O Kuila ua mu di Pelepalala Phala o Lembalasa?

Kiexile kizuua kia 13 kia mbeji ia Nizá 33 K.K. Jezú ua kijidile kuila, ió uexile o usuku uê ua sukina ua ku kala ni makamba mê a kazola, ande dia kufuá. Muéne ua mesenene ku bhanga na-u o fesa ia Phasu ni ku bhana itendelesu ia ubhe, phala o Lembalasa ia Kufua Kua Jezú. Phala ku bhanga o fesa íii, kua bhingile ku i pelepalala kiambote. Kienhiki, muéne ua tumikisa Phetele ni Nzuá phala ku pelepalala o ima. (Luka 22:7-13) Mukonda dia kiki, mivu ioso o Jikidistá a tokala ku di pelepalala kiambote, phala o Lembalasa. (Luka 22:19) Ima iahi i tua tokala o ku bhanga, phala ku pelepalala o Lembalasa, ia-nda bhita mu kizuua kia 3 kia mbeji ia Kasamanu?

Kikalakalu Phala o Tufunga:

O tufunga a tokala ku pelepalala o ima, mu Kididi kia Ubhezelu mba kididi kiéngi. A tokala ku ta-mu ialu iavulu, mukengeji ua soko, kua tokala ué, ku bhusa kiambote. O ikalakalu phala ku zelesa o kididi, a tokala ku i bhanga ni kithangana kia soko.
A tokala ku sola mulongexi uala ni uhete, phala ku bhanga o diskursu, muendexi ua kiônge ni jiphange a-nda samba phala ku bhitisa o mbolo ni vinhu.
Se mu kididi kia solo mua-nda bhita dingi iônge ia mukuá, a tokala ku sokeka kiambote o kithangana kia ku bokona ni ku tunda ni kididi kia ku tula o makalu.
A tokala ué ku sola o jiphange a-nda bhitisa o mbolo ni vinhu.
Ku pelepalala o mbolo ni vinhu ia tokala, malonga, jikopho, meza ni dituaia dia fuama.

Kikalakalu Phala o Aboki:

Ku di pelepalala phala ku bhana o tumikanda tua Lembalasa ni ku suína.
Ku soneka o majina a maxibulu, jindandu, jikoleka ja xikola, ja salu ni athu a mukuá phala ku a exana.
Ku tanga ni ku xinganeka mu ibatulu ia Bibidia ia Lembalasa.
Ku kala polondo phala ku sangesa o ajitu a-nda ia mu Lembalasa.