Etu Twa Zolo Kyavulu Tata Yetu Jihova

1-2. Kyebhi ni mukonda dyahi Jihova wa tu jikwila o njila ya kubhanga mbandu ya mwiji wê?

JIHOVA u twixana phala kubhanga mbandu ya mwiji wê wa abhezi. Kiki kixanu kya katunda! O athu a bhanga mbandu ya mwiji yú, athu adibhakula kwa Nzambi, ala ni kixikanu ku sata ya kukula ya Mon’ê. Tu mwiji wa zediwa. Twa sanguluka ni mwenyu u twala nawu kindala, twa sanguluka we mukonda twala ni kidyelelu kya mwenyu wa kalelaku, ki kale ku dyulu mba mu Palayízu mu ixi.

² Bhu kaxi ka henda yê yadikota, Jihova wa jikula o njila ya kubhanga mbandu ya mwiji wê. (Nzwá 3:16) Etu a tu “sumbu ni swilu.” (1 Kol. 6:20) Bhu kaxi ka sata yiyi, Jihova wa jikula o njila phala tu kale ni ukamba ni mwene. Twala ni ujitu wa kwixana Tatetu, ku Muthu wa beto-kota mu ngongo yoso. Kala ki twa dilongo mu milongi ya tundumu, Jihova mwene o Tata ya beto-kota.

3. Ibhwidisu yebhi i tu tena kudibhanga? (Tala o kaxa “O Kwila Jihova u Ngi Suwa?”)

³ Kala o musoneki wa Bibidya, tu tena kudibhwidisa: “Kiki-phe ngi bhakula kima kyahi kwa Jihova, mu mbote joso jene ku ngi bhanga?” (Jisá. 116:12) Mu kidi, nuka twanda tena kuvutwila mba kufuta Tatetu ya dyulu. Maji o henda yê kokwetu i tu bhangesa ku mu zola we. O poxolo Nzwá wa soneka: “Etu tu zola, Mukonda Nzambi mwène wa dyangela ku tu zola.” (1 Nzwá 4:19) Mu ukexilu webhi u tu tena kulondekesa kwa Tata yetu ya dyulu, kwila twa mu zolo?

ZUKAMA KWA JIHOVA

4. Kala kilondekesa Tiyaku 4:8, mukonda dyahi twa tokala kubhanga yoso phala kukala ni ukamba wambote ni Jihova?

⁴ Jihova wa mesena kwila tu kala tu makamba mê ni kuzuwela nê. (Tanga Tiyaku 4:8.) Mwene u tu swinisa: “Kolokotenu mu kusamba.” Mwene u twívwa mu ithangana yoso. (Loma 12:12) Mwene ka bhwila, wala polondo phala ku twívwa. Etu tu mwivwa mu kutanga o Maka mê, o Bibidya, ni madivulu a tu kwatekesa ku i tendela. Tu mwivwa we kyoso ki tu bhana mátwi mu yônge ya Ukidistá. O ku di zwelesa ithangana yoso ku kwatekesa o mona kuzukama ku jitata. Kyene kimoxi we n’etu. Kuzuwela ni Jihova ithangana yoso ku tu kwatekesa kukala jinga ni ukamba ni mwene.

5. Ihi i twa tokala kubhanga phala Jihova n’a xikina o misambu yetu?

⁵ Banza kyebhi kyene mu kala o misambu yê kwa Nzambi. Jihova wa mesena kwila tu mu tangela mu misambu o ixinganeku yetu ni kyebhi ki twa mu divwa. (Jisá. 62:8) Tu tena kudibhwidisa: ‘O kwila mu kusamba ngene mu zwela kima kimoxi izuwa yoso kala mikanda yo kopiyale, inga ngene mu samba ni muxima woso, kala mukanda u nga soneka ni maku?’ Sé phata, eye wa zolo Jihova, wa mesena kukolesa o ukamba wê ni mwene. Phala kubhanga kiki, wa tokala kuzuwela ithangana yoso ni mwene. Mu tangele kyebhi ki wa mu dívwa, ihi ikusangulukisa ni ihi ikuluwalesa. U tena kudyelela ni kidi kyoso kwila mwene wanda kukwatekesa.

6. Ihi i tu tena kubhanga phala kuzukama kwa Tata yetu ya dyulu?

⁶ Phala kuzukama kwa Tata yetu ya dyulu, twa bhingi kukala jinga athu à sakidila. Tu xikina mu izwelu ya mukwa Jisálamu wa soneka: “Jihova, Nzambi yami, madiwanu mê mavulu m’u wa kalakala, ni mabanzelu mê ma ku tu banza etu; kana-ku dingi muthu tu ku fika-nê; mabanzelu mê se twambe ku a tanga ni ku a tumbula mu dimoxi-dimoxi, ki kwala muthu u tena ku a kwata konda.” (Jisá. 40:5) Etu ki tu divu ngó kwila twa tokala kusakidila, maji tu londekesa o kisakidilu kyetu kwa Jihova mu izuwelu ni mu ibhangelu. Kiki kilondekesa kwila ki twa difu ni athu avulu a izuwa ya lelu. Twa tungu mu ngongo mwala athu akambe o kisakidilu mu ima yoso ya bhange Nzambi. Mu kidi, kima kimoxi kilondekesa kwila twala “mu izuwa isukidila-ku” o athu kukamba o kisakidilu. (2 Tim. 3:1, 2) Etu ki tu tokala kukala ni ukexilu yú!

7. Jihova wamesena kwila tu bhanga ihi ni mukonda dyahi?

⁷ O jitata ka mesa kwila o twana twâ azoka maji amesena kwila, akala makamba. Kyene we kimoxi, Jihova wamesana kwila o twana twê twoso akala ni ukamba mudya. Mu kidi, o henda itwala nayu mudyetu i tu londekesa kala tu Jikidistá ja kidi. (Nzwá 13:35) Etu tu xikina o mukwa Jisálamu wa soneka: “Kima kya fwama, kya di wabhela kyambote, ki u sanga jiphange a takana mu muxima umoxi!” (Jisá. 133:1) Kyoso ki tu zola o jiphange jetu, tu londekesa kwa Jihova kuma twa mu zolo. (1 Nzwá 4:20) Kwala o kuwabha kwa kubhanga mbandu ya mwiji ya jiphange ja mayala ni ja ahatu a ‘di kwatekesa mudyâ, ni ku di xinganeka.’—Efe. 4:32.

LONDEKESA O HENDA YÉ MU KUBELESELA

8. Kala kilondekesa 1 Nzwá 5:3, kyebhi o kima kyadyanga ki tu bhangesa kubelesela Jihova?

⁸ Jihova wa mesena kwila o twana a belesela o jitata jâ, mwene we wa mesena kuma tu mu belesela. (Efe. 6:1) O kubelesela kwetu kwa mu tokala mukonda Mwene o Mubhangi wetu, mwene Udikila o ibhindamu ya mwenyu wetu, mwene wa beto-kota mu kwijiya, o jitata joso ndenge. Maji, o kima kyadyanga ki tu bhangesa kubelesela Jihova o henda yetu kwa mwene. (Tanga 1 Nzwá 5:3.) Sumbala twala ni ima yavulu i tu bhangesa kubelesela Jihova, maji mwene ka tu jijidika kubhanga kiki. Jihova wa tu bhana ufôlo wa kusola, mwene u sanguluka kyoso ki tu sola ku mu belesela mukonda twa mu zolo.

9-10. Mukonda dyahi kima kyambote kwijiya o itendelesu ya Nzambi ni ku i belesela?

⁹ O jitata a mesena kwila o twana twâ a kala mu kididi kya kondama. Kiki kyene kya abhengesa kubhana ijila ilanga o twana twâ. Kyoso o twana kya belesela o itendelesu ya jitata, ene a londekesa kuma a dyelela, axila o jitata jâ. O kyabeta dingi kota o kwijiya o itumu ya Tata yetu ya dyulu, ni ku ikumbidila ku mwenyu wetu. Kyoso ki tu bhanga kiki tu londekesa kwila twa zolo Jihova ni ku mu xila, tu katula mbote. (Iza. 48:17, 18) Maji, o yó a bhukumukina Jihova ni itendelesu yê, anda bhongolola divuwa.—Nga. 6:7, 8.

¹⁰ Kubelesela Jihova ku mwenyu wetu, ku tu langa mu xitu, kulanga we o muxima wetu, ku tu kwatekesa kulanga o ukamba wetu ni Jihova. Jihova wejiya o kima kya beto-kota phala etu. Phange Aurora, wa tungu ku Estado Unidos wambe: “Ngejiya kwila kyoso ki tu belesela Jihova o mwenyu wetu ukala dingi kyambote”. Kiki kidi mwene. Mbote yebhi i wa tambula kyá mu kubelesela o itendelesu ya henda, ibhana Jihova?

11. O musambu utena ku tu kwatekesa kyebhi?

¹¹ O musambu u tu kwatekesa kubelesela né mwene mu ithangana yabhonzo. Sayi ithangana, kitu bhonza kubelesela Jihova, mukonda tu akwa ituxi. Maji twa tokala kubhanga nguzu phala ku mu belesela mu ithangana yoso. O mukwa jisálamu wa dyondela kwa Nzambi: “U ngi fikidile ni vondadi ya ku ku tumaka.” (Jisá. 51:12) Phange Denise, muboki wa thembu yoso, wambe: “Se kya ngi bhonzo kubelesela kitumu kya Jihova, ngi samba mu kubhinga nguzu phala kubhanga o kima kya tokala.” Tu tena kudyelela kwila Jihova wanda tambwijila o misambu kala yiyi, sé kufula.—Luka 11:9-13.

KWATEKESA AKWENU KUZOLA TAT’ETU

12. Kala kilondekesa Efezu 5:1, ihi i twa tokala o kubhanga?

¹² Tanga Efezu 5:1. Kuma tu “an’ê a muxima,” tu bhanga yoso phala kukayela o phangu ya Jihova. Etu tu kayela o idifwa yê, kala o henda, o kubhanga o mbote ni kuloloka akwetu. Kyoso athu yo kejiya Nzambi kya mona o kifwa kyetu kyambote, atena kumesena kudilonga dingi yalungu ni Nzambi. (1 Phe. 2:12) O Jikidistá jala ni twana, atokala kukayela o phangu ya Jihova mu ukexilu wa kutalatala o twana. Kyoso o jitata kya kayela o phangu ya Jihova, o twana twâ twanda mesena we kukala makamba a Jihova.

13. Phala kukala ni kuswina ihi i twa tokala kuxinganeka?

¹³ O mona u dikenya kyavulu ni tat’ê. Uzwela yalungu ni tat’ê ni kisangusangu kyoso. Kyene kimoxi we n’etu. Tu dikenya ni Tat’etu ya dyulu, Jihova. Tu mesena kwila akwetu a mwijiya we. Ku muxima wetu, etwenyoso tu divwa kala kya divwile Sobha Davidi, kyoso kya soneka: “Muxima wami u ta thâthe yê mu dyelela ki bhanga Jihova.” (Jisá. 34:2) Abha se tu kala ni jisonyi ja kuzwela yalungu ni Jihova? Kyebhi ki tu tena kukala ni kuswina? Etu tu tena kuswina se tu xinganeka mu kusangulukisa o muxima wa Jihova, ni ku mbote yanda katula akwetu se evwa o maka alungu ni Jihova. Jihova wanda ku tu bhana o kuswina ku twa bhindamena. Mwene wa kwatekesa o Jikidistá mu hama yadyanga kukala ni kuswina, wanda ku tu kwatekesa we.—1 Tes. 2:2.

14. Kima kyahi kya beto-kota ki tu bhangesa kubhanga maxibulu

¹⁴ Jihova ki mukwa katombo, mwene u sanguluka kyoso ki tulondekesa henda ku athu oso sé katombo. (Ika. 10:34, 35) O ukexilu wa beto-kota wa kulondekesa o henda ku athu, o kwa tudila o njimbu yambote. (Mat. 28:19, 20) Kyebhi ki tu tena kubhanga kyambote o kikalakalu kiki? O yó a twivwa atena kubandekesa o kusanguluka ku mwenyu wâ kindala kiki, ni kukala ni kidyelelu kya kutunga mu Palayízu katé ku hádya ni hádya.—1 Tim. 4:16.

SANGULUKA MU KUZOLA O TATA YETU YA HENDA

15-16. Kima kyahi ki tu bhangesa kusanguluka?

¹⁵ Jihova Tata ya henda. Kyenyiki, mwene wa mesena kwila o mwiji wê uzediwa. (Iza. 65:14) Kwene ima yavulu itena ku tu zediwisa kindala kiki, sumbala twene mu dibhana ni ibhidi yavulu. Mu kifika, twa dyelela kwila o Tat’etu ya dyulu wa tu zolo kyavulu. Twala ni kwjiya kwa kidi kwa Mak’â Nzambi, o Bibidya. (Jel. 15:16) Twa tokala ku mwiji wa katunda, wa zolo Jihova, wa zolo o itumu yê. Twa dizolo mudyetu.—Jisá. 106:4, 5.

¹⁶ Etu tu tena kusanguluka jinga mukonda twa dyelela kwila o mwenyu ku hádya wanda beta dingi kota. Twejiya kwila Jihova wanda zubha o kuyibha kwoso. Bhu kaxi ka Utumuninu wê, o ixi yanda kituka dingi Palayízu. Etu twala ni kidyelelu kya katunda kya kwila, o athu afu kyá, anda kwa fukununa, anda kala dingi n’etu. (Nzwá 5:28, 29) Kiki, kisangusangu kyadikota! O kima kya beta dingi kota o kwijiya kwila, kikale ku dyulu kikale mu ixi, etwenyoso twanda bhana kwa Tata yetu ya henda, wala ku dyulu, o kijingu, o kiximanu ni ubhezelu wa mu tokala.