Kiebhi ki Ngi Tena ku di Londekesa kua Jihova?
1. Kiebhi o Bibidia ia sokela ni lumuenu?
1 Uene mu di mona mu lumuenu mu veji ji kuxi? Tuene mu di mona izuua ioso, phala ku mona kuebhi ku tua tokala ku iudika kiambote. O Bibidia ia sokela ni lumuenu. O ku tanga o Mak’â Nzambi, ku tu kuatekesa ku di tonginina, ni kuijiia kiambote Jihova. (1 Sam. 16:7; Tiia. 1:22-24) O Mak’â Nzambi a tena ku ‘tungula o jivondadi ni ibanzelu ia mixima ia athu.’ (Jihe. 4:12) O kuila o ku tanga ni ku xinganeka mu Bibidia, izuua ioso, ku tu kuatekesa ku suínisa dingi ku kala aboki a suína?—Jisá. 1:1-3.
2. Kiebhi o Bibidia i tu kuatekesa ku di tonginina mudietu?
2 Bhanga o Bibidia Kala Lumuenu: O musoso ua Bibidia ua lungu ni jiselevende ja Jihova, u tu longa o ídifua ia mu uabhela dingi. Mu kifika, Davidi ua londekesa ku suína mu ku boka o dijina dia Nzambi. (1 Sam. 17:45, 46) Izaia ua boko ni ku suína mu mbanza ia iibha. (Iza. 6:8, 9) Jezú ua zolele Tat’ê ia diulu, ua monene o ukunji uê kála ujitu ua dikota, ua bokele ni ku suína, mu veji dia ku mona o kikalakalu kála kia neme. (Nzu. 4:34) O Jikidistá ku hama ia dianga, a bokele ni ku suína, a dielele kua Jihova, ka mesenene ku bhuila. (Ika. 5:41, 42; 2 Kol. 4:1; 2 Tim. 4:17) O ku xinganeka mu jiphangu jiji, ji tu kuatekesa ku bandekesa dingi o uhete uetu ua ku boka.
3. Mukonda diahi, ki tu tokala ku laleka ku lungulula o ukexilu uetu?
3 Lungulula o Ukexilu ua Iibha: Ki kima kiambote ku di mona mu lumuenu, sé ku lungulula o kima ki kiala kiambote. Tu tena ku bhinga kua Jihova, phala ku tu kuatekesa ku lungulula o ukexilu uetu. (Jisá. 139:23, 24; Luk. 11:13) Ki tu tokala ku laleka ku lungulula o ukexilu uetu, mukonda o thembu ia butu, o mienhu ia athu iala mu iluezu.—1 Kol. 7:29; 1 Tim. 4:16.
4. Ihi i bhita ni muthu u tanga o Mak’a Nzambi, anga u bhanga kima?
4 Jihova u bhana dingi valolo—ku ukexilu uetu uambote, o ku uabha kuetu ndenge. (1 Phe. 3:3, 4) Ihi i bhita ni muthu u tanga o Mak’a Nzambi, anga u bhanga kima? Muéne “u kala mukua [ku bhanga n’a kumbidila], muenhú Nzambi u mu zediuisa mu ioso ia bhanga.” (Tiia. 1:25) Se tu ‘londekesa o ku bhenha kua Jihova, kala ki bhanga o lumuenu,’ tua-nda sanguluka, ni ku kala tu akunji a suína.—2 Kol. 3:18.