Kyoso ki Kubhita Mavuwa

“Ku dimatekenu ki twejidile se tu bhanga kyebhi. Mukonda yoso i twexile na-yu yó bwike mu menya a mvula ni mu malowa.”—André, Serra Leoa.

“Kyoso kya bhite o kitembu kya dikota, twa vutuka ku mabhata metu. Ki kwa subhuka kima. Ki twa tenene kuzwela. Mon’ami wa muhatu wa fukama yú wa mateka o kudila.”—Davidi, Ikolo ya ixi ya Virgínia.

EYE SE wa bhiti kyá mu mavuwa, wejiya kyoso kya mu divwa akwenu a bhiti wâ mu ima kala yiyi: eye u kala ni njinda, ndolo, eye u fika kwila nzoji ngó i wa mu lota, u thandanganya. Athu avulu a bhiti mu mavuwa, ka kala dingi ni nguzu mba kidyelelu ku mwenyu.

Se wa mu bhita mu mavuwa eye we nange u divwa kwila mwenyu wabhu. Katé mwene u tena kubanza kwila kota se u fwa. Maji-phe o Bibidya i jimbulula kwila, o mwenyu wé wala ni valolo, ni kwila u tena kudyelela kuma ku hadya o mwenyu wa-nda kala kyambote

O KWIJIYA O KIDI KYA BIBIDYA KUBHEKELA KUSANGULUKA KU MWENYU

O divulu dya Ndongixi 7:8 dyamba: “O ku mona disukilu dya ima kota, kwindi dimatekenu dyê.” Kyoso o divuwa ki dibhita, ima yoso ku mwenyu i kala kála ya diboto, ki kwala dingi kidyelelu. Maji se u kala ni mwanyu wa kuyudika o ima ku mwenyu wé, o ima bhofele-bhofele i kala kyambote.

O Bibidya ya kanena o kithangana “kà kèvwa-mu dingi mbimbi ya kudila, mba nzôngo ya ku di-kola.” (Izaya 65:19) O kikanenu kiki kya-nda dikumbidila kyoso o Utuminu wa Nzambi wa-nda bhangesa o ixi ku kituka palayízu. (Jisálamu 37:11, 29) Ki kwa-nda kala dingi mavuwa. Ima yoso yayibha ya bhiti, ki twa-nda i lembalala dingi katé ku hádya ni hádya, mukonda o Nzambi Muteni-a-Yoso wa kanena: “O ima ya bhiti kyá ki bhu kala dingi ku i banza, né ngó kwiza mu kilunji, lémbwa.”—Izaya 65:17.

Xinganeka: O Mubhangi wa kanena “ngi mi bhane dizubhilu di mwene ku kinga”—o mwenyu wa paze bhu kaxi ka Utuminu wa Nzambi. (Jelemiya 29:11) O kwila o kwijiya o kidi kiki ki ku kwatekesa kusanguluka ku mwenyu? Sally, a mu tange ku dimatekenu, wambe, “o kulembalala o ima ya katunda ya-nda bhanga o Utuminu wa Nzambi, ku tena ku tu kwatekesa kujimba o ima yayibha i twa bhiti na-yu m’ukulu phala kukolokota mu ima i twa mu dibhana na-yu lelu.”

Sota kwijiya dingi se ihi ya-nda bhanga o Utuminu wa Nzambi phala o athu mu ixi. Mu kubhanga kiki u tena kudyelela kwila, né mwene ni mavuwa u wa bhiti na-wu ku mwenyu, u tena kusanguluka lelu mu kukingila ni hânji yoso o kithangana ki kwa-nda kala dingi mavuwa. Maji mu kithangana kiki, o Bibidya i bhana itendelesu i tena ku ku kwatekesa kuditunda kyambote kyoso ki u bhita mu mavuwa. Tala o ifika yiyi.

Jivelusu ja Bibidya ji Tena ku ku Kwatekesa

Katula kithangana kya soko phala kunyoha.

“Kota o lukwaku lwezala ni kutululuka ni kunyoha, kwindi o maku ene kiyadi kyâ ezala ni ndumba dya ikalakalu ni dilamba dya mwenyu.”—Ndongixi 4:6.

Akwa kutokwesa a zwela kwila kyoso muthu kya bhita mu ima yayibha, “o kukamba kuzeka kyambote ku tena kubandekesa dingi ku maka, kubhonzesa we o muthu kukala ni ixinganeku yambote.” Mu kiki, kima kyambote o kukatula kithangana kya soko phala kuzeka.

Zwela ni muthu kyebhi ki wa mu divwa.

“O kubhindama kwa muxima, kwene mu kubhelesa o muthu; maji mbimbi ya mbote, i mu sangulukisa.”—Jisabhu 12:25.

Zwela ni muthu ku mwiji wé, mba dikamba. Lwa mukwa, mwiji wé ni makamba mé a kazola, mu veji dya ku bhana ngó mátwi mu ima i wa-nda zwela, a tena we ku ku swinisa bhu kaxi ka izwelelu ni ibhangelu.a

Xinganeka ku hádya kyoso ima ya-nda wabha.

“Maji etu-phe, twa kinga, wila kya bhana Nzambi mwène o kizwelu, mawùlu m’obhe, ni oxi i’obhe, mwà tunga ubatwilu wa kuyuka.”—2 Phetele 3:13.

a O muthu wa mu dibhana ni maka kala o njinda mba wala ni hele mu ithangana yavulu wa tokala kusota o asaki.