Kubandekesa o Uhete Uetu mu Ukunji—Kubhana o Divulu Bibidia i Longa

Mukonda Diahi Kima Kiambote Kubhanga Kiki: O falamenda ietu ia dianga ia kulonga, o divulu Bibidia i Longa. Maji ande dia kulonga muthu, tua tokala ku mu bhana o divulu. Mu kiki-phe, etu oso tua tokala ku di suínisa, phala kukala ni uhete ua kubhana o divulu Bibidia i Longa mu ukunji. (Jisa. 22:29) Saí jindunge javulu phala kubhana o divulu didi, o aboki a tokala kusola o ndunge ia a kuatekesa.

Kiebhi ki tu Tena Kubhanga Kiki:

Bhanga kibhuidisu ki bhangesa o muthu kuijiia dingi, phala kulondekesa ku mukua dibhata o kibatulu kitambuijila o kibhuidisu. U tena kusola ibhuidisu i moneka mu dimatekenu dia kibatulu. Kioso ki uivua o kitambuijilu kia mukua dibhata, tanga kibatulu kia Bibidia kia tokala ni ku mu londekesa o kaxi ka lungu ni maka u ua mu zuela ni kujimbulula bhofele.
O ndunge ia mukua, o kulondekesa o mbandu ia dianga phala ku mu bhangesa kukala ni vondadi ni kulondekesa ku mukua dibhata o kitambuijila kia Bibidia mu divulu. Mu kifika, u tena kuzuela o mavuua ene mu bhita ku mundu ni kujimbulula kuila, athu avulu ene mu dibhuidisa o itambuijilu iala mu mbandu ia 3. Mba u tena kuzuela kuila, ua mu kunda o jivizinhu jê, phala ku a tangela maka alungu ni hádia. Mu suka-ku, londekesa o ji fikula jala mu jimbandu 4-5 ni kuibhuidisa “Ikanenu iahi i ua mesena kuila i di kumbidila?” O ndunge ia mukuá, o kuzuela kuila ua mu kunda o athu, phala ku a kuatekesa kusanga o itambuijilu ia beta kota ku muenhu. Mu suka-ku, londekesa ku mukua dibhata o ibhuidisu mu mbandu 6, mu ibhuidise se kibhuidisu kiahi kia uabhela dingi.
Sola ndunge ia bhebhuluka, phala kumateka kulonga o Bibidia. Nange u tena kuzuela: “Tua mu londekesa kiebhi kia longa o Bibidia phala kukuatekesa o jivizinhu jetu. O kuila ua dilongele kiá? [Ehela o muthu n’a tambuijile.] Se uala ni kithangana, nga mesena ku kulondekesa kiebhi kia longa ni Bibidia iê.”

Fikisa o Ndunge Íii mu Mbeji Íii:

Fikisa o ndunge íii mu ubhezelu uê ku muiji.
Se uala mu ukunji, zuela ni aboki ni akuá o ndunge i ua pelepalala. (Jisa. 27:17) Se o ndunge i ua pelepalala ki i bhana, sola iéngi.