Di Pelepalale Phala Kuia mu Lembalasa ia Kufuá kua Jezú ni Muxima ua Sanguluka
1. O kizuua kia lembalasa ia kufuá kua Jezú kithangana phala ku bhanga ihi?
1 O Lembalasa ia kufuá kua Jezú, ia-nda bhita kia Tersa mu kizuua kia 26 mu mbeji ia Katanu, ia-nda tu bhana kithangana kiambote phala ku sanguluka mu ioso ia bhange Nzambi phala ku tu bhulula. (Iza. 61:10) Né muene ande dia kuia mu lembalasa ia kufuá kua Jezú, o ku sanguluka kua-nda tu kuatekesa ku pelepalala kiambote o muxima. Kiebhi-phe?
2. Ihi ia bhingi phala ku di pelepalala phala o Lembalasa ia kufuá kua Jezú?
2 Di Pelepalale Phala Kuia mu Lembalasa ia Kufuá kua Jezú: O Lembalasa ia kufuá kua Jezú ki fesa ia fuma kana. Maji né kiki, kua bhingi ku di sokejeka kiambote, phala ka jimbe kima kioso-kioso. (Jisa. 21:5) O kididi ni ola a tokala ku ki sola kiá. O mbolo ni vinhu a tokala ku i pelepalala. O kididi a tokala ku ki iuka ni ku ki zelesa kiambote. O mulongexi a mu solo ua tokala ku di pelepalala kiambote, o jiphange ué a-nda sidivila a tokala ku a bhana o itendelesu ia tokala. Mu kidi tuene mu bhanga kiá kiki. Ki tu bhange ngó kiki mukonda kia tokala, maji tu ki bhanga phala ku londekesa kuila tua mu bhana valolo mu sata ia Jezú.—1 Phe. 1:8, 9.
3. Kiebhi ki tu tena ku pelepalala o muxima uetu phala o Lembalasa ia Kufuá kua Jezú?
3 Pelepalala o Muxima: Kima kiambote ku pelepalala o muxima uetu, phala tu tene kuijiia ihi ilombolola o lembalasa ia kufuá kua Jezú. (Eji. 7:10) Phala ku bhanga kiki, tua tokala ku sota kithangana kia ku tanga o kibatulu kia Bibidia kia lungu ni lembalasa ia kufuá kua Jezú ni muiji mba ubheka uetu, ni tu xinganeke o izuua ia sukidila-ku ia ufuilu ua Jezú mu ixi. Se tu bhanga kiki, tua-nda sakidila dingi Jihova mu ku londekesa o henda ku mundu, o henda ia londekesa ué Jezú mu ku di bhakula bhu kididi kietu, ia-nda tu kuatekesa ku bhanga kima kiambote.—Nga. 2:20.
4. Mabesá ahi u tu tambula mu ku tu bhulula kua Jezú?
4 Ande mba kioso ki bhita o lembalasa ia kufuá kua Jezú, o ku xinganeka mu mabesá ejila mu ku tu bhulula, kua-nda tu sangulukisa o muxima. O kufuá kua Kristu ku ximanesa o dijina dia Jihova. Ku tu bhulula ku ituxi ni mu kufuá. (1 Nzu. 2:2) Ku tu kuatekesa ku kala ni ukamba ni Nzambi, ni ku tambula o muenhu ua kalelaku. (Kol. 1:21, 22) Ku tu kuatekesa ué ku kolokota phala ku kumbidila o kikutu kietu ni Jihova kia ku mu sidivila ni ku kolokota mu ku kala tu maxibulu a Kristu. (Mat. 16:24) Mu ku di pelepalala, ni kuia mu lembalasa ia kufuá kua Jezú o kisangusangu kiê kia-nda di bandekesa dingi!