Jihova Uene mu tu Longa Phala o Kikalakalu Kiki
1. Kioso Jihova kia bhana ku athu kikalakalu, ihi i bhanga ué muéne?
1 Kioso Jihova kia bhana kikalakalu ku athu, muéne u a bhana ué kikuatekesu kia tokala n’a tena o ku bhanga o kikalakalu kiki. Mu kifika, kioso Jihova kiambe kua Noué phala ku tunga o álaka, o kima nuka u a ki bhangele, Muéne ua mu zuelela ué kiebhi kia tokalele ku i bhanga. (Dim. 6:14-16) Kioso o mubhidi Mozé kia mu solo phala kuia ku adiakimi a Izalaiele ni kua Falaó, Jihova ua mu kuatekesa: “Eme muene ngi kala ni dikanu dié, ngi ku longesa kioso ki ua kà zuela.” (Mak. 4:12) Kioso ki tu bhanga o kikalakalu kietu kia ku boka o njimbu iambote, Jihova u tu bhana ué kitendelesu kiebhi ki tu bhanga. Muéne ua mu tu longa phala o kikalakalu kiki, mu kaxi ka Xikola ia Ukunji ua Nzambi, ni Kiônge kia Sidivisu. Kiebhi ki tu tena ku katula mbote mu ilongesu íii?
2. Kiebhi ki tu tena ku katula mbote mu Xikola ia Ukunji ua Nzambi?
2 Xikola ia Ukunji ua Nzambi: Tanga ni ku di longa o milongi, ande dia kuia mu kiônge. Kienhiki, tonginina kiebhi o alongexi a mu jimbulula o milongi mu madiskursu mâ, ua-ndaia ni ku di longa kiebhi ki u longa. (Jisa. 27:17) Ambata o divulu diê, Escola do Ministério Teocrático mu kiônge, ni ku kaiela o milongi. Kioso o muendexi ua xikola u bhana milongi kua ió a bhange o mbandu, sola o ji pondo ji ua mesena, ni ku soneka ku jimbambe ja divulu. O ukexilu uambote phala ku katula mbote mu xikola íii, o ku bhanga mbandu. O kuila ua mu diongeka kia ni Jimbangi ja Jihova? (associado) Kioso ki ua-nda tambula mbandu, di iudike kiambote, ni ku belesela o itendelesu i ua-nda tambula. Kioso ki uia mu ukunji, londekesa i ua di longo.
3. Ihi ia-nda ku tu kuatekesa ku katula mbote mu kiônge kia Sidivisu?
3 Kiônge kia Sidivisu: Tua-nda di lembalala kiambote o ji pondo ji tua di longo mu kiônge kiki, mu ku tanga o milongi ni kithangana kia soko, ni ku di iudika phala ku bhana itambuijilu. Se u bhana itambuijilu iofele, ua-nda kala dingi ni uhete ua ku tambuijila. Tala kiambote o ifika, ni ku katula mbote mu ifika íii mu ukunji uê. Bhaka Kikalakalu Kietu kia Utuminu, ki zuela maka enhá, phala ku u kuatekesa ku hádia.
4. Mukonda diahi tua tokala ku katula mbote mu ulongelu u tu tambula mu nzumbi?
4 Kála o ikalakalu ia bhanene kua Noué ni Mozé, o kikalakalu kietu kia ku boka o njimbu iambote mu ixi ioso, kia bhingi nguzu. (Mat. 24:14) Tu tena ku di tunda kiambote se tu dielela kua Jihova, o Mulongexi uetu ua Dikota, ni ku katula mbote mu ulongelu u tu bhana.—Iza. 30:20.