Kulonga ni Kadivulu Njimbu Iambote

¹ Kala ki tua dilongo mu Kikalakalu Kietu kia Utuminu ka Kavua, mu jifalamenda joso ja kulonga ji tuala na-ju, tuala ué ni kadivulu Njimbu Iambote ia Nzambi! Tu sanga-mu ibatulu ia Bibidia, phala o mukua dibhata ku i tanga ubheka uê. Né muene o madivulu metu, a a bhange phala kukuatekesa o athu kudilonga ubheka, o kadivulu kaka a ka bhange phala kudilonga ni mulongexi. Kioso ki tu bhana o kadivulu kaka, tua tokala kulondekesa kiebhi kia longa na-ku, phala o mukua dibhata n’a mone o mbote ia kudilonga o njimbu iambote mu Bibidia.—Mat. 13:44.

2. Ihi i tua tokala o kuzuela, phala kubhana o kadivulu Njimbu Iambote?

² Ihi i Tua Tokala Kuzuela mu Veji ia Dianga: Ua tokala kuzuela: “Ngeza kubhata diê, mukonda athu avulu a thandanganha ni hádia. Mudiê, o kuila o ima ku hádia ia-nda lunguluka? [Ehela o muthu n’a tambuijile.] Mu Bibidia tu sanga-mu ikanenu i tu bhana kidielelu. Tala o ibhuidisu i tambuijila o Bibidia.” Bhana o kadivulu ku mukua dibhata, mu bhinge n’a sole kibhuidisu kudima dia kapa. Mu londekese kiebhi kia longa o Bibidia mu kaxi ka dianga ka disá. O ndunge ia mukuá, o kubhanga kibhuidisu ku mukua dibhata mu disá di ua solo, mu londekese kiebhi o Bibidia i tena ku mu kuatekesa kutambuijila, o ibhuidisu bhu kaxi ka kadivulu. Se disa dia solo diala ni vidiu mu Jw.org, saí aboki a ilondekesa kioso kia zuela ni muthu.

3. Jimbulula kiebhi kia longa ni kadivulu Njimbu Iambote.

³ Kiebhi ki Tua Tokala Kulonga Na-ku: (1) Tanga o kibhuidisu kia xikatela, phala kukuatekesa o mukua dibhata kutendela o pondo. (2) Tanga o kaxi. (3) Tanga o ibatulu ia Bibidia ia zendalala, bhanga ibhuidisu ni masunga, phala kukuatekesa o mukua dibhata kuijiia kiebhi kia sanga o kitambuijilu kia kibhuidisu mu Bibidia. (4) Se saí dingi kaxi, bhitulula o pondo ia 2 ni 3. Se saí vidiu iala ni kibhuidisu, ku ilondekesa luua ku mukua dibhata, londekesa-iu kioso ki mu zuela. (5) Mu suka-ku bhanga kibhuidisu ku mukua dibhata, phala kuijiia se muéne ua tendela.

4. Ihi ia-nda tu kuatekesa kulonga ni kadivulu kaka ni uhete?

⁴ Ijiia kiambote o kadivulu kaka. Longa na-ku ithangana ioso, sé kithangana ki bhana. Ande dia kulonga, xinganeka o dixibulu ni mu ukexilu uambote ua ku mu longa ni kibatulu kia Bibidia ki ua tokala o kutanga. (Jisa. 15:28; Ika. 17:2, 3) Kioso ki uia ni kulonga ni kubandekesa o uhete uê, ua-nda mona kuila kadivulu kambote phala kulonga o kidi ku athu!