Sola Kukwatekesa o Utuminu wa Nzambi Kindala!
Xinganeka kwila, kwa mu kwiza kitembwe kya nguzu mu mbanza yé. O Jinguvulu a mu bhana kitendelesu phala o athu kusota kididi kya kondama ni lusolo mba kutunda mu mbanza: “NDENU! SOTENU KIDIDI KYA KONDAMA NI LUSOLO!” Ihi i weji bhanga? Se phata weji sota kididi kya kondama.
Mu kidi, etwenyoso twedi kala twa lungila bhu mbandu bhwa mu kwijila o “kitembwe kya dikota.” Jezú wexana o kitembwe kiki kala “hadi ya dikota.” (Matesu 24:21) Seku kididi bhu tu tena kuya phala kulenga o hadi ya dikota. Maji tu tena kubhanga kima phala kudilanga. Ihi i tu tena o kubhanga?
Mu Diskulusu dya bhange ku Mulundu, Jezú Kidistu wambe: “Mu kiki-phe, dyangenu kusota o Utuminu wa Nzambi ni kuyuka kwê.” (Matesu 6:33) Kyebhi ki tu tena kubhanga kiki?
Dyangenu kusota o Utuminu wa Nzambi. Kiki kilombolola kwila, o Utuminu wa Nzambi wene wa tokala kubeta o kota ima yamukwá ndenge. (Matesu 6:25, 32, 33) Mukonda dyahi? Mukonda o athu ka tena kuzubha o maka oso ene mu dibhana na-u o athu ni akwa. O Utuminu wa Nzambi wene ngó u tena kuzubha o maka oso.
Sota o kuyuka kwê. Twa tokala kubhanga yoso i tu tena, phala kubelesela o ijila ya yuka ya Nzambi ni itumu yê. Mukonda dyahi? Mukonda se ki u belesela anga u sota mudyé kubhanga o ima ya wabha mba yayibha, wíndwa. (Jisabhu 16:25) Ku mbandu ya mukwa, se tu belesela o itumu ya Nzambi twa-nda mu sangulukisa, etu we twa-nda sanguluka.—Izaya 48:17, 18.
Suluka ni kusota o Utuminu wa Nzambi ni kuyuka kwê. Jezú wambe kwila, sayi athu eji landuka mu kubanza kwila o kusota kukala ni kitadi kyavulu kyeji ku a langa. Amukwa, nange mukonda dya kusota kudidikila keji kala ni kithangana kya kusota o Utuminu wa Nzambi.—Matesu 6:19-21, 25-32.
Maji Jezú wa kanena kwila, oso yo a kwatekesa o Utuminu wa Nzambi, wa-nda tambula yoso ya bhindamena kindala ni mabesá ku hádya.—Matesu 6:33.
Sumbala o maxibulu a Jezú ku hama ya dyanga, exile mu dyanga kusota o Utuminu wa Nzambi ni uyukilu wê, ene ka mono o disukilu dya hadi ni ndolo mu izuwa yâ. Maji a a langele. Kyebhi kya a lange?
Ene a belesela o itumu ya yuka ya Nzambi, o itumu yiyi ya a lange mu ibhidi yene mu dibhana na-yu o athu yo kene mu belesela Nzambi. O kixikanu kyâ kya kolo mu kikanenu kya kwila o Utuminu wa Nzambi weji kwiza, kya a kwatekesa kukolokota katé mwene mu ibhidi ya bhonzo. Nzambi wa a bhana “o kutena kusomboka o kutena kwa athu” phala kukolokota mu ibhidi yâ.—2 Kolindu 4:7-9.
O KWILA WA-NDA DYANGA KUSOTA O UTUMINU?
O Jikidistá ku hama ya dyanga a xikina o kitendelesu kya Jezú, kya kudyanga kusota o Utuminu. Ene a boko o njimbu yambote mu ididi yoso mu ixi. (Kolose 1:23) O kwila sayi athu a mu bhanga o kikalakalu kiki lelu?
Sayi! O Jimbangi ja Jihova ejiya kwila o kithangana kya butu, phala o Utuminu wa Nzambi kubwika o mundu yu wa yibha. Mu kiki, ene a bhanga yoso ya tena phala kubhanga o kikalalkalu kya a bhana Jezú: “O njimbu yiyi yambote ya Utuminu wa Nzambi, a bhingi ku i boka mu ngongo yoso, mu kubhana umbangi ku akwa jixi joso, kyene ngó kya-nda kwiza o dizubhilu.”—Matesu 24:14, nwt.
Ya lungu ni njimbu yambote kyebhi ki u divwa? Twa mu ku swinisa kukayela o phangu ya athu ku hama ya dyanga a tungile mu mbanza ya Masedonya ku Beleya. Kyoso kyevu o jimbu yambote ya Utuminu bhu kaxi ka Phawulu, ene “a xikina o mak’â Nzambi ni muxima woso.” Ene ‘akexile mu tokwesa o Mikanda Ikôla izuwa yoso’, phala kumona se o maka akexile mu dilonga exile mwene a kidi, ene a bhange kala kya dilongo.—Ikalakalu 17:11, 12.
Eye we u tena kukibhanga. Mu ku twama kusota o Utuminu wa Nzambi ni kuyuka kwê, eye wa-nda sanga o kididi kya kondama, kusanguluka ni kutuluka kwa kidi ku hádya.