WENDELU WA UKIDISTÁ
Minzangala—‘Swine-nu mu Kubhanga Ikalakalu Yambote’
O mukanda wa soneka Phawulu kwa Titu, wa tendelesa kwila o minzangala ya mayala kumoxi ni Titu, a tokalele ku di swinisa mu ‘kubhana phangu mu kubhanga ikalakalu yambote.’ (Ti 2:6, 7) Mu kusuluka, mwene wa zwela kwila Jezú weji zelesa o mundu wa Jihova phala a tene ‘kuswina mu kubhanga ikalakalu yambote.’(Ti 2:14) O ikalakalu yiyi yambote, ya lungu we ni kuboka ni kulonga o Utuminu wa Nzambi. Se eye u munzangala, o kwila, u tena kusidivila kala u muboki wa ithangana ni ithangana mba muboki wa thembu yoso ni nguzu i wala na-yu?—Ji 20:29.
Se eye wa mesena kusidivila kala u muboki wa thembu yoso mba wa ithangana ni ithangana, xinda mu mukanda o izuwa i wa-nda tunda mu kuboka, i ku kwatekesa kutenesa o jyola. (Lu 14:28-30) Mu kifika xinganeka kyebhi ki wa-nda dikila o ibhindamu yé ni kyebhi ki wa-nda tenesa o jyola. Bhinga kikwatekesu kwa Jihova mu musambu. (Jis 37:5) Zwela ni jitata jé ya lungu ni vondadi yé, ya kukala u muboki wa thembu yoso, zwela we ni jiphange ene mu ditunda kyambote mu sidivisu yiyi. Bhanga yoso phala kukumbidila i wa xindi. Ni kidi kyoso Jihova wa-nda besowala o nguzu i wa-nda bhanga mu sidivisu yê!
TALA O VIDYU, BHANA KIJINGU KWA JIHOVA MU UNZANGALA WÉ, MU KUSULUKA TAMBWIJILA O IBHWIDISU YA KAYELA:
Ibhidi yahi yene mu tolola amoxi-mu, phala kusidivila kala muboki wa thembu yoso, ni kyebhi kyene mu bhanga kiki?
Kyebhi o jitata kya tena kukwatekesa o twana twâ kukala aboki a thembu yoso?
Mukonda dyahi kima kyambote kuxinda mu mukanda o izuwa i wa-nda tunda mu kuboka?
Kyebhi o jiphange mu kilunga kya tena kuswinisa ni kukwatekesa o aboki a thembu yoso?
Mabesá ebhi a tambula yó a sidivila kala aboki a thembu yoso?
Kyebhi ki ngi tena kukala ngi muboki wa thembu yoso?