Tutena Kudyelela ku Ima Izwela o Bibidya Yalungu ni Kyawabha ni Kyayibha

TWABHINGI NZAMBI PHALA KWENDESA O MAKANDA METU

Mu Bibidya, Jihovaa Nzambi uzwela kwila mwene wabhange o athu phala kumusota na tene ku a endesa, Nzambi kabhange o athu phala ene kudyendesa mudya, kana. (Jelemiya 10:23) Kiki kyene kyabhangesa kwila mwene watubhana o Bibidya mwala milongi phala tukale ni wendelu wazele. Mwene wazolo o athu mu ngongo, mwene kandala kwila tubhita mu ibhidi ni mu jihadi jijila mukonda dya kukamba kusola kyambote. (Matendelelu 5:29; 1 Nzwá 4:8) Kikyene ngo, o Mubhangi wetu, wala ni unjimu ni kwijiya kwasoko, mwene utena kutubhana milongi yabeta o kota. (Jisálamu 100:3; 104:24) Maji Nzambi kajijidika athu na mu belesela, kana.

Jihova wabhana ku diyala dya dyanga ni muhatu, Adá ni Eva, wa abhana yoso yabhindamene phala kuzediwa ku mwenyu. (Dimatekenu 1:28, 29; 2:8, 15) Mwene we wa abhana itendelesu phala ene ku ibelesela. O itendelesu ki ibhonzele kana. Maji mwene wa ehela kusola ene mudyâ se anda mubelesela mbaphe kana. (Dimatekenu 2:9, 16, 17) Kyayibha kwijiya kwila Adá ni Eva asolo kwenda kala kyandalele ene, kabelesela o itumu ya Nzambi. (Dimatekenu 3:6) Mukonda dya kiki, ihi yene mubhita? O kwila o athu mu ngongo abeta kusanguluka mukonda dya ene kwendesa o makanda mâ ene? Kana ngana. Mu mivu yoso yiyi, twene mu mona kwila o kukamba kubelesela o itumu ya Nzambi ki ibheka kutululuka kwa kidi mba kusanguluka, ne ngo.—Ndongixi 8:9.

O Bibidya itubhana milongi yambote phala kutukwatekesa kusola kyambote o ima kikale se atuvwala mu ixi yiyi mba mu ixi yoyo. (2 Timote 3:16, 17; tanga o kaxa “Divulu Phala Athu Oso.” Ijiya kyebhi o Bibidya itena kutukwatekesa.

Dilonge dingi se mukonda dyahi o Bibidya aixana ni kidi kyoso kwila “mak’â Nzambi.”—1 Tesalonika 2:13. Tala o vidyu O Bibidia ia Tokala Kwa Nanhi? mu jw.org.

O BIBIDYA ITUTANGELA SE NZAMBI WANDALA KWILA TUBHANGA KYEBHI

O Bibidya itutangela yalungu ni ukamka wala nau Jihova ni athu tunde kudimatekenu dya ngongo. O izwelu ya Bibidya itukwatekesa kutendela o ima yawabhela Nzambi ni ima yaibhila mwene, ima yebhi ibheka mbote ku athu ni ima yebhi ibheka kalunga. (Jisálamu 19:7, 11) O milongi itudilonga mu Bibidya, milongi ya kidi, itukwatekesa kusola kyambote o ima ku mwenyu wetu mu kizuwa ni kizuwa.

Mu kifika, tala o milongi itusanga mu divulu dya Jisabhu 13:20: “Woso wenda ni jinjimu, u biluka njimu; woso-phe u kala kamba dya ku kayela o yowa, kanange kukituka kala ene.” O milongi yiyi itukwatekesa kate mu lelu didi kala kyakwatekesa mu thembu ya xahulu. O Bibidya yezala ni milongi kala yiyi, milongi itena kutukwatekesa, mu Bibidya mwala itendelesu yavalolo.—Tanga o kaxa “O Milongi ya Bibidya Kate Lelu Yala ni Valolo.”

Maji nange wamudibhwidisa, ‘Kyebhi kingitena o kwijiya kwila o milongi ya Bibidya itena hanji kukwatekesa o athu mu izuwa ya lelu?’ O mbandu yakayela yanda tanga misoso ya athu mu izuwa ya lelu.