Ji Falamenda Jetu ja Kulonga
1. Kiebhi o Jikidistá a difu ni muthu, u bhanga ima ni mabaia?
1 O muthu u bhanga ima ni mabaia, u kalakala ni jifalamenda javulu. Saí jifalamenda u kalakala na-ju, phala kubhanga sidivisu ia katunda maji jifalamenda ja mukuá u kalakala na-ju ithangana ioso. O hete u kalakala ni mabaia, uala ni jifalamenda javulu maji saí jifalamenda ja beta o kota. O Bibidia i suínisa o Jikidistá kukala ni uhete mu ukunji, phala ka kale ‘mukalakadi u kala ni jisonhi.’ (2 Tim. 2:15) Jifalamenda jebhi ja beta o kota mu ukunji uetu? O falamenda ia beta o kota, o Bibidia—i tu longa na-iu phala ‘kubhanga maxibulu.’ (Mat. 28:19, 20) Tua tokala ku di suínisa, phala kukala ni uhete ua ‘kulonga kiambote o maka a Nzambi.’ Maji saí jifalamenda ja mukuá ja kulonga, ja tokala kudilonga o Jikidistá joso, phala kukala ni uhete ua kulonga o kidi ku athu.—Jisa. 22:29.
2. Ji falamenda jebhi ji tuala na-ju?
2 Ji falamenda ji Tuene mu Longa Na-ju: O kuila o falamenda ietu o Bibidia ngó? O falamenda ia dianga, phala kulonga o Bibidia o divulu Mu Kidi Ihi i Longa o Bibidia? Kioso ki tu zubha, tu longa ni divulu “Kala mu Henda ia Nzambi,” phala kukuatekesa o dixibulu, kukumbidila o itumu ia Bibidia ku muenhu uê. Mu kiki-phe, tua tokala kukala ni uhete ua kulonga o madivulu enhá. O ji falamenda ja mukuá ji tuala na-ju o tudivulu. O kadivulu Njimbu Iambote ia Nzambi! ka tu kuatekesa kumateka kulonga o Bibidia. Se mu mbambe ietu, saí athu kejiia kutanga mba a zuela dimi ki tuala ni madivulu, tu tena ku a longa ni tudivulu Ívua Nzambi mba Ívua Nzambi ni u Kale ku Muenhu. O falamenda i kuatekesa o maxibulu kuijiia o kilunga kia Nzambi o kadivulu A Nanhi a Mu Bhanga o Vondadi ia Jihova Lelu? O ji vidiu ji kuatekesa kubhanga maxibulu, kála Mukonda Diahi Tua Tokala Kudilonga o Bibidia? Ihi Iene mu Bhanga Bhu Kididi Kia Ubhezelu? Deus Tem Nome? tua tokala kulonga kiambote ni ji falamenda jiji.
3. Kupholo dia kuenda, mu Kikalakalu Kietu Kia Utuminu, mua-nda kuíza milongi, ia-nda tu kuatekesa kubhanga ihi?
3 Kupholo dia kuenda, mu Kikalakalu Kietu Kia Utuminu, mua-nda kuíza milongi, ia-nda tu kuatekesa kukala ni uhete ua kulonga ni jifalamenda jiji. Mu kulonga kiambote ni ji falamenda jiji, tua-nda kaiela o kitendelesu kiki: ‘Dilange eie muéne ni ulongelu uê. Kuata muanhu mu milongi íii; kuma mu kubhanga kiki, ua-nda bhulula eie muéne ni oso a kuívua.’—1 Tim. 4:16.