Ibhuidisu Ió Tambuijile

◼ Itendelesu iebhi i bhana o Bibidia ia lungu ni kuzuela mu mutelembe ua kafuetele mu kiônge ni mu ku boka?

“Ima Ioso Iala ni Kithangana Kiê.” (Ndo. 3:1): O mutelembe ua kafuetele u kuatekesa o athu ku di zuelesa ni ku tumikisa njimbu se kithangana ki bhana. Maji, saí ithangana o Jikidistá ka tokala ku lalamana ni mitelembe ia kafuetele. Mu kifika, o iônge i bhana kithangana kia kubheza Jihova, ku tambula milongi, ni ku di suínisa ni jiphange jetu. (Mate. 31:12; Jisá. 22:22; Lom. 1:11, 12) O kuila tu tena ku jika o mutelembe uetu, kioso ki tu bhixila mu kiônge ni ku tanga ngó o njimbu, kioso ki zubha o kiônge? Se ku moneka maka a bhingi ku a batula ni lusolo, tu tena ku jikula o mutelembe ni ku sosolola o dízui.

‘Ima Ioso Ngi i Bhanga Mukonda Dia Njimbu Iambote.’ (1 Kol. 9:23): Saí ithangana, tu tena ku zuela mu mutelembe kioso ki tu kala mu sidivisu ia ku boka. Mu kifika, o phange uala ku pholo mu kilunga, u tena ku mona mu mutelembe ua kafuetele kuebhi kua-nda boka o kilunga. O aboki a tena ku xinda ku muthu ua mesena ku di longa o Bibidia mba dixibulu a bakana phala ku mu kunda, bhenge-bhenge se muéne ua tungu dikanga. Se tuala ni mutelembe, tua tokala ku di langa phala ki u tu fidise kioso ki tu zuela ni mukua dibhata. (2 Kol. 6:3) Se tua mu kinga o aboki a mukuá, mu veji dia ku zuela mu mutelembe ni ku tumikisa njimbu ku makamba metu, ki kima kiambote ku boka ni ku suua o athu u tua mu a tudila o njimbu?

Xila Akuenu. (1 Kol. 10:24; Fil. 2:4): Ki tu tokala ku kala ni ukexilu ua ku bhixila tádidi mu iônge ia kuboka, mu ku banza kuila tu tena ku xinda phange mba ku tumikisa njimbu, phala kuijiia se kuebhi kua mu boka o athu a tokala mu kibuka kietu. Kioso ki tu bhixila tádidi tu thandanganhesa o kikalakalu kia jiphange jetu a di sokejeka kiá. Saí ima i tena ku tu bhangesa ku bhixila tádidi mu kiônge. Maji, kioso ki tu bhixila selu mu iônge, tu londekesa kuila, tua mu xila Jihova, ni phange uala ku pholo ni jiphange ja mukuá.