Kyoso ki tu Funda Muthu wa Kazola

“Ki ngi tenene kubhanga kima phala kota dyami kàfwe. Mu kubhita jimbeji, nga kexile mu kata mukonda dya kuxinganeka kota dyami, nga kexile mu divwa kala a mu ngi xuka phoko ku muxima. Sayi ithangana, nga kexile mu kala ni njinda yavulu. Mukonda dyahi kota dyami wafu? Nga ditatele mukonda ki ngi bhitile-nê ithangana yavulu kyoso kya kexile ku mwenyu.”—Vanessa, mu ixi ya Australia.

EYE SE wa fundu kyá muthu u wa zolo, nange wa divwile we kyá ni kikote mba wa divu ubheka sé kikwatekesu. Nange wexile ni njinda, wa ditatela mba wa kexile ni wôma. Nange wa dibhwidisa kyá se o mwenyu wala mwene ni valolo.

Se wa mu kwivwa ndolo ijiya-kyu kuma ki kima kyayibha kana, ne mwene se o ndolo yiyi ki ya mu bhité. Kiki kilondekesa kwila eye wa zolele kyavulu yó wafu. Maji o kwila u tena kusanga kikwatekesu phala kusosolola o ndolo ni kikote kyé?

KYEBHI AMOXI KYENE MU TENA KUKOLOKOTA

Se u mona kwila o ndolo yé yedi kála ki ya mu bhwa, kayela o jindunge jiji:

DILA

Athu kene mu dila mu ukexilu ni mu ithangana imoxi. Maji o kudila ku tena ku ku kwatekesa kusosolola o ndolo. Vanessa, a mu tumbula ku dimatekenu, wambe: “Ngexile ngó mu dila; nga mesenene kusosolola o ndolo ku muxima.” Sofía, wa fundu phang’yê ya muhatu, wambe: “Kwa bhonzele kyavulu kubanza mu ima ya bhitile, kya difwangana ni kutumba o fidila. O ndolo i vula dingi, maji i bhangesa o fidila kwiluka.”

ZWELA NI AKWENU YA LUNGU NI IXINGANEKU YÉ NI KYEBHI KI WA MU DIVWA

Sayi ithangana, eye u mesena kukala ubheka wé. Maji o kukala ubheka kwa difwangana kuzangula kimbamba kya neme ubheka wé. Jared wala mu 17 dya mivu, wa fundu tat’ê, wa dilembalala: “Eme nga zwela ni akwetu ya lungu ni kyebhi ki ngexile mu divwa. Manyi se nga tena mwene kuzwela yoso i ngexile mu divwa, maji nga divu kyambote mu ku zwela o ixinganeku yami ku akwetu.” Janice, a mu tumbula ku dimatekenu dya Mulangidi, wa tange mbote yéngi: “Tu divwa kyambote kyoso ki tu zwela ni akwetu. Nga mono kwila ene a ngivu, ki nga divu dingi ubheka kana.”

XIKINA KIKWATEKESU KYA AKWENU

Sayi dotolo wambe: “O muthu wa fundu ndandu se ku dimatekenu wehela o jindandu mba makamba ku mu kwatekesa mu kithangana kya ndolo, muthu yú u tena kudivwa kyambote ni kukolokota.” Eha makamba mé kwijiya se bhebhi bhwa tena ku ku kwatekesa; mu kidi, ene a mesena ku ku kwatekesa, maji nange kejiya se ihi i wa bhindamena.— Jisabhu 17:17.

ZUKAMA DINGI KWA NZAMBI

Tina wambe: “Kyoso mwadi wami kyafu ni uhaxi wa kisongo ku izavu, eme ki ngi tenene dingi ku mu tangela o ibanzelu yami, mu kiki nga kexile mu tangela yoso kwa Nzambi! Kuma ki kukya, nga kexile mu bhinga kwa Nzambi phala ku ngi kwatekesa kubhita kyambote o kizuwa. Eme nga mateka kubhinga o kikwatekesu kyê. Nzambi wa ngi kwatekesa mu mawkexilu avulu ki ngi tena ku a tumbula.” Tarsha, wexile ni 22 kya mivu kyoso manyâ kyafu, wambe: “O Bibidya ya ngi kwatekesa kudivwa kyambote mu izuwa yoso. Ya ngi kwatekesa kuxinganeka mu ima yambote, ima i swinisa.”

XINGANEKA KU DIFUKUNUKINU

Tina wa suluka mu kuzwela: “Ku dimatekenu, o kidyelelu kya difukunukinu ki kya kexile ku ngi kwatekesa, mukonda nga bhindamene ngó mwadi wami— twana twami twa mesenene kumona tata yâ mu kithangana kyenyokyo. Maji kwa bhiti kyá mivu iwana, kindala nga dikwatenena ku kidyelelu kiki. Kifwa o kidyelelu kiki mbangala yami. Ngi xinganeka ku mu mona dingi lwa mukwa, kubhanga kiki ku ngi bhekela paze ni kusanguluka!”

Eye nange kwa-nda divwa kyambote mu kithangana ni mbandu. Maji o izwelu ya Vanessa, i tena ku ku kwatekesa. Mwene wambe, “Eye u banza kwila nuka wa-nda tena kukolokota, maji bhofele-bhofele o ndolo ya-nda sosoloka.”

O ngunzu i wa mu kwivwa ku muxima nange ki ya-nda bhwa, maji né kiki ijiya-kyu kuma o mwenyu wala ni valolo. Mukonda dya henda ya Nzambi eye u tena kusanguluka mu kukala ni makamba a kazola ni kusanguluka ku mwenyu. Ku hádya Nzambi wa-nda fukununa yó afu kyá. Mwene wa mesena kwila eye u dindwakuna ni ndandu jé. Bhenyobho, o ndolo yé ya-nda bhwa katé ku hádya ni hádya!

Jivelusu ja Bibidya ji Tena Ku ku kwatekesa

Nzambi u suwa o jindolo jé ni masoxi.

Sayi musoneki wa Bibidya wambe: “O masoxi mami moso, eye wa a bhake mu kisudi mba mbinda yé; manyi, ni mu divulu dyé, kwa a soneka-mu?” —Jisálamu 56:8.

Eye u tena kuzwela kwa Nzambi yoso ya ku kala ku muxima.

“Nga mu tangela mwene o dilamba dyami dyoso . . . Nga dikola-phe ko kwé, u Jihova,a ngixi: Eye-mwène u dilengelu dyami.”—Jisálamu 142:2, 5.

Eye u tena kukala ni kidyelelu.

“Kuma hádya kukala difukunukinu.”—Ikalakalu 24:15.

Nzambi wa kanena kwila wa-nda fukununa o athu afu kyá, ni kidi kyoso mwene wa-nda kikumbidila.b—Jobe 14:14, 15.

a Jihova o dijina dya Nzambi kala kyo tumbule mu Bibidya.

b Phala kwijiya dingi ya lungu ni difukunukinu, tala o disá dya 30 dya divulu Sanguluka Katé Kuhádya ni Hádya! a di bhange ku Jimbangi ja Jihova mba u tena wé ku di katula mu www.jw.org.