O Kwila Kwala Itendelesu Yambote Itukwatekesa Kukala ni Kukondama Kuhádya?

Kala kitwamono mu milongi yatundumu, o athu asota o kukondama kwakidi, mukukayela o kixinganeku kya kwila: Yoso yoxinde kya, kudilonga kyavulu, umvwama ni kukala athu ambote. Maji kusota o kukondama bhukaxi ka ima yiyi, kwasoko ni kuteka o menya ni muswalu. Maji o kwila kiki kilombolola kuma seku itendelesu yambote, itena kutukwatekesa kusanga o kukondama kwakidi? Kana!

ITENDELESU YABETAKOTA KOTA

Muveji javulu, tuzwela ni mwadyakime mba muthu wala dingi ni unjimu ande kusola kima. Kyene we kimoxi, tutena kusanga itendelesu yanda tukwatekesa kusanga o kukonda kwakidi, ku Muthu wabeta kota mu kitala ni mu kwijiya. O itendelesu Ye, tu isanga mu mikanda, amateka ku isoneka 3.500 amivu kudima. O madivulu mba mikanda yiyi, yala mu divulu dikôla, adixana Bibidya.

Mukonda dyahi eye utena kudyelela mu Bibidya? Mukonda o Wavu o Bibidya, mwene o Mwadyakime mu ngongo yoso, mwene wabetakota mu unjimu. Mu Bibidya amwixana “Mukulu wa Ndamba,” yo weneku kya “tunde xahulu katé ku hadya.” (Daniyele 7:9; Jisálamu 90:2) Mwene wa “bhanga o mawúlu; Nzambi watenene kumba oxi, yú wa iyudika.” (Izaya 45:18) Mwene amutumbula mu dijina dye mwene, Jihova.—Jisálamu 83:18.

O Bibidya ki izwela kwila o ijila ni kikonda kya mwiji umoxi kyabeta dingi kota, o kya akwa ndenge, mukonda Mubhangi umoxi ngo wabhange o athu oso. O itendelesu yê yala ni valolo kate lelu, yabhekela kya mbote ku athu mu ngongo yoso. Yene yabetakota ku ilungulula mu madimi ni ku iwanena athu, o divulu dyosodyoso ndenge.a Kifwa, o athu kabasa o ixi mwa tungu, atena ku itendela ni kukayela o itendelesu yê. Kiki kilondekesa kwila, o izwelu yakayela, ya kidi mwene:

“Nzambi kene ni kathombo ka athu. Maji ku akwa jixi joso, woso umuxila mwène, hé ubhanga yoso yayuka, Mwène umutambulula.”—IKALAKALU 10:34, 35.

O tata muxitu, ubhanga yoso phala kubhana itendelesu yambote kwa mone, kyene we kibhanga Jihova Nzambi. Mwene utukwatekesa bhukaxi ka Maka Mê, o Bibidya. (2 Timote 3:16) Eye utena kudyelela mu Bibidya. Kuma mwène watubhange, mwene wejiya kyambote o wendelu utubhekela kusanguluka kumwenyu.

ITENDELESU ITUTENA KUDYELELA

Tutena kudyelela mu Bibidya phala kukala ni kusanguluka kuhádya, mukonda, 2.000 amivu kudima, yakanena izulukutu ni ukexili wa athu, itwene mumona kudikumbidila mu izuwa yalelu.

IZULUKUTU:

“Kifuxi kyandu di balukila ni kifuxi kyamukwá. Sobha imoxi idibalukila ni sobha yamukwa. Ku ididi imoximu, oxi yandu tunguta kyavulu; ku ididi yamukwa kubhita jinzala ni mabhebhu.”—LUKA 21:10, 11.

UKEXILU WA ATHU:

“Mu izuwa isukidila-ku kwanda kwiza jithembu jabhonzo. Kuma athu a kà kala azodi a ene ngó, injenji, akua ukumbu, a tènda akuâ, a nonga, a xibhaka tata ni mama, a kamba kusakidila, a kamba ujitu wa Maka ma Nzambi. Ka moneka henda ya muthu, kene kuloloka, akwa kutatela ngó akwâ, keji kufikisa jihanji, a kaka, a di zemba ni ima yambote. En’ya a bhanga ufe, a thathamana, a vula izala. A kala azodi a jivondadi jâ, ki azodi a Nzambi, kana!”—2 TIMOTE 3:1-4.

Ihi iwanda xikina, mukumona kwila, mu hama ni hama yamivu kudima o Bibidya yazwelele kya sé kulweza, o ima yene mubhita lelu? Sé phata, wandaxikina mu izwelu ya Leung, mukwa ixi ya Hong Kong, wambe: “O jipolofesiya Jabibidya ajisoneka ukulukulu. Séku muthu wejitena kuzwela o ima yiyi, sé kulweza. Ni kidi kyoso, o Bibidya a ibhusu ku muthu wabeta dingi kota, etu ndenge.”

Mu Bibidya mwala jihama ja jipolofesiya ja dikumbidila kya.b Kiki londekesa kwila, o Bibidya yene mwene o Mak’â Nzambi. Jihova wambe: “Eme mwène ngi Nzambi, kanaku Nzambi yengi, kanaku wosoko n’eme . . . ngi mukwa kutanga o dizubhilu tundé kyá bhu dimatekenu.” (Izaya 46:9, 10) Kyenyikiphe, eye utena kudyelela o ima izwela o Bibidya yalungu ni hádya.

ITENDELESU IBHEKELA MBOTE LELU NI KUHÁDYA NI HÁDYA

Kyoso ki ukayela o itendelesu yala mu Mikanda Ikola, eye ukatula mbote. Tala ngo o ifika yiyi.

KUTALA O KITADI NI SALU MU UKEXILU WAMBOTE

“Kota o lukwaku lwezala ni kutululuka ni kunyoha, kwindi o maku ene kiyadi kyâ ezala ni ndumba dya ikalakalu ni dilamba dya mwenyu.”—NDONGIXI 4:6.

KUDIBHANA KYAMBOTE KUMWIJI

“Kala diyala mudyenu a zole muhatu’ê kala kya dizolo mwène; o muhatu we axile munumi’ê.”—EFEZU 5:33.

KUDIBHANA KYABOTE NI AKWENU

“Eyephe, ku njinda tundaku, wehe o kutema; kuma o kuthathamana ku kubhangesa ngó kyayibha.”—JISÁLAMU 37:8.

Kukumbidila izwela o Bibidya, kwandakubhekela mbote kindala kiki, kwandakubhekela mbote kuhádya. Mu Bibidya tusangamu ikanenu yambote kala:

KUTULULUKA NI KUKONDAMA

“A kala ku ngalasa ni kutululuka kwavulu.”—JISÁLAMU 37:11.

ATHU OSO ANDAKALA NI JINZO NI KUDYA

“Ene-phe a kà tunga jinzo, anga a kalamu; a kà dima milenga ya mivide, anga a kà dyá idima yê.”—IZAYA 65:21.

KIKWANDAKALA DINGI KUKATA MBA KUFWA

“Ki kukala dingi kùfwa, nè ngó mukôndo, mba kudila, mba kukata.”—DIJINGUNWINU 21:4.

Ihi iwatokala kubhanga phala kumona o ima yiyi kuhádya? Tala o milongi yakayela.

a Phala kwijiya dingi yalungu ni kikalakalu kya kulungulula o Bibidya mu madimi engi ni ku iwanena ku athu avulu, nde mu sayte www.jw.org bweta kumbandu ENSINOS BÍBLICOS > HISTÓRIA & A BÍBLIA.

b Phala kwijiya dingi, tala o kibatulu 9, mu divulu A Bíblia—Palavra de Deus ou de Homem? adibhange kwolo o Jimbangi ja Jihova. O divulu didi dyala mu internete, mu sayte www.jw.org. Bweta ku mbandu KIDIDI KYAMADIVULU > MADIVULU NI TUMIKANDA.