Kiebhi ki tu Tena ku Kuatekesa o Athu Kejiia ku Tanga Kiambote

1. Ibhidi iahi i tu mona, se o athu kejiia ku tanga kiambote?

¹ O athu kejiia ku tanga kiambote, né muene se a mesena ku di longa, nange a kala ni jisonhi kia mona o Bibidia ni madivulu a mukuá. O ku a bhana o divulu Bibidia i Longa, mu kizuua kia dianga, nange ki bhonza. Kiebhi ki tu tena ku a kuatekesa mu nzumbi? Saí aboki ala ni uhete a tokala ku 20 a jixi ndenge, a zuela ihi iene mu bhanga. O jindunge jâ jiji.

2. Tudivulu tuebhi tu kuatekesa o athu kejiia ku tanga kiambote?

² Se o dixibulu kejiia ku tanga, mba u tanga ngó bhofele, kima kiambote ku mateka n’é mu tudivulu Ívua Nzambi ni Ívua Nzambi u Kale ku Muenhu. Saí muboki ua thembu ioso mu ixi ia Estados Unidos, ulondekesa o tudivulu ku mukua dibhata ni ku muibhula o kadivulu ka uabhela dingi. O filiiale ia Quênia, ia soneka kuila o tudivulu tuiadi tutu, tuene mu kuatekesa kiavulu, mukonda ku África o athu ejidila ku a tangela misoso, ka uabhela ku a bhanga ibhuidisu ni itambuijilu. O muthu ua di longo mu xikola, u uabhela ku di longa bhu kaxi ka ibhuidisu ni itambuijilu, maji ki kiene ki bhita ni muthu ka di longo. Se dixibulu uejiia ku tanga bhofele, saí aboki a uabhela ku mateka ku di longa ni kadivulu Njimbu Iambote ia Nzambi! Poderá Ser Amigo de Deus! mba Divulu Diami Dia Misoso Ia Bibidia.

3. Ihi ia-nda tu kuatekesa ku longa o athu kejiia ku tanga?

³ Ku Ximana: O athu kejiia ku tanga, nange a kala ni jisonhi, a divua kia iibha. Phala ku a kuatekesa ku a longa o kidi, ku bhinga ku a bhana valolo. O athu kejiia o ku tanga, jinjimu, a tena ku di longa. Xila o muthu kejiia o ku tanga, mu londekese o henda. (1 Phe. 3:15) Ene a-nda kolokota o ku di longa, se a mona kuila a mu bhanga ioso phala ku kula mu nzumbi. Londekesa o henda mu ku a ximana.

4. Kiebhi ki tu tena ku suínisa o maxibulu, kejiia ku tanga phala ku pelepalala o milongi?

⁴ Né muene se o dixibulu kejiia ku tanga kiambote, mu suínise ku pelepalala o milongi ia-nda di longa. Saí aboki mu ixi ia África do Sul, a suínisa o maxibulu mâ ku bhinga kikuatekesu ku muiji mba ku dikamba uejiia ku tanga kiambote. Saí muboki mu ixi ia Grã-Bretanha, u suínisa o maxibulu mê ku pelepalala o milongi, mu ku a sobhesa o divulu diê dio pelepalale, n’a mone kuila ki ku bhonzo ku sanga o itambuijilu se a di sokejeka kiambote ande dia ku di longa. Saí phange ia diiala mu ixi ia Índia, u suínisa o maxibulu mê ku tonginina kiambote o ji foto phala ku di longa mu semana ia mukuá ni ku xinganeka.

5. Kiebhi ki tu tena ku kala ni muanhu mu ku longa dixibulu?

⁵ Kala ni Muanhu: Né muene se ua mu longa mu divulu diéngi, jimbulula o ji pondo ja beta kota ku kuatekesa o dixibulu ku tendela o milongi. Mu dimatekenu, nange ku bhinga ku di longa mu 10 mba 15 a ithangana. Kana ku longa milongi iavulu, nange ku bhinga ngó ku di longa makaxi a tolo. Kala ni muanhu se o dixibulu u babajala mu tanga. Mu ku zola Jihova, nange muéne ua-nda kala dingi ni uhete ua ku tanga. Phala ku kuatekesa o dixibulu ku bhanga kiki, mu dimatekenu mu suínise phala kuia mu iônge.

6. Kiebhi ki tu tena ku kuatekesa o athu kuijiia o ku tanga?

⁶ Se o maxibulu ejiia o ku tanga, a-nda kula kiambote mu nzumbi. (Jisá. 1:1-3) Aboki avulu a kuatekesa o maxibulu mâ, mu ku a longa ni kadivulu Aplique-se à Leitura e à Escrita, mu ku katula ithangana, kioso kia zubha o ku di longa. Se o dixibulu u luuala, u tena ku mu kuatekesa mu kulondekesa o ima iejiia o ku bhanga. Mu tangele kuila, Jihova ua-nda besoala o ngunzu iene mu bhanga, mu suínise ku bhinga kikuatekesu bhu kaxi ka musambu. (Jisa. 16:3; 1 Nzu. 5:14, 15) Saí aboki mu ixi ia Grã-Bretanha, a suínisa o maxibulu mâ ku suua mbambe phala ku bandekesa o uhete uâ​—ua kuijiia kiambote o isoneku, ku tanga o ji velusu ja Bibidia, ni ku tanga o madivulu metu ki a bhonzo ku a tendela. O ku kuatekesa o athu o ku tanga ki ku bhingi ku jimbulula o ima ia tokala o ku bhanga, maji ku bhinga ku a suínisa o ku tanga.

7. Mukonda diahi ki tu tokala ku kala ni hele, ua ku longa o athu kejiia ku tanga kiambote?

⁷ Jihova kala ni kathombo ka ió kejiia ku tanga. (Jobe 34:19) Jihova u tonginina o mixima iâ. (1 Mal. 28:9) Kana ku kala ni hele ua ku longa o athu kejiia ku tanga kiambote. Eie uala ni madivulu avulu, phala ku u kuatekesa ku longa. Mu bhita thembu, u tena ku mu longa mu divulu Bibidia i Longa, ni ku kuatekesa o dixibulu ku tendela kiambote o milongi ia Bibidia.