“Bhangenu Jinga Kienhiki”
Lembalasa ia Kufuá Kua Jezú A-nda i Bhanga mu 5 ka Mbeji ia Kasamanu
1. Mukonda diahi o Lembalasa ia kufuá kua Jezú, ia beta-kota?
1 “Bhangenu jinga kienhiki mu ku ngi banza eme.” (Luka 22:19) Ni izuelu íii, Jezú ua tumina o maxibulu mê ku lembalala o kufuá kuê. Mukonda dia ioso ia bhange phala ku bhana o kukula, sé ku kima kia beta dingi kota phala o Jikidistá, o Lembalasa ia ufuilu ua Jezú ndenge. Kioso o Lembalasa ia kufuá kua Jezú ia-nda bhita mu kizuua kia 5 kia mbeji ia Kasamanu i zukama, kiebhi ki tu tena kulondekesa o kisakidilu kietu kua Jihova?—Kol. 3:15.
2. Kiebhi ki tu tena kulondekesa o ujitu uetu mu Lembalasa ia kufuá kua Jezú, mu ibanzelu, mu ku di longa ni mu ku xinganeka?
2 Di sokeke: Tuejiia kuila kioso ki tu mesena ku bhanga kama koso-koso, tu dianga ku di sokeka. Tu tena ué ku pelepalala o muxima uetu mu Lembalasa ia kufuá kua Jezú ni muiji, kala o ku banza mu izulukutu ia bhiti mu izuua ia suku-ko mu ixi, ni ku xinganeka mu maka enhá (Ej 7:10) Mu Calendário ni mu Examine as Escrituras Diariamente, ni ibatulu ia 23-24 ia divulu O Maior Homem ni milongi iala mu Mulangidi ua 1 ua mbeji ia Kauana ka muvu ua 2011 mu jimbandu ja 21-24 mu phutu, muala milongi ia lungu ni muenhu ua Jezú mu ixi.
3. Kiebhi ki tu tena kulondekesa o ujitu uetu mu Lembalasa ia kufuá kua Jezú, mu ku bhanga dingi mu ukunji uetu?
3 Boka: Tu londekesa ué o ujitu uetu, kioso ki tu bhanga dingi mu ukunji uetu. (Luka 6:45) Tua-nda mateka o ku bhana o tumikanda tua lungu ni Lembalasa ia kufuá kua Jezú, mu Sábhalu ia 17 ia mbeji ia Katanu. O kuila ua bhange kiá ioso phala ku kalakala kála muboki ua ithangana ni ithangana? Mukonda diahi ki mu zuela ku ubhezelu uenu ku muiji o maka enhá?
4. Mbote iahi i tua-nda katula mu Lembalasa ia kufuá kua Jezú?
4 Mbote iahi i tua-nda katula mu Lembalasa ia kufuá kua Jezú, ku muvu iú? Kua-nda bandekesa o ku sanguluka ni henda ietu kua Nzambi, mu ku xinganeka mu henda iê mu ku bhana Mon’ê phala ku tu kula. (Nzuá 3:16; 1 Nzuá 4:9, 10) Kiki, ki tu suínisa phala ki tu bhange o vondadi ietu. (2 Kol. 5:14, 15) Kiki, ki suínisa ué o vondadi ietu ia ku ximana Jihova bhu pholo ia athu oso. (Jisá. 102:19-21) Mu kienhiki, o jiselevende ja Jihova ala ni kithangana kia kulondekesa o kisakidilu kiâ, mu Lembalasa ia kufuá kua Jezú mu kizuua kia 5 kia mbeji ia Kasamanu, ‘bhanenu ngolokela ia ufuilu ua Ngana Jezú.’—1 Kol. 11:26.