‘kubuikisa ió oso ene mu buikisa o ixi!’ (Dijingunuinu 11:18; Jisabhu 2:22) Didi dibesá dia dikota!

O kalemba ni itungutu ia ixi iene mu jibha athu oso, kikale athu ambote mba a iibha, maji o kibuikilu kia-nda kuíza ku hádia ki kiene kia-nda bhanga. O Bibidia iamba kuila o Nzambi uávu o dijina dia Jihova, ‘Nzambi ia henda’, muéne ua tange kuila “Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.” (1 Nzuá 4:8; Jisálamu 37:29) Kiebhi-phe ki u tena kubhuluka ku hadi ia dikota ni kutambula o jipolomesa ja tu kanena? O kima ki tua tokala o kubhanga o kubelesela o itendelesu!

KALA KU MESU A ZELE, O IMA KU MUNDU IA MU LUNGULUKA

Ki tu tena kuxinda o kithangana kia-nda bhua o kuiibha ni hadi, mukonda Jezú uambe: ‘Kizuu’okio-phe ni kithangana kiê, kana muthu ua k’ijiia, né ji-anju mu diulu, né o Mona, kikale Tata muène ngó.’ Maji Jezú ua tu suínisa o ‘kudilanga.’ (Matesu 24:36; 25:13) Phala-hi? O Bibidia i tu tangela o ima ieji bhita mu ngongo ioso ande dia Nzambi kubheka o dizubhilu. O athu akua Simeulue ejidile kuila kueji kuíza kalemba, mukonda dia ima ia kexile mu bhita, kiene ué kimoxi lelu, o ima ia mu bhita ku mundu ilondekesa kuila o dizubhilu dia zukama. O kaxa kala ku mbandu ka tanga o izulukutu i tanga o Bibidia ia mu bhita ku mundu uoso.

Mu kidi, saí ima íii io tange mu kaxa ia bhitile kiá m’ukulu. Maji Jezú ua tange kuila mu kumona o “ima ioso iíi” tueji xala mu kuijiia kuila o dizubhilu dia zukama. (Matesu 24:33) Dibhuidise, ‘thembu iebhi o ima ioso ia tange bhabha (1) ia bhiti kiá ku mundu uoso, (2) ia bhiti mu kithangana kimoxi ni (3) o kuiibha kuai ni kudibandekesa izuua ioso?’ Sé phata, ima ioso íii ia mu bhita mu thembu ietu.

O KIKALAKALU KIA KUBOKA KILONDEKESA O HENDA IA NZAMBI KU ATHU

Saí diiala diexile muendexi ua ixi ia Estados Unidos, uambe kuila “o kudimuna o athu . . . kubhulula o mienhu iâ.” Mukonda dia kalemba ka bhitile, o jinguvulu ja te jimakina ji dimuna o athu mu kididi mua bhitile o kalemba, phala kafué dingi athu ku hádia. Kiene kimoxi ué, Nzambi ua bhange kima phala kudimuna o athu ande dia kubheka o dizubhilu. O Bibidia iambe: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.”​—Matesu 24:14.

Ku muvu ua tundu-mu, o Jimbangi ja Jihova a ngastala 1.9 ia mazunda a ji ola mu kuboka o njimbu iambote mu 240 ja jixi ni mu 700 a madimi ndenge. O izulukutu ia mu bhita mu izuua íii, polova ia dikota ia kuila o dizubhilu dia mundu dia zukama muene. Mukonda dia kuzola o athu, o Jimbangi ja Jihova a bhanga ioso phala kudimuna o athu kuila o kizuua kia Nzambi kufundisa o athu kia mu zukama ni lusolo. (Matesu 22:39) O kuijiia o ima íii ilondekesa kuila Jihova mu kidi ua ku zolo kiavulu. Lembalala kuma Nzambi “ka mesena kuila ku kala muthu u texika, mbata ua mesena ene oso eza mu kudiela.” (2 Phetele 3:9) O kuila ua-nda belesela o itendelesu ia Nzambi ia henda?

LENGELA KU MULUNDU UA JIHOVA!

Lembalala kuila o athu akua Simeulue a lengele ku milundu ia dilekele kinene kioso kia mono o menha a kalunga a mu sosoloka; ene k’emana phala kumona o kalemba kana. Mu kubhanga kiki, ene a bhuluka. Phala kubhuluka ku kibuika kiala ku pholo, eie ua tokala ué kifua kulenga ku milundu. Kiebhi ki u tena kubhanga kiki? O polofeta Izaia a mu tumu kuixana o athu, katé lelu ‘mu izuua ia kà sukidila-ku,’ mu tuala a mu kuixana hanji o athu kuila: “Zenu tu bande ku mulundu ua Jihova . . . phala a tu longese kioso kiene o jinjila jê nda tuendele mu jihoka jê.”​—Izaia 2:2, 3.

O kubanda katé ku thandu dia mulundu, kubhangesa o muthu kukala mu kididi kia kondama. Kiene kimoxi ué, o kuijiia kiambote o jinjila ja Nzambi mu kutanga o Bibidia, kua mu kuatekesa athu avulu kukala ni ukexilu uambote ku mienhu iâ. (2 Timote 3:16, 17) Mu kubhanga kiki, ene a mateka o kuenda “mu jinjila ja Nzambi,” anga a sanguluka kiavulu, Nzambi u a langa.

O kuila ua-nda banda ku mulundu ua Jihova ni kutambula o kikuatekesu kia Nzambi ia henda mu izuua íii ia bhonzo? Tua ku dióndo, dilonge o ima i tanga o Mikanda Ikôla iala mu kaxa, ia mu londekesa o izulukutu ilondekesa kuila tuala mu “izuua isukidila-ku.” O Jimbangi ja Jihova mu diembu diê a-nda sanguluka kiavulu mu ku ku kuatekesa kutendela kiambote o Mikanda Ikola ni ku i kumbidila ku muenhu uê. U tena ué kusanga o itambuijilu ia ibhuidisu iê mu kujikula o kijimbuete kietu, www.jw.org/kmb. Ndé ku mbandu iambe ENSINOS BÍBLICOS > PERGUNTAS BÍBLICAS RESPONDIDAS.