O ku Bhana o Tumikanda Tua Lungu ni Lembalasa ia Kufuá Kua Jezú, Ia-nda Mateka mu Kizuua Kia 17 Kia Mbeji ia Katanu
1. Kikalakalu kiebhi kia-nda mateka mu kizuua kia 17 kia mbeji ia Katanu?
1 Kala muvu, o Lembalesa i sidivila phala ku bhana ngolokela ia lungu ni ufuilu ua Jezú. (1 Kol. 11:26) Mu kiki, tua mesena kuila o akuetu a kala kumoxi n’etu, phala kuívua kiebhi Jihova kia tu zolo mu ku tu bhana o ujitu ua kukula (Nzuá 3:16) Ku muvu iú, o kikalakalu kietu kia ku bhana o tumikanda tua lungu ni Lembalasa ia kufuá kua Jezú, ia-nda mateka mu kizuua kia 17 kia mbeji ia Katanu. O kuila eie ua mu bhanga ioso phala ku bandekesa o ukunji uê, mu kithangana kia Lembalasa?
2. Ihi i tu zuela, kioso ki tu bhana o kamukanda?
2 Kiebhi ki Tua-nda Bhanga: Mu ku mona kuila tuala ni kithangana kiofele, ki tu tokala kuzuela kiavulu, mu ku bhana o tumikanda. Tu zuela ngó: “Kiebhi ki uala. Tua mesena ku bhana ku muiji uê o kamukanda kaka, ka lungu ni lembalasa ia kufuá kua Jezú, a-nda ku i bhanga ku mundu uoso, kia Kinda mu kizuua kia 5 kia mbeji ia Kasamanu. A-nda bhanga diskursu dijimbulula o mbote ijila mu kukula kua Kristu, ni ihi ia mu bhanga kindala. O kamukanda kaka, muala o kididi, ni kithangana kia kiônge kiki mu mbanza ietu.” Mu ku bhana o tumikanda mu disukilu dia semana, u bhana ué o madivulu se ki bhana.
3. Kiebhi ki tu tena kuixana athu avulu?
3 Exana Oso u ua Tena: O kikalakalu kietu, o kuixana athu avulu. Mu kiki, exana ué o maxibulu mê, athu a bhingi ku a kunda dingi, jindandu, jikoleka ja kikalakalu, jikoleka ja xikola, jivizinhu, ni athu a mukuá u uejiia. O tufunga a-nda bhana itendelesu phala ku boka mu mbambe ioso ia kilunga. Tuene mu katula mbote mu kikalakalu kietu kia kuboka, kia lungu ni Lembalasa ia Jezú. Kioso o muhatu kia bokona mu kididi kia kubheza, ku muvu ua bhiti, o múkuatekexi ua mu kuatekesa ku sanga o muboki ua mu ixanene. Mu kiki, o muhatu uambe kuila kejidile muthu, ua tambula o kamukanda bhu maku a muboki ua kexile mu boka inzo ni inzo mu kizuua kieniókio, mu kamene.
4. Mukonda diahi tua bhingi ku bhanga nguzu, mu kikalakalu kia lembalasa ia kufuá kua Jezú?
4 Nange saí muthu ua-ndaia, mukonda dia kamukanda ku ua bhana. Se muthu u ku xikina mba kana, o nguzu iê i u bhanga ia-nda bhana umbangi. O tumikanda tu u bhana, tua-nda bhana ngolokela kuila Jezú Sobha iala ni kutena. O ku suína kuê mu kikalakalu kiki, kia-nda londekesa ku athu oso—ni ku athu mu mbambe iê, ni ku aboki, ni kia beta-kota Jihova—kuila eie ua uabhela kiavulu o ujitu ua kukula.—Kol. 3:15.