Kyebhi ki tu Tena Kukayela o Jindunge Phala Kubhana Umbangi

Tundé ku mbeji ya Katatu ka 2018, o jindunge phala kubhana umbangi jene mu moneka mu difwe dya dyanga ya Ukexilu wa Ukidistá ni Ukunji Wetu—Milongi Phala o Yônge. Kyebhi ki tu tena kukalakala naju?

Kyoso ki wa mu Bhanga Mbandu: Wa tokala kubhanga o kibhwidisu, kutanga o velusu ni kubhanga o kibhwidisu phala kukunda dingi. Maji, kiki ki kilombolola kwila eye wa tokala kukayela o izwelu yoso ya moneka mu vidyu ya ndunge phala kubhana umbangi. U tena kuzwela mu ukexilu wengi, o izwelu ya kumateka i tena kukala yengi, u tena kujimbulula mu ukexilu wengi, ni ima ya mukwa dingi. U tena we kubhana kadivulu ka bhanga mbandu mu Jifalamenda ja Kulonga, né mwene se sé-ku kitendelesu mu mbandu i wa tambula.

Mu Kuboka: O jindunge ja kuboka a ji bhange phala ku tu kwatekesa. Se o muthu u londekesa kwila wa mesena dingi kwijiya, eye u tena kusuluka mu kuzwela-n’ê mu kukayela o ndunge phala kukunda dingi. Sayi ima u tena ku i lungulula mba u tena kubandekesa-ku kima kyengi. Ndunge yebhi mba velusu yebhi ya kwatekesa dingi o athu mu mbambe yé mu jimbeji ku dima? O kwila bhu wa tungu, o athu a wabhela dingi kwívwa o jinjimbu ja jixi jengi inga ja ixi yé? Kabasa ukexilu u wanda sola phala kukayela o jindunge phala kubhana umbangi, eye wa bhingi kubhanga o ‘ima yoso mukonda dya Njimbu Yambote, phala u tambule-ku mbote yê kumoxi ni akwetu.’—1Ko 9:22, 23.