Kyebhi ki Tulondekesa o Henda ku Akwetu

Kuma tu ana a diyala dyadyanga, Adá, etwenyoso twatokala kumwiji umoxi. Sumbala o mwiji watokala kudilondekesa henda ni kudixila mudyâ, maji mu izuwa yalelu kyene mubhonza kumona o henda yiyi kumwiji. O kiki kikyene kyamesena o Nzambi yetu yakazola.

IHI IZWELA O BIBIDYA YALUNGU NI HENDA

“Mukwenu u mu zola kala ki wa di zola e’mwene.”—IJILA 19:18.

“Zolenu nguma jenu.”—MATESU 5:44.

IHI ILOMBOLOLA O KUZOLA AKWETU

Mu Maka mê, tala kyebhi Nzambi kyalondekesa kyebhi kikala o henda, mudivulu dya 1 Kolindu 13:4-7:

“O henda i kolokota mu jihadi, i lenduka.”

Xinganeka: Kyebhi ki udivwa kyoso akwenu kyalenduka n’eye ni ku kulondekesa mwanyu, ni kwila kathathamana n’eye kyoso ki ulweza?

‘O henda ki imoneka difuba.’

Xinganeka: Kyebhi ki udivwa kyoso akwenu kya kudyelela mba kakukwatela lwimbi?

O henda “ki yene kusota ngó o kyê.”

Xinganeka: Kyebhi ki udivwa kyoso akwenu kyakala polondo phala kuxila o ibanzelu yé ni kwila ene mu ithangana yoso kadikwatenena ngó mu ima yazwela?

O henda “ki yene kufika ima yayibha.”

Xinganeka: Nzambi wala polondo phala kuloloka o muthu udyela o ituxi yê. “Mwene ka jijila kubazela, kene mu kwila u kutatela phonzo.” (Sálamu 103:9) Etu tudivwa kyambote kyoso akwetu kyatuloloka. Mukiki, twatokala kukala polondo phala kuloloka akwetu kyoso kyalweza.—Sálamu 86:5.

O henda “ki i sangulukila ima i kamba kuyuka i bhita na-yu akwá.”

Xinganeka: Kyoso kitubhita mu ibhidi, kituwabhela kwila akwetu asanguluka ni hadi yetu. Mukiki, etu kitusanguluka kyoso akwetu kya mu tala hadi, né mwene se ene atubhange ima yayibha.

Phala kutambula o mabesá a Nzambi, twatokala kuzola akwetu kabasa kitala, o ixi ya avwalela mba o ngeleja yatokala. Ukexilu umoxi ututena kubhanga kiki, o kukwatekesa yó amubhita mu ibhidi.