MBANDU YAKUDILONGA 7
Kyebhi ki Utena Kukatula Dingi Mbote mu Kitangelu Kyé Kya Bibidya?
“Eye wene mutanga kyebhi?”—LUKA 10:26.
MWIMBU 97 O Mak’â Nzambi, a tu Bhana Mwenyu
ITWANDADILONGAa
1. Ihi ilondekesa kwila Jezú wexile mubhana valolo yavulu ku Mikanda ikôla?
XINGANEKA o mbote yakexile mukatula o athu mu kwivwa Jezú kyoso kyexile mwalonga. Ithangana yoso mwene wexile mu tumbula o Mikanda ikôla! O ima yazwela Jezú kyoso kya mu batizala ni ande dya kufwa, yatundu mu jimbandu ja Mikanda ikôla.b (Mate. 8:3; Jisá. 31:5; Luk. 4:4; 23:46) Mu mivu itatu ni kaxaxi ya ukunji wê mu ixi, mu kithangana kyoso kiki mwene wexile mu tanga ni kujimbulula mu ididi mwakexile athu avulu.—Mat. 5:17, 18, 21, 22, 27, 28; Luk. 4:16-20.
Ku mwenyu woso Jezú walondekesa kwila wazolele kyavulu o Mak’â Nzambi, yú wehela kwila ene endesa o mwenyu wê (Tala okaxi 2)
2. Ihi ya kwatekesa Jezú kwijiya kyambote o Mikanda ikôla kyoso kyexile mu kula? (Tala ofoto yakapa.)
2 Ande dya kumateka o ukunji wê mu ixi, Jezú wexile mu kwivwa ni kutanga o Mak’â Nzambi mu ithangana yavulu. Sé phata, monzo yâ, mwene wexile mu kwivwa Madiya ni Zuzé kutumbula o Mak’â Nzambi kyoso kyexile muzwela mu dya.c (Mate. 6:6, 7) Twejiya kwila Jezú ni mwiji wê, jisábhalu joso exile muya mu dilombe. (Luk. 4:16) Kwenyóko mwene wexile mu kwivwa kyambote kyoso kya kexile mutanga o Mikanda ikôla. Mu kubhita kithangana, Jezú wexile mutanga o Mikanda ikôla ubheka wé. Mu kiki Jezú kejidile ngó o Mikanda ikôla, maji wa izolele we, yoso yexile mubhanga yalungile ni Mak’â Nzambi. Mu kifika lembalala yabhiti mu tembulu kyoso Jezú kyexile ni 12 kya mivu. O alongexi ejidile kyambote o Kijila kya Mozé, “akexile mu diwana ni kwijiya kwê ni itambwijilu yê.”—Luk. 2:46, 47, 52.
3. Ihi itwandamona mu milongi yiyi?
3 Kyoso ki tutanga o Bibidya izuwa yoso tutena ku ijiya we ni ku izola. Kyebhi kitutena kukatula dingi mbote mu kitangelu kyetu kya Bibidya? Tutena kudilonga mu ima yazwela Jezú, kwa yó ejidile o kitumu kya Mozé, kala o jimesene ja kulonga o kijila, o Jifalizeu ni Jisadusewu. O atwameni yó a jingeleja exile mutanga o Mikanda ikôla ithangana yoso, maji kexile mutendela o ima yexile mutanga. Jezú wa zwela yalungu ni ima itatu ya mayala yà, ka kexile mukatula mbote yavulu mukutanga o Bibidya. O izwelu yê kwa ene, yanda tukwatekesa kubandekesa o uhete wetu (1) wa kutendela o ima itutanga, (2) kusanga madisá ambote, ni (3) kwehela o Mak’â Nzambi kulungulula o mwenyu wetu.
TANGA O BIBIDYA NI KU ITENDELA
4. O divulu dya Luka 10:25-29, ditulonga ihi yalungu ni kutanga o Mak’â Nzambi?
4 Etu twamesena kutendela o ima yoso itutanga mu Mak’â Nzambi. Se ki tubhange kiki, kitwandakatula mbote mu kitangelu kyetu kya Bibidya. Mu kifika xinganeka mu ima yazwela Jezú ku “mesene ya Kijila.” (Tanga Luka 10:25-29.) Kyoso o dyala didi webhula kwa Jezú se ihi yatokalele o kubhanga phala kukala ni mwenyu wakalelaku, Jezú wa mukwatekesa kusanga o kitambwijilu bhukaxi ka Mak’â Nzambi. Mwene wa mwibhula: “Ihi yosoneke mu Kijila? Eye wene mutanga kyebhi?” O diyala didi wabhana o kitambwijilu kya tokala mu kutumbula o kitumu kya Mak’â Nzambi kyalungu ni kuzola Nzambi ni kuzola we akwetu. (Iji. 19:18; Mate. 6:5) Tala dingi yebhwidisa o diyala didi kwa Jezú: “O mukwetu nanyi?” Kiki kilombolola kuma o diyala kejidile o ima yexile mutanga, mu kyenyiki katenene kukumbidila ku mwenyu wé o valolo ya kitumu kyókyo.
Twatokala kutanga o Mak’â Nzambi ni kwatendela
5. Kyebhi o kusamba ni kutanga o Bibidya sé lusolo kutukwatekesa kukatula dingi mbote?
5 Tutena kutendela dingi kyambote o Mak’â Nzambi mu kwatanga mu ukexilu wambote. O jindunge jakayela, jitena kukukwatekesa. Samba ande dya kutanga. Twabhindamena o kikwatekesu kya Jihova phala kutendela o Mikanda ikôla, mu kyenyiki twatokala ku mubhinga o nzumbi ikôla ni tutene kudikwatenena mu ima itwandatanga. Mukutanga, kana kutanga ni lusolo. Kiki kyanda kukwatekesa kutendela o ima iwamutanga. Nange itena we kukukwatekesa kutanga ni dízwi dya swina mba mukukayela o kitangelu kya Bibidya kyongalavale. Se wívwa o kitangelu kya Bibidya kyongalavale, ni ku kitala we mu phaphela, wandatena kutendela dingi o milongi iwamutanga mu Mak’â Nzambi, ni kukatula dingi mbote mu ima iwamutanga. (Josu. 1:8) Kyoso ki uzubha o kutanga, samba dingi kwa Jihova phala kumusakidila mu ku kubhana o Maka mê, o Bibidya. Mubhinge o kikwatekesu kyê phala kukumbidila o ima iwatange.
Mukonda dyahi kusoneka izwelu yofele kutukwatekesa kulembalala o ima itwamutanga? (Tala okaxi 6)
6. Mukonda dyahi o kusoneka ibhwidisu ni izwelu yofele yanda kukwatekesa mu kitangelu kyé kya Bibidya? (Tala we o foto.)
6 Tala dingi jindunge jiyadi jitena kutukwatekesa kukatula dingi mbote mu kitangelu kyetu kya Bibidya. Dibhwidise yalungu ni ima iwamutanga. Se wamutanga musoso dibhwidise: ‘O musoso yu walungu ni nanyi? Nanyi wamuzwela? Wamuzwelela phala nanyi, ni mukonda dyahi? Kwebhi kwabhiti o maka yá, ni thembu kuxi?’ O ibhwidisu yiyi, yanda kukwatekesa kuxinganeka mu ima iwamutanga ni kutendela kyambote o musoso. Kyoso ki uya ni kutanga, soneka izwelu yofele yalungu ni ima iwamutanga. O kukbhanga kiki, kikukwatekesa dingi kutendela o ima iwamutanga ni kukatula dingi mbote. Kiki kikukwatekesa we kulembalala o ima iwatange. Eye utena kusoneka ibhwidisu ni ima iwasange mu kutokwesa, kusoneka o jipondo jabeta kota ni kyebhi kiwanda kumbidila o ima iwatange, mba kusoneka kyebhi ki udivwa yalungu ni maka enya. Kyoso ki ubhanga kiki wanda mona kwila o Mak’â Nzambi njimbu phala eye mwene.
7. Mukutanga o Bibidya, kidifwa kyebhi ki twatokala kukala nakyu, ni mukonda dyahi? (Matesu 24:15)
7 Jezú wambe kwila phala kutendela o Mak’â Nzambi twabhingi kukala ni kutongoloka. (Tanga Matesu 24:15.) O kutongoloka ihi? Kilombolola kutendela kyebhi o kima kimoxi kyalungu ni kyamukwa, ni kutendela o ima yabhonzo. Jezú Kidistu wambe we kwila twabhingi kutongolola o izulukutu ikumbidila o ikanenu ya Bibidya. Twabhingi we kukala ni kidifwa kiki phala kukatula mbote yavulu mu kitangelu kyetu kya Bibidya.
8. Ihi itwatokala o kubhanga phala kutongolola o ima itutanga mu Bibidya?
8 Jihova ubhana o kutongoloka ku jiselevende jê. Mu kiki samba kwa mwene, mubhinge o kikwatekesu kyê phala ni ukale ni kidifwa kiki. (Jisa. 2:6) Kyebhi ki utena kulondekesa kuma o ima iwabhingi ku musambu yene iwamesena o kubhanga? Tonginina kyambote o ima iwamutanga, tala se yalungu ni ima iwejiya kya. Phala kukukwatekesa kwijiya dingi, sota mu madivulu metu kala, o Kadivulu ka Kutokwesa Phala o Jimbangi ja Jihova. O madivulu enya anda kukwatekesa kutendela kyambote o njimbu ya Bibidya ni ku ikumbidila ku mwenyu wé. (Jih. 5:14) Se utanga o bibidya ni hanji ya kutongolola o njimbu yê, wanda tendela kyambote o Mak’â Nzambi.
TANGA O BIBIDYA PHALA KUSANGA MADISÁ AKATUNDA
9. Kidi kyahi kya dikota kya Mak’â Nzambi o Jisadusewu ka kixikinine?
9 O Jisadusewu ejidile kyambote o madivulu atanu adyanga a Mikanda ya Hebalayiku, maji ene kaxikinine o kidi kyexile mu madivulu yá. Mu kifika, tala kyebhi Jezú kya tambwijila kyoso kya mwibhula yalungu ni difukunukinu. Mwene wa ebhula wixi: “Kiluwa mu tanga mu divulu dya Mozé, mu musoso wa kisasa, kyoso Nzambi kya mu tangela, wixi: ‘Eme ngi Nzambi ya Mbalahamu, ngi Nzambi ya Izake, ngi Nzambi ya Jakobo’?” (Mál. 12:18, 26) Sumbala o Jisadusewu atangele kya o maka yá muveji javulu, o kibhwidisu kya Jezú kyalondekesa kwila, ene ka xikinine o kidi kiki kyadikota kyala mu Mak’â Nzambi —o milongi yalungu ni difukunukinu.—Mál. 12:27; Luk. 20:38.d
10. Kyoso kitutanga o Bibidya twatokala kutonginina mu ihi?
10 Ihi itwadilongo? Twadilongo kwila kyoso kitutanga o Bibidya twatokala kutendela yoso yamutulonga o velusu mba o musoso. Kitutokala ngó kutendela o milongi yabhebhuluka yala mu Mak’â Nzambi, maji twabhingi we kutendela o milongi ya zongo ni itendelesu yalamu.
11. Kala kilondekesa o divulu dya 2 Timote 3:16, 17, kyebhi ki utena kusanga milongi yambote mu kitangelu kyé kya Bibidya?
11 Kyebhi ki utena kusanga milongi ya ubhe mu kutanga o Bibidya? Tala ihi izwela o divulu dya 2 Timote 3:16, 17. (Tanga.) O jivelusu jiji jamba kwila o “Mikanda yoso Ikôla . . . yafwama” phala (1) kulonga, (2) phala kubazela o itondalu, (3) phala kuyukisa yabhengalala, ni (4) kwijidisa wendelu wambote. Eye utena kukatula mbote mu ima iwana yiyi, né mwene mu madivulu yó ki wene mwatanga kyavulu. Tala ihi itena ku kulonga o musoso yú yalungu ni Jihova, ni vondadi yê, mba ni itumu yê. Tonginina we se kyebhi yene itena kuku bazela. Phala kubhanga kiki, sota kutendela kyebhi o jivelusu jiji jitena kukukwatekesa kumona maukexilu ayibha mba jihanji jayibha ji wala naju. Sota we kutendela kyebhi o jivelusu jiji jitena kukukwatekesa kukolokota fiyele kwa Jihova. Tala kyebhi o Bibidya itena kukukwatekesa kuyukisa o ukexilu wakuxinganeka wa muthu nange umusanga mu ukunji. Sota we kyebhi o jivelusu jiji jitena kwijidisa wendelu wambote ni uxinganeke kala ki xinganeka Jihova. Mu kubhanga kiki, wanda tena kukatula dingi mbote mu kitangelu kyé kya Bibidya ni kusanga dingi milongi yambote.
EHELA O KITANGELU KYÉ KYA BIBIDYA KULUNGULULA O UKEXILU WÉ
12. Mukonda dyahi Jezú webhwidisa ku Jifalizewu “Ki mu tange?”
12 Phala kulondekesa kwila o Jifalizewu exile mumona o Mikanda Ikôla mu ukexilu wayibha, Jezú wa ebhula: “Ki mu tange?” (Mat. 12:1-7)e Mu kithangana kyenyókyo o Jifalizewu ambe kwila o maxibulu a Jezú exile mu bhukumukina o kizuwa kya Sábhalu. Mu kwatambwijila, Jezú wazwela yalungu ni phangu jiyadi ja Mikanda Ikôla yú watumbula velusu mu divulu dya Hozeya phala kulondekesa kuma ene katendela se mukonda dyahi Jihova wabhele o kitumu kya kizuwa kya Sábhalu. Ene we kexile mukwatela henda ku athu. Mukonda dyahi o mayala yá exile ni ukexilu yu wayibha? Mukonda ene exile mutanga o Mak’â Nzambi ni ukumbu, exile mulondekesa kuma ithangana yoso alungile. Mukonda dya kiki, kexile mu tendela o ima yexile mutanga.—Mat. 23:23; Nzw. 5:39, 40.
13. Ukexilu webhi utwatokala kukala nawu mukutanga o Bibidya, ni mukonda dyahi?
13 O izwelu ya Jezú itulonga kwila twatokala kutanga o Bibidya ni muxima woso. Kitwamesena kukala kala o Jifalizewu, maji tukala polondo phala kudilonga ni kulondekesa o kulenduka. Etu twatokala ‘kuxikina ni kubatama kwoso kyoso Nzambi kyata kumixima yetu o maka mê.’ (Tiy. 1:21) Se tukala tu athu alenduka, twanda kwehela kwila o Mak’â Nzambi alungulula o ukexilu wetu. O madisá utusanga mu Bibidya kala, o kukwatela henda, kuloloka ni kuzola, anda tukwatekesa phala kitukale tu akwa kudizangeleka.
Kyebhi kitutena kumona se twa mukwehela o Mak’â Nzambi kulungulula o ukexilu wetu? (Tala okaxi 14)f
14. Kyebhi ki tutena kwehela o Bibidya kulungulula o ukexilu wetu? (Tala we o foto)
14 O ukexilu utudibhana ni athu, utena kulondekesa se o Bibidya ya mulungulula o ukexilu wa mwenyu wetu. O Jifalizewu kehela kuma o Mak’â Nzambi atula ku mixima, mu kyenyiki ene exile mu “fundisa o athu akambe kikuma.” (Mat. 12:7) Kyene kimoxi we, o ukexilu wetu wa kutalatala akwetu, wanda londekesa se o Mak’â Nzambi atutula mwene kumuxima. Mu kifika, o kwila tuzwela o ukexilu wambote wa akwetu, inga tutumbula o itondalu yâ? O kwila twa akwa kulondekesa o henda ni kuloloka akwetu? Inga twa akwa kufundisa akwetu ni kwa bhakela phonzo? O itambwijilu ya ibhwidisu yiyi, yandalondekesa se o Mak’â Nzambi amutukwetekesa kulungulula o ixinganeku ni ibhangelu yetu.—1 Ti. 4:12, 15; Jih. 4:12.
O KUTANGA O MAK’Â NZAMBI KUTUKWATEKESA KUSANGULUKA KU MWENYU
15. Kyebhi Jezú kyexile mumona o Mikanda Ikôla?
15 Jezú wazolele kyavulu o Mikanda Ikôla, o izwelu mu divulu dya Jisálamu 40:8 ilondekesa kyebhi mwene kyexile mumona o Mak’â Nzambi, yene yamba: “Nga sanguluka mu kubhanga ki wa mesena eye u Nzambi yami; xi, mbata, o ngonge yé ya ngi kala moxi dya muxima.” Mukonda dya kiki mwene wasangulukile kyavulu kumwenyu, yú waditundu kyambote mu kusidivila Jihova. Tutena we kukala ni kusanguluka kuku mu kusidivila Jihova, kyoso ki twehela o Mak’â Nzambi kubokona ku mixima yetu.—Jisá. 1:1-3.
16. Kyebhi ki tutena kukatula dingi mbote mu kitangelu kyetu kya Mak’â Nzambi? (Tala o kaxa “O Izwelu ya Jezú Itena kukukwatekesa Kutendela o Ima Iwa Mutanga.”)
16 Mu kukayela o izwelu ya Jezú ni phangu yê, twabhingi we kukatula dingi mbote mu kitangelu kyetu kya Bibidya. Tutena kubhanga kiki, mu kusamba ande dya kumateka o kutanga, mukutanga kamwanyu kamwanyu, mu kudibhanga ibhwidisu, ni kusoneka we izwelu yofele. Tutena kutongolola o ima itusanga mu Bibidya mu kutokwesa mu madivulu metu. Tutena we kukatula mbote mu kitangelu kyetu kya Bibidya mukubhanga nguzu phala kudilonga ima ya katunda katé mwene mu jivelusu ki twa jijiya kyambote. Kyoso ki tutanga we o Mak’â Nzambi, twabhingi kwehela o milongi kulungulula o ukexilu wetu. Se tubhanga o ima yoso yiyi, twanda katula dingi mbote mu kitangelu kyetu kya Bibidya, ni kuzukama dingi kwa Jihova.—Jisá. 119:17, 18; Tiy. 4:8.
MWIMBU 95 O Mukengeji Uya ni ku di Bandekesa
a Etwenyoso tu abhezi a Jihova, tubhanga nguzu phala kutanga o Bibidya izuwa yoso. O athu avulu a tanga we o Bibidya, maji ene katendela o ima ya tanga. Kiki kyabhiti we ni athu mu izuwa ya Jezú. Kudilonga o ima ya zwela mwene kwa yó exile mutanga o Mak’â Nzambi, kwanda tukwatekesa kukatula dingi mbote mu kitangelu kyetu kya Bibidya.
b Kyoso Jezú kya mu batizala ni kumu unda ni nzumbi ikola, o ima yoso yejidile ande dya kwiza mu ixi, ya mutula ku kilunji kyê.—Mat. 3:16.
c Madiya wejidile kyambote o Mikanda ikôla, ni kwila mwene wexile we mu itumbula. (Luk. 1:46-55) Nange Zuzé ni Madiya, kexile ni kitadi kyosoko phala kusumba kópya ya Mikanda ikôla. Mu kyenyiki, nange ene exile mu kwivwa kyambote o kitangelu kya Mak’â Nzambi mu dilombe phala atene kwa lembalala mu ithangana kupholo.
d Tanga o milongi ni dyambu: “Zukama kua nzambi—‘Muéne Nzambi ia . . . Athu ala ni Muenhu’” mu Mulangidi wadyanga wa Kawana wa 2013.
e Mu divulu dya Matesu 19:4-6, Jezú wabhange we o kibhwidisu kiki ku Jifalizewu: “Enu kiluwa mu tanga?” Né mwene, ene exile mutanga o maka alungu ni ibhangelu ya ixi, maji kexile mutendela kyambote se ihi yazwela Nzambi yalungu ni ukaza.
f KILOMBOLWELU KYA FOTO: Mu Kyônge mu kididi kya ubhezelu, phange ukalakala mu iselekete ya mimbu utondala kyavulu, kudisukilu dya kyônge, o jiphange katale o itondalu yê, ni muxima woso a mu muximana.