Boka ni Tumikanda, Phala ku Sanzumuna o Njimbu Iambote
1. Kiebhi o mundu ua Nzambi kia kexile mu bhana o tumikanda?
1 O mundu ua Jihova uene mu boka ni tumikanda, phala ku sanzumuna o njimbu iambote. Tundé ku muvu ua 1880, C.T.Russell, ni jiphange jê mu nzumbi, a mateka ku bhanga o Bible Students’ Tracts (Tumikanda tua Adilongi a Bibidia), phala ku tu bhana ku atangi a tokala ku A Torre de Vigia, n’a ji bhane ku mundu. O tumikanda tutu tua kexile ni valolo ia dikota, mukonda dia kiki-phe ku muvu ua 1884 C.T. Russell, ua kuatekesa dingi o kikalakalu kiki, sé ku kingila ku nganhala kima, phala ku suluka mu ku bhanga o kikalakalu kia Utuminu ua Nzambi, o kizuelu “kamukanda” a ki bandekesa ué ku dijina dia Sociedade de Tratados da Torre de Vigia de Sião, lelu a i ixana Sociedade Torre de Vigia de Bíblias e Tratados de Pensilvânia. Ku muvu ua 1918, o Adilongi a Bibidia, a bhana 300 ja mazunda a tumikanda ku athu. Katé mu kizuua kia lelu, o tumikanda tuene mu kuatekesa athu avulu mu ku boka.
2. Mukonda diahi o tumikanda tu bhangesa o athu kuívua o njimbu?
2 Mukonda Diahi o Tumikanda tu Bhangesa o Athu Kuívua o Njimbu: Mukonda mu tumikanda muala jifoto javulu. O njimbu i tu sanga-mu, i suínisa o athu. Ki bhangesa o mukua dibhata ku ka xikina, se ka uabhele ku xikina o mulangidi mba divulu. O tumikanda ki tu bhonzo ku tu bhana, né muene o muboki, a mateka kindala ni an’â ndenge a tena ku tu bhana. O tumikanda ki tu neme phala ku tuambata.
3. Tanga musoso ua bhiti ni eie, mba uala bhabha, ulondekesa o valolo ia tumikanda.
3 Saí jiphange, ejiia o kidi lelu bhu kaxi kamukanda. Mu kifika, saí muhatu ku ixi ia Haiti, ua sange tumikanda mu kikoka. Muéne ua tu bongo iú uambe: “Nga sange o kidi!” Mu kusuka-ku, muéne uai mu Kiônge, ua mateka ku di longa o Bibidia, mu ku suka-ku a mu batizala—mukonda dia ku sanga o Mak’a Nzambi mu kamukanda.
4. Mbambe iebhi i tua mesena o ku suua mu ku bhana o tumikanda mu mbeji ia muvimba?
4 Mu Inzo ni Nzo: Mukonda dia tumikanda ku kuatekesa athu avulu mu kikalakalu kia ku boka, tuene, a-nda kuenda mu ku tu bhana mu jimbeji joso, a-nda mateka ku mbeji ia Kamoxi. Ki tu tokala ngó ku bhana o tumikanda, maji tua tokala ku a longa bhu kaxi ka tumikanda. Se mu kizuua kia dianga muéne ua mesena ku di longa, mba kioso ki tu mu kunda dingi, tu mu londekesa kiebhi ki tu longa o Bibidia ni divulu Bibidia I Longa, mba divulu dia mukuá dia ku di longa. Kiebhi ki tu tena ku bhana o tumikanda mu inzo ni nzo? O tumikanda ki tu difu, mu kiki tua tokala kuijiia ioso iala-mu ande dia ku tu bhana.
5. Kiebhi ki tu tena ku bhana o tumikanda mu inzo ni nzo?
5 O ukexilu uetu ua ku boka, tua tokala tu u sokejeka kiambote kala ki bhinga o mbambe ietu, ni kamukanda ku tua-nda bhana. Tu tena ku mateka mu kuzuela kima, ni ku bhana o kamukanda ku mukua dibhata. O jifoto jala ku thandu dia kamukanda, ji tena ku kuatekesa o muthu ku xikina. Mba tu tena ué kulondekesa tumikanda tua vulu ni ku bhinga o mukua dibhata phala ku sola. Kioso ki tu kalakala mu mbambe muala athu a dituna ku jikula o mabhitu, tu tena ku xisa o kamukanda bhu dibhitu phala o mukua dibhata ku mona o foto ku thandu dia kamukanda, mba tu mu bhinga ku mu xisa kima bhu dibhitu, ni tu muibhula se ihi ia banze. Se o diambu kibhuidisu, tua tokala tu mu ibhuidisa kiebhi o kibanzelu kiê. Mba tu tena ku bhanga kibhuidisu, phala ki mu bhangesa ku zuela kima. Tu tena ku tanga mbandu imoxi ia kamukanda ni mukuá dibhata, ni kibhuidisu ni ku tanga-nê o kibatulu kia Bibidia ni ku bhinga se ua banze kiebhi. Mu ku zubha, tu tena ku mu tangela kuila tua-nda vutuka dingi kizuua kiéngi. Se o kilunga kiene ni ukexilu ua ku xisa madivulu mu jinzo ki muene athu, tu tena ku xisa kamukanda ku mukua dibhata bhu dibhitu, sé kala-bhu.
6. Kiebhi ki tu tena ku bhana o tumikanda mu ikoka?
6 Ku Boka mu Ikoka: O kuila ua bokela kiá ni tumikanda mu ikoka? Saí athu a bhita ni lusolo, kala ni kithangana kia kuzuela n’etu. Kiki ki tu bhonza kuijiia se a mesena muene ku di longa. Mu veji dia ku mu bhana o mulangidi, se ki tuijiia se ua-nda u tanga muene, mukonda diahi ki tu mu bhana kamukanda? Mukonda dia jifoto jala ku thandu dia kamukanda, ni njimbu iambote iala-mu, i tena ku bhangesa o muthu ku tanga o kamukanda mu ithangana iofele. Maji se o athu kala ni lusolo luavulu, tu tena kuzuela nau o maka ala mu kamukanda.
7. Tanga musoso ulondekesa kiebhi ki tu tena ku bhana o tumikanda mu ku boka mu ithangana ioso.
7 Ku Boka mu Ithangana Ioso: Ki ki bhonzo ku boka ni tumikanda mu ithangana ioso. Saí phange ua te tumikanda mu jibela ande dia ku tunda ku dibhata. Kioso kia sange muthu u kalakalela mu diloja, muéne ua mu ambela kuila ua mesenene ku mu bhana kima iú ua mu bhana o kamukanda. Saí dikaza aimu Ixi ia Nova York, ene ejidile kuila eji sanga athu a jixi javulu. Ene ambata o kadivulu Todas as Nações, ni tumikanda tua mukua dingi mu madimi avulu. Kioso kia a tangela kuila saí muthu u zuela dimi diéngi ua kexile mu kikoka, mba ua xikamene bhu mbandu iê mu kididi kia ku nhoha, mba mu inzo ia ku sumbisa o kudia, ene a mu bhana kamukanda mu dízui diê dia uvualukilu.
8. Mu ukexilu uahi o tumikanda tua difu ni mbutu?
8 ‘Kuna Mbutu Iê’: O tumikanda tua difu ni mbutu. O kidimakaji u kuna o jimbutu, kejiia se jimbutu jebhi ja-nda sabhuka. O divulu dia Ndongixi 11:6, dizuela: ‘Kuna mbutu iê mu kimene, lukuaku luê ki lu nhohe, mukonda eie kuijiia se mbutu iebhi ia-nda sabhuka sé íii, mba ioio, mba mbutu joso hádia ji sabhuka bhua moxi.’ Mu kiki, tua tokala ‘ku kala ni kuijiia,’ mu ku boka ni tumikanda.—Jisa. 15:7.
[Foto ku mbandu 3]
Mukonda o tumikanda ku kuatekesa mu ku bhana umbangi, saí jimbeji tua-nda kuenda mu bhana o tumikanda, tua-nda mateka mu mbeji ia Kamoxi