Kiebhi ki Tu Tena Kuívua —O Milongi io Ngalavale

¹ Saí athu a uabhela kuívua milongi bhu kaxi ka jw.org, phala kutendela o mak’a Nzambi. (Ndo. 12:10) O kuila eie uevu kiá milongi ió ngalavale? O kuívua o milongi, ku tu kuatekesa kuijiia milongi iavulu mu kijimbuete kietu. Kiebhi o milongi io ngalavale i tu kuatekesa?

2. Kiebhi ki tu tena kuívua o milongi io ngalavala phala etu mba o muiji uetu?

² Phala Etu mba o Muiji Uetu: Kuívua o milongi io ngalavala ia Bibidia, madivulu mba divulu diéngi, kioso ki tuenda njila mba kubhanga kima kioso-kioso, ku tu kuatekesa kungastala kiambote o kithangana kietu. (Efe. 5:15, 16) Tu tena kusola kuívua milongi iavulu io ngalavale mu ubhezelu uetu ku muiji ni ku i kaiela ni divulu dietu. Kuívua milongi io ngalavale i kuatekesa, benge-benge se tua mesena kutanga kiambote mba tua mu dilonga dimi diéngi.

3. Nanhi u tena kukatula mbote ni milongi io ngalavala mu ukunji uetu?

³ Mu Ukunji: O athu mu ukunji uetu kala ni kithangana phala kutanga, nange a xikana kuívua o milongi io ngalavale. Mba tu sanga athu a zuela dimi diéngi a tena kuxikana kuívua o njimbu ia Utuminu mu ‘dimi diâ dia uvualukilu.’ (Ika. 2:6-8) Saí jixi, o kima kia beta o kota o kuívua. Mu kifika, o ijila ia hmong mu ixi ia China, o athu a tanga misoso ku mizangala, ene a bhanga kiki mu ukexilu uambote phala ku a kuatekesa kutendela o misoso. Ku ijila ia África, o athu a uabhela kudilonga bhu kaxi ka misoso.

4. Ibhuidisu iahi i tua tokala kudibhanga, phala kukuatekesa o athu mu ukunji uetu?

⁴ O kuila mu mbambe iê, ki bhana kuxika milongi mu dimi dia mukua dibhata? O kuila o muthu u tena kukatula mbote, se tu mu tumikisa milongi io ngalavale bhu kaxi ka njimbu? O kuila tu tena ku ngalavala milongi, phala ku i ta mu CD ni ku i bhana ku mukua dibhata, ua mesena kuívua ni ku mu bhana divulu? Divulu dioso, kadivulu, tudivulu ni madivulu, u tu katula phala kubhana ku muthu mu ukunji, tua tokala kusoneka mu kamukanda. O milongi io ngalavala a i bhange phala etu kudilonga ni kutula o njimbu ia Utuminu.—1 Kol. 3:6.