Kibhuidisu mu Kaxa

◼ Ihi ilondekesa se tu xisa o divulu ni muthu?

O kima kia dianga o ku mona se o muthu ua mesena. Se muéne ulondekesa kuila ua mesena, tu tena ku mu xisa Mulangidi ni Despertai!, kamukanda, divulu, mba madivulu a mukua u tua mu bhana. Mu kidi, kiki tu ki mona, katé muene se uala ni kitadi mba kana phala ku satela o kikalakalu kia kuboka ku mundu uoso. (Job 34:19; Dij. 22:17) O kia mukua, ki tua-nda xa o madivulu metu, ni athu ka a uabhela.—Mat. 7:6.

Kiebhi o mukua dibhata ulondekesa kuila ua mesena? O vondadi ia kuzuela n’etu, ilondekesa kuila ua mesena. Kuívua kioso ki tuia ni kuzuela, ku tambuijila o ibhuidisu, ni kuzuela o kibanzelu kiê, kulondekesa kuila ua mesena. Ku kaiela kioso ki tu tanga mu Bibidia, kulondekesa ku xila o Maka a Nzambi. Mu kidi, kima kiambote kuibhuidisa o muthu, se ua-nda tanga o madivulu a tambula. O aboki a tokala ku kala ni unjimu, phala kuijiia se nanhi ua mesena. Mu kifika, kioso ki tu bhana umbangi mu ikoka, ki kima kiambote ku bhana madivulu ku athu oso a mu bhita. Se ki tuala ni uhete phala kuijiia se o muthu ua mesena, kima kiambote ku mu bhana kamukanda.

Kiene kimoxi, o muboki ua tokala ku tambula ngó o madivulu a bhingi phala ku bhanga o ukunji uê, ki mukonda dia uhete uê ua ku satela. O ku satela, ki kulombolola ku futa o madivulu, maji ku kuatekesa o maukexilu oso alungu ni kikalakalu kietu kia kuboka ku mundu uoso. Sumbala tu kala ni kitadi, o ku uabhela o ku bhana, kua-nda tu suínisa ku bhana, i tua mesena mu vondadi ietu, kana mu kijijidiku phala ku kuatekesa o kikalakalu kia Utuminu. (Marku 12:41-44; 2 Ko. 9:7) Kiki, kia-nda tu suínisa ué ku ambata ngó o madivulu u tua bhingi, phala ki tu zange o kitadi kia kilunga.

[Kilombuelelu ku bandu 2]

O aboki, a tokala kulondekesa unjimu phala kuijiia o athu a mesena