Mu Kusola o Ima o Athu Adyelela ku Ihi?

Athu avulu axikina kwila sayi ima yawabha, o ya mukwa ima yayibha. Mu kifika, athu oso ejiya kwila o kujibha, o kuta phanda ni kuzangata ana-ndenge, ima yiyi ima yayibha. O kuyuka, o kubhanga o mbote ni kusuwa akwetu, yoso yiyi ima yambote. Maji avulu abanza kwila o yalungu ni kusasa o twana, kuzwela o kidi mba kunyana mba diyala ni diyala kuzeka kumoxi, ki kwalaku kwila kiki kyawabha o kiki kyayibha, kikwalaku. Ene afika kwila kima kyosokyoso kima kyawabha, muthu mwéne usola. Se o athu amona kwila o kima kyamesena kubhanga kima kyawabha ni kwila akwâ kyene we kyamubanza, enephe abhanga o kima kiki. O kwila yiyi ndunge yambote?

O KWILA TWANDA SOLA O IMA MUKUDYELELA KU IBANZELU YETU?

O kitongolwelu kyetu kyene kitukwatekesa kusola o ima yawabha mba yayibha. (Loma 2:14, 15) Katé mwene o ana-ndenge ejiya se kima kyebhi kyayibha, ni kwila ene kadivwa kyambote kyoso kyabhanga o ima yayibha. Kyoso kituya ni kukula tudilonga se ihi yawabha mba yayibha bhukaxi ka jindandu jetu, makamba metu, alongexi’etu, jivizinyu jetu ni mu ngeleja yetu. Kyoso kitusola kima, o kitongolwelu kyetu kitukwatekesa kumona se ihi yawabha mba yayibha.

O ukexilu wetu wakumona o ima yawabha mba yayibha, utena kutubhangesa kukwatela henda ku akwetu, kwasakidila ni kwatalatala sé katungu. Wene utufidisa we kubhanga o ima yeji luwalesa yó utwa azolo, mba ima yeji tukwatesa jisonyi mba kutubhangesa kukala ni kikuma.

O kwila twatokala kudyelela jinga ku ibanzelu yetu? Sayi munzangala amwixana, Ngaliku, wasolo kubhanga o ima ku mwenyu kala kyamukexile ku muxima. Maji wamono kwila o kubhanga o ima kala kyexile mubanza ku muxima, kwamubhekela ngó windwa. Mukonda dya kiki watale hadi yavulu, mwene wambe: “Mwenyu wami wayibhile kyavulu, mukonda ngexile ngi ndumbu, ngi hôlwa, ngi kisweya ni kunwa we jidroga.”

O KWILA TWANDA SOLA O IMA MUKONDA DYA AKWETU?

Katuku o ibanzelu yetu, mu ithangana yavulu tusola o ima mukonda dya akwetu. Tutena kukatula phangu yambote ku unjimu ni kwijiya kwala naku akwetu. O jindandu jetu, ni makamba ni jivizinyu jetu atuxila kyoso kitubhanga ima yawabhela ene.

O kwila twatokala kudyelela jinga ku ibanzelu ya akwetu? Sayi kilumba amwixana Priscila wabhange o kima kyexile mubhanga o makamba mê, o kuzeka ni diyala ande dya kukazala. Sumbala wabelesele o makamba mâ, maji mwene kasangulukile. Mwene wambe: “Kubhanga o ima yexile mubhanga athu avulu, kwa ngibhangesa kudivwa kyayibha. Ngabhange ima yatele o mwenyu wami mu kilwezu.”

O KWILA KWALA UKEXILU UTENA KUTUKWATEKESA KUSOLA KYAMBOTE O IMA?

Kyoso kitusola ima yambote mba yayibha, o ixinganeku yetu ni ya akwetu itena kutukwatekesa. Maji sayi ithangana yene ki itukwatekesa kusola o ima yawabha. Mu kiki né mwene se étu mba akwetu tubanza kwila sayi kima kyawabha, sayi ithangana tutena kudibhekela maka mba kubhekela maka ku akwetu mukonda kitutena kumona se ihi yanda bhita mukonda dya kusola kwetu. (Jisabhu 14:12) Se-ku kima kitukwatekesa kwijiya se o ixinganeku yetu mba ya akwetu ixinganeku yambote mwene ni kwila ki kwanda bhinga ku ilungulula. Mu izuwa yetu o ima yala kiki: Mukulu o ima yexile mumona o athu kwila ima yayibha, lelu a imona kwila yawabha, o ima yexile mumona kala yawabha, lelu a imona kala yayibha.

O kwila sayi kima kitena kutukwatekesa kusola se ihi yawabha ni ihi yayibha? O kwila kwala ijila itwatokala o kubelesela lelu maji ki yanda tubhangesa kudyela ku hádya?

Kima kyambote kwijiya kwila kwala kima kitutena kudyelela, kitena kukwatekesa athu oso atungu mu ididi yoso. O milongi ya kayela yanda tukwatekesa kumona se kwebhi kutusanga o kikwatekesu kyabeta-kota phala kutukwatesa kwijiya se ihi yawabha mba yayibha.