O Kuila u Tena Ku Lungulula?
1. O ima i bhita ku mundu i tu suínisa ku bhanga ihi?
1 Mu mukanda ua 1 Kolindo 7:31, o Bibidia i sokesa o ukexilu ua iibha ua mundu iú ni funza ia mundu. O ima i bhita ku mundu iú, i tu suínisa ku kala polondo phala ku lungulula o ukexilu uetu ua ku boka, ni kithangana kietu, phala ku longa o athu mu ithangana ioso. O kuila u tena ku lungulula?
2. Mukonda diahi tua tokala ku kala polondo phala ku kaiela o kilunga?
2 O Ukexilu Uê ua ku Boka: O kilunga kia Nzambi, kiene mu lungulula o ukexilu ua ku boka mu ithangana ioso. Kioso Jezú kia tumu o maxibulu mê, ua ambela kuila ka tokalele kuambata mbuenga mba kitadi. (Mat. 10:9, 10) Mu ku bhita kithangana, Jezú ua bhana dingi itendelesu ia mukuá, ku maxibulu mê, ia lungu ni izukutisu ieji dibhana na-iu ku pholo dia kuenda, mu ku boka o njimbu mu jimbanza ja mukuá. (Luk. 22:36) Mu hama ia mivu ku dima, o kilunga kia Jihova, kia kexile ni ukexilu uavulu ua ku bhana umbangi, kála kia tokalele mu kithangana kieniókio, ene akexile mu boka bhu kaxi ka jikalatá ja ku longa, mitelembe ia ifofo ni makalu akexile ni ji koloneta. Lelu, mukonda dia ku bhonza kiavulu ku sanga o athu mu jinzo jâ, ene mu tu tendelesa kiavulu bhu kaxi ka kikalakalu kietu kia utuminu phala ku boka nzo ni inzo, mu ikoka ni mu ithangana ioso. Mukonda dia athu ku kala dingi ku salu iâ mu muanha, ene mu tu tendelesa ku boka nzo ni inzo mu usuku. O kilunga kia Jihova kia mu suluka ku pholo, o kuila eie uala polondo phala ku ki kaiela?—Ize. 1:20, 21.
3. Kiebhi o ku lungulula o ukexilu uetu ua ku longa, ku tu kuatekesa mu ukunji uetu?
3 O Ulongelu Uê: Mu mbanza iê, ima iahi i thandanganhesa dingi o athu? O kuila o uadiama? Maka ku muiji? Mba o ita? Tua tokala kuijiia o ima ia bhindamena dingi o athu mu mbanza ietu, ni tu tene ku pelepalala milongi ia tokala phala ku a longa. (1 Kol. 9:20-23) Kioso o akua dibhata kia zuela o ibhindamu iâ, mu veji dia ku a longa o milongi i tua pelepalala kiá mba ku mu tambuijila ngó, kima kiambote ku lungulula o milongi ia tokala ni ibhindamu iâ.
4. Mukonda diahi tua tokala ku lungulula o ukexilu uetu ua ku longa se ku laleka?
4 Kua kambe ngó bhofele, o hadi ia dikota ia-nda mateka, o “funza” ia mundu ia-nda bhua. “O thembu ia butu.” (1 Kol. 7:29) Kima kiambote ku lungulula o ukexilu uetu ua ku longa, sé ku laleka, ni tu tene ku longa athu avulu mu kithangana kiki!