Ximana o Sidivisu iê i ua Tambula
1. Kiebhi athu avulu ku mundu, kia mona o kikalakalu kietu kia kuboka?
1 Athu avulu ku mundu ua Satanaji, a mona o kikalakalu kietu kia kuboka, kala kia “uôua.” (1Ko 1:18-21) Se ki tu di lange, kiki ki bhangesa ku tu luualesa ni ku zozesa o nguzu ietu mu kuboka. (Ji 24:10; Iz 5:20) Mukonda diahi tu ximana o sidivisu ietu ia ku kala tu Jimbangi ja Jihova?—Iza. 43:10.
2. Mukonda diahi, o ukunji a tena ku u ixana ‘kikalakalu ki kola?’
2 O ‘Kikalakalu ki Kola’: O poxolo Phaulu, ua mono o ukunji kála ‘kikalakalu ki kola.’ (Lom. 15:15, 16) Kiebhi o ukunji uetu, ‘kikalakalu ki kola?’ Mu ku bhanga o ukunji kuila “tu jingunza” ‘jikôla’ ja Jihova, ni ku kuatekesa mu ku zelesa o dijina diê. (1 Kol. 3:9; 1 Phe. 1:15) Jihova u mona o kikalakalu kietu kia kuboka kála “sata i tua bhakula,” kienhiki, o ukunji kima kia beta-kota mu ubhezelu uetu.—Jihe. 13:15.
3. Mukonda diahi o sidivisu ietu ia ku boka kijingu kia dikota?
3 O ku boka o njimbu iambote kijingu kia dikota, maji a tolo a bhanga o kikalakalu kiki. O ji-anju a mesenene ku bhanga o kikalakalu kiki, ni kisangusangu. (1 Phe. 1:12) Mu kiki, Jihova ua tu solo etu tu akua ituxi, “tu itutu ia mavu a hatu,” phala o sidivisu íii ia dikota!—2 Kol. 4:7.
4. Kiebhi ki tu tena kulondekesa kuila tua mu ximana o ukunji uetu?
4 Kima Kia Dianga: Mukonda dia ku ximana o kikalakalu kietu kia kuboka, tu mona o ukunji kála, o “kima kia beta-kota” ku muenhu uetu. (Fil 1:10, NW) Mu kiki, tua tokala mu semana joso, tu sota ithangana phala ku boka. O muxiki a mimbu, u ximana o kikalakalu kiê, kia kuimba ku pholo dia mundu uavulu, muéne u di pelepalala kiavulu phala ku di tunda kiambote kioso kia-nda kuimba. Kiene kimoxi ué, etu tua tokala tu di longa ande dia kuia mu ukunji, phala ‘ku longa kiambote o maka a kidi,’ ni ku bhanga ioso phala ku bandekesa o ‘uhete ua ku longa.’—2 Tim. 2:15; 4:2.
5. Nanhi ua uabhela o ukunji uetu?
5 Kana kuehela kuila o kitambuijilu kia iibha kia athu, ki ku luualesa. Lembalala kuma kuene hanji athu avulu mu mbambe ietu, a uabhela o kua kunda. Mu kidi, ki tua mu sota o ku tu ximana ku athu. Kia beta-kota o ku mona kiebhi Jihova kia divua, ni ku uabhela o nguzu ietu i tu bhanga ni ku suína mu sidivisu íii.—Iza. 52:7.