Kiebhi ki tu Tena ku Kalakala ni Kadivulu Njimbu Iambote ia Nzambi!
O Kadivulu ka Ubhe a ka Bhange phala ku tu Kuatekesa o ku Kunda Dingi ni ku Mateka o ku Longa o Bibidia ku Athu
1. Kadivulu kebhi ka ubhe ku tua tambula mu Kiônge Kia Dikota, “Langa o Muxima Uê!” ka tu kuatekesa o ku kunda o athu ni ku longa o Bibidia?
1 Mu Kiônge Kia Dikota “Langa o Muxima Uê!” tua tambula kadivulu ka ubhe Njimbu Iambote ia Nzambi! ka tu kuatekesa o ku kunda dingi ni ku longa o Bibidia ku athu. O Kadivulu Ihi ia Mesena Nzambi, a ka bhingana ku kadivulu Njimbu Iambote Ia Nzambi, kala ni madisá ka bhonzo. O Kadivulu kaka, a tena ku longa na-ku o athu bhu dibhitu. Mu kiki, o kadivulu Ihi ia Mesena Nzambi, ka kexile mu longa o itumu ia tokala o jikidistá, o itumu ia mukua ia bhonzele phala o athu ku i xikina. O kadivulu kaka ka ubhe, ka zuela o Njimbu Iambote i tu sanga mu Bibidia.—Ika. 15:35.
2. Mukonda diahi a bhange o kadivulu Njimbu Iambote?
2 A ka bhange mukonda diahi? Mukonda jiphange javulu ku mundu uoso ene mu bhinga milongi ia bhebhuluka, i tena ku sunga o athu o ku xikina o kidi ni ku di longa mu divulu Bibidia I longa, o falamenda ia beta-o-kota. Athu avulu kioso kia mona o divulu, ka xikina ku di longa, maji se kadivulu ene a xikina kua longa. Nê muene kiki, o kadivulu ki ka bhonzo phala ku ka lungulula mu madimi a mukua.
3. Kiebhi o kadivulu kaka, ki ka difu ni madivulu a mukua u tuene mu longa-nau?
3 A ka Iudika Kiebhi: Tuala ni madivulu avulu a ku longa, a a iudika mu ukexilu ua bhebhuluka ua kuila o athu a a tanga, a tena ku tendela o kidi né muene sé muthu kua a kuatekesa. O kadivulu kaka ki ka difu. A ka bhange phala o jimbangi ja Jihova ku longa o athu. Mu kiki, kioso ki u ka bhana ku muthu, ua tokala u tanga né mbandu imoxi mba jiiadi. O jimbandu jofele u tena ku mu longa bhu dibhitu diê mba ku salu iê. Mu ku mona kuila o disá dia dianga diambote phala ku mateka, tu tena ué ku mateka disá dioso-dioso dia kadivulu.
4. Kiebhi o kadivulu ka tu kuatekesa ku longa o Bibidia?
4 Tuala ni madivulu avulu, o itambuijilu ia ibhuidisu tu i sanga mu jimbandu ja isoneku. Maji mu kadivulu kaka, o itambuijilu tu i sanga mu Bibidia. Athu avulu a-ndala kua longa o kidi mu Bibidia, ka xikina kua longa mu madivulu metu. Maji o izuelu ia ibatulu ia Bibidia ka i soneka. Kua bhingi ku i tanga mu Bibidia. O ku bhanga kiki ku kuatekesa o muthu kuijiia kuila o ia mu di longa ia Nzambi.—Iza. 54:13.
5. Mukonda diahi kima kiambote ku di pelepalala phala ku longa?
5 Mu kadivulu ki tu sange-mu o ilomboluelu ia ibatulu ioso ia Bibidia. Mukonda diahi? Mukonda a ka bhange phala ku suínisa o dixibulu ku bhanga ibhuidisu, ni ku kuatekesa o mulongexi ku kala ni uhete ua ku longa. Mu kiki-phe, ku bhinga ku di pelepalala kiambote phala ku longa. Kitendelesu: Kana ku zuela kiavulu. Etu tua zolo o ku jimbulula o ibatulu ia Bibidia. Maji tua tokala ku bhinga ku dixibulu dietu n’a zuele ihi ia di longo mu kibatulu kia Bibidia. Mu ku bhanga ibhuidisu ni masunga tu tena ku mu kuatekesa ku tendela o kibatulu kia Bibidia.—Ika. 17:2.
6. Kiebhi ki tu kalakala ni kadivulu: (a) mu nzo ni nzo? (b) phala ku longa o Bibidia bhu dibhitu dia mukua dibhata? (c) ku athu ka xikina Nzambi, ni ku dituna o milongi ia Bibidia? (d) mu ku kunda dingi o athu?
6 Kala ki tuene mu bhanga ni madivulu a mukuá, o kadivulu kaka, tua tokala ku ka bhana mu ithangana ioso-ioso kála ki tuene mu bhana o madivulu a mukuá mu jimbeji joso. Jiphange javulu a-nda sanguluka mu ku longa ni kadivulu kaka bhu dibhitu. Kala ki tua di longo mu kiônge kia dikota, tua tokala ku ka londekesa kioso ki tu kunda dingi o muthu ua mesena ku di longa, “se tu bhanga kiki, tua-nda sanguluka kiavulu mu ku kunda dingi o athu!”—Tanga o kaxa mu jimbandu ja 5-7.
7. Kiebhi ki tua tokala ku longa ni kadivulu?
7 Kiebhi ki tu Longa ni Kadivulu Kaka: Tua tokala ku tanga o ibhuidisu ia xikatela. Mu ku suluka tua tokala ku tanga o kaxi ka mbandu ni ibatulu ia Bibidia ia zendalala. Ni masunga kuatekesa o dixibulu ku tendela o ibatulu ia Bibidia. Ande dia ku matuka bhu kaxi ka mbandu, ebhuidisa o dixibulu o itambuijilu ia ibhuidisu ia xikatela, phala kuijiia se muéne ua i tendela kiambote. Mu kizuua kia dianga kia ku mu kunda, kima kiambote se tu mu longa ngó kitambuijilu kia kibhuidisu kimoxi. Mu ku bhita izuua nange tu mu longa kiá o disá dioso.
8. Kiebhi ki tua tokala o ku tanga o ibatulu ia Bibidia, ni mukonda diahi?
8 O ibatulu ia Bibidia iala ni kizuelu “tanga” iene i tua tokala o ku tanga phala ku tambuijila o ibhuidisu. Mu ku tumbula o kibatulu kia Bibidia, kana ku zuela kuma “Poxolo Phaulu ua soneka” mba “Tala ihi ia kanena Jelemiia.” Mukonda se tu bhanga kiki, o dixibulu ua-nda banza kuila tua mu tanga o izuelu ia athu. Tua tokala ku zuela, “O Maka a Nzambi ambe” mba “Tala ihi ia kanena o Bibidia.”
9. O kuila tua tokala ku tanga o ibatulu ioso ia Bibidia i tu sanga mu kadivulu, kioso ki tu longa?
9 O kuila tua tokala ku tanga o ibatulu ioso ia Bibidia, mba tua tokala ngó ku tanga o ibatulu iamba “tanga”? Se o kithangana ki bhana tu tanga. Mukonda o ibatulu i tu sanga mu kadivulu i tu londekesa o milongi ia Bibidia. Mu ibatulu ioso tu tena ku sanga-mu milongi i tua tokala ku longa. Maji saí ithangana, o dixibulu u ngastala kithangana kiavulu, ka kala dingi ni vondadi mba uhete ua ku tanga, mu kiki tua tokala ku bhinga n’a tange ngó o ibatulu ia Bibidia iamba “tanga.”
10. Kithangana kiebhi ki tua tokala o ku bhana o divulu Bibidia i Longa?
10 Kithangana Kiebhi ki Tua Tokala o Ku Bhana o Divulu Bibidia i Longa: Kioso ki tu sanga muthu ua xikina o milongi ia Bibidia, tua tokala tu sola se tu bhana o divulu Bibidia i Longa, mba tu suluka ni kadivulu Njimbu ia Nzambi. O aboki a tena ku mona kiebhi o kithangana kiambote kia ku bhana o divulu. Se tua bhana o divulu Bibidia i Longa, o kuila tua tokala ku mateka ku dimatekenu dia divulu? Ki kuala kitumu ki tu jijidika phala ku bhanga kiki. Kala dixibulu uala ni uhete ué ua ku tendela o milongi. Maji saí maxibulu a katula dingi mbote se a bhitulula o milongi ia di longo kiá mu divulu Bibidia i Longa.
11. Mukonda diahi tua tokala ku kalakala kiambote ni kadivulu kaka ka ubhe?
11 Ku mundu ua lelu, ki kuene njimbu iambote, maji etu tuala ni ujitu ua ku tula o njimbu iambote—ia kuila o Utuminu ua Nzambi ku hádia ua ka bheka mundu uobhe, bhua ka kala o kuiuka! (Mat. 24:14; 2 Phe. 3:13) Tuejiia kuila oso ene mu kuívua o njimbu íii a xikina mu izuelu íii: ‘Inama iê ku uabha kuahi, ku milundu kuná, ia ió uéza kutula o njimbu ia kubhanduluka, ni kuivisa kioso ki bhulukisa muthu; uéza kuambela Ziione kuila: ‘Nzambi iê muene uala ku ungana!’’ (Iza. 52:7) Tua tokala ku kalakala ni kadivulu njimbu iambote ia Nzambi, ku athu ala ni dinhota dia maka a Nzambi mu ukunji uetu!
[Foto ku mbandu 5]
Ambata o Njimbu ku Athu ka Xikina Nzambi, ni ió a Dituna o Milongi ia Bibidia:
● Saí madiembu, o aboki a mona kuila o ku zuela maka alungu ni “Nzambi” mba ni “Bibidia” o athu ka xikina. Mukonda dia kiki, mu kizuua kia dianga, o aboki a zuela maka a bhindamena o athu, kála o unguvulu uambote, kuebhi kua sanga o milongi phala ku kuatekesa o muiji, ni ihi i tua kingila ku hádia. Nange tu bhana o kadivulu Njimbu Iambote, se tua zuela n’ê kiá kiavulu, phala ku mu londekesa mukonda diahi tu xikina kuila kuene muene Nzambi, ni mukonda diahi tua tokala ku dielela mu milongi ia Bibidia.
[Foto ku mbandu 5]
Múia Nzo ni Nzo:
● Tueza mu ku kunda phala ku ku londekesa o vondadi ia Nzambi phala o athu ku hádia. O kuila ua di bhuidisa kia se ku hádia Nzambi ua-nda zubha o hadi ietu? [Ehela o muthu n’a tambuijile.] O kadivulu kaka ka londekesa kuebhi ku u tena ku sanga o kitambuijila kia kibhuidisu kiki, mu Bibidia. [Mu bhane o kadivulu, tanga bhu kaxi ka mbandu ia dianga, tanga Jelemiia 29:11.] Mudiê, o kuila Nzambi ua mesena kuila tu zediua ku hádia? [Ehela o muthu n’a tambuijile.] O kadivulu kaka phala eie. Mu kizuua kia mukuá tua-nda di longa bhu kaxi ka mbandu ia kaiela phala ku di longa o kitambuijilu kia Bibidia kia kibhuidisu kiki, ‘Kiebhi Nzambi kia-nda zubha o hadi iene mu bhita na-iu o athu?” (Se o mukuá dibhata u kala ni kithangana kia soko mu kizuua kia dianga, tanga bhu kaxi ka mbandu ia kaiela ni ku tanga o ibatulu itatu ia Bibidia. Bhanga ioso phala ku mu kunda dingi ni u zuele n’ê ia lungu ni kibhuidisu kiala bhu kaxi ka mbandu ia kaiadi.)
● “Saí athu a uabhela o ku samba, bhenge-bhenge se ala ni maka. O kuila uene ué mu samba? [Ehela o muthu n’a tambuijile.] Mudiê, o kuila Nzambi uivua o misambu ioso, anga uivua ngó o misambu ia lungu ni vondadi iê? [Ehela o muthu n’a tambuijile.] O kadivulu kaka, ka londekesa o itambuijilu ia Bibidia ia ibhuidisu íii. [Mu bhane o kadivulu, tanga n’ê kumoxi bhu kaxi ka dianga mu disá dia 12 ni ku “tanga” o kibatulu kia Bibidia.] Ki kima kiambote kuijiia kuila Nzambi uala polondo phala kuívua o misambu ietu? Maji se tua-ndala kuma Nzambi uivua o misambu ietu, tua tokala tu muijiia. [Tanga dingi o disá 2, ni u londekese o izuelu ia xikatela.] Se ua mesena xala ni kadivulu kaka, kioso ki nga-nda kuíza, ni tu di longe o itambuijilu ia Bibidia ia ibhuidisu íii.”
● “Ngala bhabha mukonda athu avulu a bhindama, a mesena kuijiia se o mundu iú ku pholo ua-nda kala kiebhi. Mudiê, o mundu iú ua-nda kala kiambote ku hádia? [Ehela o muthu n’a tambuijile.] Athu avulu a diuana kioso kiejiia kuila mu Bibidia muala njimbu iambote i tu bhana kidielelu. O Bibidia itambuijila o ibhuidisu kala íii.” Mu bhane o kadivulu ni u mu bhinge ku sola kibhuidisu kia mu uabhela dingi, ku dima dia kadivulu. Ndé ku disá ni u mu londekese kiebhi ki tua-nda di longa. Bakana-né phala ku mu kunda dingi ni ku mu longa o kibhuidisu kia mukua kia kaiela.
[Foto ku mbandu 6]
Longa o Bibidia bhu Dibhitu dia Mukua Dibhata:
● “Eme ngala bhabha phala ku u tangela o kadivulu kaka ka ku longa na-ku o Bibidia. O kadivulu kaka kala ni 15 ia madisá, ka tena ku u londekesa kiebhi ki u tena o ku sanga o itambuijilu ia tokala mu Bibidia iê. [Mu londekese o kapa ia dianga ni ia sukina ia kadivulu.] O kuila kioso ki u tanga o Bibidia ua mu i tendela? [Ehela o muthu n’a tambuijile.] Ngehele ni ngi ku londekese kiebhi o madisá ka bhonzo phala kua tendela. [Tanga né o kibhuidisu kia 3 bhu disá dia 3, ni u tange o divulu dia Dijingunuinu 21:4, 5. Se ua mesena o kadivulu kaka, ka xale n’eie. Tua mu ku suínisa o ku di longa o Bibidia né ngó mu veji imoxi. Maji se ua ki uabhela, u suluke mu ku di longa. Se ku ki uabhela kuabhu, u bhuile. Ki nga-nda vutuka, tua-nda di longa o disá dia dianga. Tala, tua-nda di longa ngó mbandu imoxi.”
[Foto ku mbandu 6]
Itendelesu ia ku Kunda Dingi:
● Kioso ki tu kunda muthu ua xikina, tu zuela kiki: “Nga sanguluka mu ku di mona dingi luua mukua. Ngeza ni kadivulu kaka, ka bhana o itambuijilu ia ibhuidisu ia tokala ia Bibidia. [Mu bhane kadivulu kamoxi ni u bhinge phala n’a tale ku dima dia kadivulu.] Kibhuidisu kiebhi ki ua uabhela dingi? [Ehela o muthu n’a tambuijile. Jikula o disá dia solo.] Ngehele ni ngi ku londekese kiebhi ki tu sanga o itambuijilu ia Bibidia mu kadivulu kaka.” Londekesa kiebhi kia longa o Bibidia mu ku tanga bhu kaxi ka moxi mba jiiadi ni ku tanga ibatulu ia zendalala. Kiene ki tu mateka o ku longa o Bibidia ku athu! Mu xile o kadivulu ni u bakane né ku vutuka kizuua kiéngi. Kioso ki u zubha o disá, u tena ku mu longa disá diéngi dia solo o mukua dibhata mba u mateka ku dimatekenu dia kadivulu.