Kiebhi ki tu Tena ku Pelepalala Milongi ia Tokala Phala ku Zuela ni Athu
1. Mukonda diahi tua tokala ku pelepalala milongi ia tokala?
1 O dizumba dia kudia di bhangesa ku kala ni vondadi ia kudia, kiene kimoxi ué kioso ki tu pelepalala o milongi ia tokala, i bhangesa kuzuela ni muthu ia lungu ni Bibidia. Phala ku lamba o kudia kuambote ku bhinga kithangana, ku bhinga ué ku pelepalala milongi ia tokala. (Jisa. 15:28) Ihi i tua tokala o ku bhanga, phala ku sola milongi ia tokala?
2. Ihi i tua tokala o ku bhanga phala ku sola milongi ia uabhela o athu?
2 Sola Milongi ia Uabhela o Athu: O milongi i tu sola phala ku zuela, ia tokala ku bhangesa o athu ku xinganeka, se ki tu solo milongi ia tokala o mukua dibhata ka-nda mesena kuívua. Mu kiki-phe, kioso ki ua mu di pelepalala, xinganeka mu maka a bhindamena o athu. O kuila o athu a bhindamena unguvulu uambote, ku zediua ku muiji, mba ku bhua kua ita? O athu a uabhela ku zuela o ima ia banza, mu kiki, kima kiambote ku pelepalala kibhuidisu ki bhangesa o muthu ku tambuijila. O kuila u tena ku sola o milongi i tu sanga mu Kikalakalu Kietu kia Utuminu, ni ku sola ia tokala mu mbambe iê? Ki kima kiambote ku fikisa o milongi i ua pelepalala, mu Ubhezelu uê ku Muiji?
3. Kiebhi ki tu tena ku sola o milongi mu ku xinganeka mu ijila ni ídifua ia athu?
3 Xinganeka o Ijila ni Ídifua ia Athu: Saí ididi, o athu a mesena kuijiia se mukonda diahi tua mu a kunda. Mu ididi ia mukuá, se o muboki u zuela ni mukua dibhata se kuijiia sé muéne uala kiambote, o athu ka xikina kua bokela o njimbu. Mu ididi ia mukuá o athu a tokala mu ngeleja, a xikina ku di longa o Bibidia. (Ika. 2:14-17) Ki kale se o athu a tokala mu ngeleja mba kana, kima kiambote ku vutuka kizuua kiéngi phala kua longa o Bibidia, mu veji dia ku mateka kiá kua longa mu kithangana kieniókio.—Ika. 17:22-31.
4. Ihi i tua tokala o ku bhanga kioso ki tu sola o milongi?
4 Izuelu ia Dianga: Pelepalala kiambote o milongi iê. Ki ku bhingi ku zuela kiavulu. Tua tokala ué ku kala ni ukexilu uambote ua ku zuela. Zuela ni ngalasa. Zuela ni kidi kioso, ni ku sanguluka, phala kulondekesa kuila ua mesena o mbote ia mukua dibhata. O ku kaiela o itendelesu íii, ia-nda tu kuatekesa ku sola milongi ia tokala ia-nda kuatekesa o athu mu mbambe ietu kudia ku ‘meza a Jihova.’—1 Kol. 10:21.