Longa o Bibidia ku Athu—a Uabhela Ngó ku Tanga o Madivulu Metu
1. Mukonda diahi o kilunga kia Jihova, kiene mu tendelesa o aboki, ku sota o athu a uabhela ku tanga o madivulu metu?
1 Saí athu ka uabhela ku di longa o Bibidia, maji a uabhela ku tanga o madivulu metu. Mu kiki-phe, o kilunga kia Jihova, kiene mu tendelesa o aboki, ku sota o athu a uabhela ku tanga o madivulu metu. Kioso o athu kia tanga o madivulu metu, mu ku bhita kithangana, a kala dingi ni vondadi ia kuijiia o Mak’a Nzambi. (1 Phe. 2:2) O milongi ia tanga, i tena ku a kuatekesa ku xinganeka, ni kua bhangesa ku xikina ku di longa o Bibidia.
2. Kiebhi ki tu tena ku kuatekesa o athu a uabhela ku tanga o madivulu metu?
2 ‘Tekela’ o Jimbutu ja Kidi: Mu veji dia ku bhana ngó o madivulu, kima kiambote ku zuela bhofele ni muthu, ni ku bhanga n’ê o ukamba. O ku bhanga kiki, kia-nda ku kuatekesa kuijiia o kithangana kia kuzuela ni muthu, ku mu suua, ni ku xila o milongi iê, kia-nda ku kuatekesa ué ku zuela sé hele. (Jisa. 16:23) Di sokejeke, phala ku kunda dingi o muthu. Se kithangana ki bhana, jimbulula pondo ni kibatulu kia Bibidia, phala ku bhangesa o muthu ku kala ni vondadi ia ku di longa. (1 Kol. 3:6) Soneka o kizuua ki ua kundu o muthu, o divulu di ua mu bhana, o maka u ua zuela n’ê, ni kibatulu ki ua jimbulula.
3. Tua tokala ku kunda o athu, a uabhela ku tanga o madivulu metu mu veji ji kuxi?
3 Tua Tokala Kua Kunda mu Veji ji Kuxi? Ua tokala ku mu kunda mu mbeji joso, phala ku mu bhana o madivulu a ubhe. Se u mona ué kuila o muthu ua mesena ku di longa, u tena ku mu kunda mu veji javulu. Mu kifika, se kua bhiti kiá semana imoxi, mba jiiadi, tundé ki tua mu bhana o madivulu, kima kiambote ku vutuka ni ku mu ambela, “Ngeza phala kuzuela bhofele maka ala mu divulu di nga ku bhana.” O ku bhanga kiki, kia-nda kuatekesa o muthu ku kala ni vondadi ia ku tanga o divulu. Se ua tange kiá, kima kiambote ku mu ibhula se ihi ia banza ia lungu ni milongi ia tange, ni ku mu jimbulula bhofele. Maji se muthu ua uabhela kiavulu ku tanga o madivulu, kima kiambote ku vutuka dingi, phala ku mu londekesa kamukanda, kadivulu, mba divulu di ua mu bhana mu mbeji.
4. Ihi i tua tokala o ku bhanga, phala kuijiia se o athu a uabhela ngó ku tanga o madivulu metu, a mesena ku di longa o Bibibidia?
4 Kana ku kingila o muthu ku bhinga ku mu longa o Bibidia. Kima kiambote, se eie u dianga ku mu bhinga. Né muene se m’ukulu ua ditunine kiá, ku di longa o Bibidia, saí ithangana tu tena kulondekesa o mbandu iene mu kuíza mu Mulangidi, iambe “Ibhuidisu ia Bibidia Ió Tambuijile,” ni ku mona se o muthu ua mesena ku zuela n‘eie. Nange u tena ku mu longa o Bibidia, bhu dibhitu dia inzo iê. Maji se ka mesena ku di longa o Bibidia, u tena ku mu bhana o madivilu a ubhe, phala ku kala ni vondadi ia ku di longa.