Kala mu Henda ia Nzambi
1. Mukonda diahi a bhange o divulu ‘Kala mu Henda ia Nzambi’?
1 Tua mu kingila ni kisangusangu kioso ku di longa o divulu ‘Kala mu Henda ia Nzambi’ mu milongi ia Bibidia mu Kilunga, tunde mu semana ia 10 ia Katutu ka 2012! O mukanda ua tumikisa o Kibuka kia Utuminu kua oso a zolo Jihova ua sukina ni izuelu íii: “Tua mesena kuila o divulu didi, di ku kuatekesa ku belesela o milongi ia Bibidia ku muenhu uê, ni ku kala ‘mu henda ia Nzambi, . . . ni ku kinga o muenhu ki uábhua.’—Juda 21.”
2. Mu maukexilu ebhi, o divulu didi dia-nda tu kuatekesa ku muenhu uetu?
2 Ihi iala-mu: Kiebhi o itumu ia Bibidia i di kumbidila mu ima kala íii: ukamba, itonokenu, ku xila o jinguvulu, ífua, ukaza, uzuelelu ni ima ia mukua? O kitongoluelu kietu a tena ku ki fuinhisa mu itumu iala mu Maka a nzambi. (Jisá. 19:7, 8) Kioso ki tuia ni ku tendela o ibanzelu ia Jihova, o ku belesela kuetu ku ima ioso, kua-nda suínisa o vondadi ietu ia ku mu sidivila.— Jisa. 27:11; 1 Nzuá 5:3.
3. Mukonda diahi tua tokala ku bhanga ioso, phala ku bhana itambuijilu mu milongi semana joso?
3 Bhana Itambuijilu: Kioso ki uia ni ku di pelepalala, bhanga ioso phala ku ximana Nzambi bhu kaxi ka mundu uê. (Jihe. 13:15) O kilunga kioso kia-nda di longa kumoxi o divulu didi dia ubhe. O jimbandu jofele ja-nda tu kuatekesa ku di pelepalala kiambote, phala ku bhana itambuijilu sé hele. O itambuijilu ietu io pelepalale kiambote, ia-nda funhisa akuetu mu henda ni ku bhanga o mbote ni ku bhana kikuatekesu phala o milongi i bhite kiambote. (Jihe. 10:24) Ku mbandu iéngi, o kisangusangu kietu kia-nda vula dingi kioso ki tuia ni kulondekesa o kixikanu kietu mu izuelu.
4. Mukonda diahi tua tokala ku kaiela o itumu ia Jihova se ku laleka?
4 Mu usuku uê ua sukina mu ixi, Jezú ua zuela kuila tua tokala ku belesela o itumu ia Jihova phala ku kala mu henda ia Nzambi. (Nzuá 15:10) Ni ki kuatekesu kia divulu ‘Henda ia Nzambi’, tua-nda mesena dingi ku kaiela o itumu ia Bibidia ku muenhu uetu ni ku ‘kala mu Henda ia Nzambi.’—Juda 21