Kaiela o Phangu ia Jipolofeta—Nahumu
1. Ihi i tua di longo mu divulu dia Nahumu?
1 O iphulungunzu ia Ninive ilondekesa kuila kála kia kanene Nahumu, Jihova ua bhângele ni jinguma Jê, né muene ió exile ni kutena, ka tenene ku bhânga Né. (Nah. 1:2, 6) Ku di longa kiambote o divulu dia Nahumu, ku tu kuatekesa mu ukunji.
2. Kiebhi ki tu tena o ku tula o njimbu mu ukexilu uambote?
2 Divulu di Kolokotesa, di Bhana Kidielelu: Mu dimatekenu, o divulu dia Nahumu di moneka kála diala ngó ni ikanenu ia ku fundisa Ninive, o mbanza ia ixi ia Asídia. (Nah. 1:1; 3:7) O ikanenu iê, iezala ni njimbu iambote phala o mundu ua Jihova. Mu kiki, o dijina dia Nahumu dilombolola ‘mukua ku konda malamba,’ di londekesa kuila, o jinguma ja Jijudé eji ku a buika! Kienhiki phala Nahumu, Jihova ua londekesa kuila ‘dilengelu mu thembu ia phaxi.’ (Nah. 1:7) Kioso ki tu boka, tu tula o njimbu iambote, tu suínisa akuetu ku lengela kua Jihova.—Nah. 1:15.
3. Kiebhi ki tu tena ku kaiela o phangu ia Nahumu mu ku longa ni ifika?
3 Longa ni Ifika: Jihova ua tumine Nahumu ku sokesa o kibuikilu kia mbanza ia Ninive ni No-Amone, o mbanza ia Ijitu, a i buikile ku akua Asídia. (Nah. 3:8-10) Kioso ki tu zuela ni athu, ia lungu ni kibuikilu kia mundu iú, kima kiambote ku zuela ia lungu ni ikanenu ia Bibidia, ilondekesa kuila Jihova u kumbidila o izuelu iê ioso. Mu kifika, kioso o akua Babilonha ni akua Mediia kia bhângele ni akua Ninive ku muvu ua 632 A.K.K., o nvula iavulu ia bhangesa o ngiji ia Tigre kuizala, ni ku bhangesa o milundu ionene ku dibhala. O mbanza ia Ninive a i buika kala kia kanene Jihova.—Nah. 1:8; 2:6.
4. Kiebhi ki tu tena ku jimbulula kiambote o maka mu ukunji?
4 Jimbulula Kiambote o Maka: O milongi ia Nahumu a i soneka mu ukexilu ua bhebhuluka. O isoneku iê ki i bhonzele ku i tendela. (Nah. 1:14; 3:1) Etu ué tua mesena ku zuela mu ukexilu ki u bhonzo ku u tendela. (1 Kol. 14:9) Mu kithangana kia dianga jimbulula ia ku bheka. Suínisa o athu u ua mu longa, ku kala ni kixikanu kua Jihova, Maka mê ni ku bhana valolo ia milongi mu ku i kumbidila ku mienhu iá.—Lom. 10:14.
5. Kikanenu kiahi, ki tu sanga mu divulu dia Nahumu?
5 Nahumu ua dielela mu ikanenu ia kidi ia Jihova, kala kilondekesa o divulu dia Nahumu. Kuijiia kuila o dizubhilu dia mundu ua Satanaji dia zukama, tu sanga kikolokotesu mu ikanenu ia Jihova: ‘O phaxi íii ki ia ka tena kuíza luiadi.’—Nah. 1:9.