Maukexilu Atatu a Bandekesa o Uhete uê ua ku Longa
1. Mukonda diahi tua tokala ku bandekesa o uhete uetu ua ku longa?
1 O akunji oso a Jikidistá, alongexi. Se tua mateka ku kunda muthu, kioso ki tuia ni ku mu kuatekesa ku uabhela o kidi, mba tua mu longa dixibulu, o kikalakalu kietu o ku bhana milongi. O milongi i tu bhana, ki kima kioso-kioso ngó. Etu tu mukengeji ua “mikanda ikola,” phala ku bhangesa o athu ku kala ni “unjimu ua ku bhuluka.” (2 Tim. 3:15) Iú, ujitu ua dikota! Tua-nda di longa maukexilu atatu, phala ku bandekesa o uhete uetu ua ku longa.
2. Kiebhi ki tu tena ku longa ni ku bhebhuluka?
2 Ku Longa ni ku Bhebhuluka: Se tuejiia kiambote o maka, tu tena ku mona kuila ki ki bhonzo phala o muthu u tua mu longa. Mu kiki, kioso ki tua mu longa dixibulu dia Bibidia, ki tu tokala kuzuela ima iavulu ki i tokala. Mu veji dia kiki, lombolola o jipondo ja beta-kota. Kuzuela kiavulu, ki kua-nda bandekesa o uhete ua ku longa. (Jisa. 10:19) kua bhingi ku tanga ngó ibatulu ia Bibidia ia tokala. Kioso ki u tanga kibatulu, jimbulula o pondo ia tokala ia milongi. O diskursu dia Jezú ku Mulundu ua Midiva, mu divulu dia Matesu mu kibatulu kia 5 ndu 7, muala ima iavulu ia tokala, muala ifika ilondekesa kuila Jezú ua longo ni ku bhebhuluka kuoso.
3. Valolo iebhi iala na-iu o ifika, ni ifika iebhi ia tokala dingi ku i bhanga?
3 Ku Longa ni Ifika: O ifika i bhangesa o muthu ku xinganeka, ni ku kuatekesa o muthu ku di lembalala o ima. Kana ku banza kuila phala ku bhanga ifika iambote kua bhingi u kala u mu tange a misoso. Jezú ua zuela ifika ki ia bhonzele ku i tendela. (Mat. 7:3-5; 18:2-4) Kuzuela ima ia bhebhuluka a ijiia kiambote ku athu, i longa ué kiavulu. Mu ku xinganeka kiambote, eie u tena ku bhanga ifika ia tokala.
4. Kiebhi ki tu tena ku bhanga ibhuidisu iambote?
4 Ku Longa ni Ibhuidisu: O ibhuidisu i bhangesa o muthu ku xinganeka. Kala ni muanhu kioso ki u bhanga kibhuidisu. Se u bhana ni lusolo o kitambuijilu, kua-nda kijiia se ihi iejiia o dixibulu diê. Se n’a bhana kitambuijilu kia iibha, mu veji dia ku mu luualesa, u tena ku mu kuatekesa mu ku bhanga ibhuidisu ia mukua. (Mat. 17:24-27) Mu kidi, se-kué mulongexi ua iuka. Mukonda dia kiki, o Bibidia i suínisa kuila tua tokala ku tonginina kiambote o ulongelu uetu. Mu ku bhanga kiki, kia-nda bhana mbote ki kale etu ni ió u tuívua.—1 Tim. 4:16.